لاس رسیدونکی لینک

Breaking News

کوټه:دپولیسو په ډزو دپښتون ځوان شربت خان په وژنه اسمبلۍ کې تاوده بحثونه شوي


دبلوچستان اسمبلۍ په غونډه کې دپولیسو په لاس د وژل شوي پښتون ځوان شربت خان په وژنه تاوده بحثونه شوي اؤ د ايالت د کورنيو چارو وزير ضيا لانګو ددغې پيښې دپلټنو امر کړی اؤ په دوؤ ورځو کې یې راپور غوښتی دی.
پنځويشت کلن ځوان شربت خان تيره ورځ د کوټې په سيمه اخترآباد کې د پوليسو په ډزو وژل شوی ؤ چې دهغه د وژنې ضد دپاکستان بیلابیلو سیمو کې پښتنو سخت احتجاجونه کړي دي.

د کوټې شالکوټ پوليس تهاڼه د يادې پيښې پخلی کوي او وايي چې شربت خان نومي ځوان هغه وخت وژل شوی چې کله پوليس ورته د موټر د درولو اشاره کړې خو شربت خان د پوليسو د غوښتني باوجود ورته موټر نه ؤ درولی ځکه پولیسو ورباندې ډزې کړي دي.

د پيښې په هکله دخالي په ورځ د بلوچستان په ايالتي اسمبلۍ کې د پښتونخوا ملي عوامي ګوند غړي نصرالله زيري وينا وکړه او وې وويل چي"پوليسو له وژل شوي ځوان څخه دوې ورځې پخوا د رشوت پنځلس زره روپی او د هغه موبائيل هم اخستی ؤ او تيره شپه يې د پيژندګلو باوجود په ډزو وژلی ۔

د نصرالله زيري په وينا پوليسو د وژل شوي ځوان ورور له پيښې وروستو نيولی او پر هغه يې هم تشدد کړی ، او پوليسو د وژل شوي ځوان شربت خان او د هغه د ورور په ضد ايف ۔ اي ۔ ار هم درج کړی.
ښاغلي زيري وويل چي د پوليسو له لوري داسې پېښې هر وخت رامنځ ته کيږي ، خو څوک نه شته چې له پوليسو څخه وپوښتي چي دوی ولې داسې کوي ؟

هغه وپوښتل چې پوليسو ته د يو انسان د وژلو اختيار چا ورکړی؟
نصرالله زيري د کورنيو چارو له وزير څخه د پيښې په خلاف د پلټنو غوښتنه وکړه ۔

داسمبلۍ په اجلاس کې د پيښې په اړه د خبرو کولو پر مهال د جميعت علماء اسلام (ف) غړي فضل آغا وويل چي پوليس او نورې امنيتي ادارې د ايراني تيلو په کاچاق کې لاس لري او د رشوت پيسې اخلي.

د بلوچستان نيشنل عوامي ( مينګل ) د اسمبلۍ غړي اختر حسين لانګو وويل چې ډيره دردونکې پيښه ده ، د پيښې د پلټنې لپاره دې خصوصي کميټه جوړه کړل شي.


د ايالتي اسمبلۍ دغونډې پیل کېدو پر وخت د وژل شوي ځوان کورنۍ د هغه جسد د اسمبلۍ د تالار مخې ته د راوړلو هڅې وکړې خو پوليسو هغو ته د احتجاج اجازه ور نه کړه.

احتجاجي کورنۍ د شربت خان مړی د ميټرو پوليټن کوټې دفتر مخ ته پر سړک کيښود او احتجاج يې وکړو.

د شربت خان کورنۍ غوښتنه کوله چي د هغو پوليسو خلاف دې ايف اي ار درج شي چې شربت خان یې وژلی دی.
د پوليسو يوه لوړ پوړي افيسر د نوم نه ښودلو په شرط امریکا غږ ډيوه ته وويل چي په پيښه کې د ککړو پولیسو خلاف د ايف اي ار درج کولو ژمنه يې کړې او له زيانمنې شوې کورنۍ سره به انصاف کيږي.
د پوليسو له ژمنو ورستو احتجاج کوونکو خپل احتجاج ختم کړو او د شربت خان مړی يې په کچلاغ کې خاورو ته وسپارلو ۔

  • 16x9 Image

    حفیظ الله شېرانی

    حفیظ الله ستوری شېرانی په بلوچستان کې د وي.او.اې ډیوه د خبریال په توګه کار کوي. هغه له بلوچستان پوهنتون څخه په جرنلزم او پښتو ادبیاتو کې ماسټرۍ کړې دي او له تېرو اوو کلونو راهیسې د جرنلزم په میدان کې کار کوي. شپږ کاله یې د پاکستان له (ډان) ټیلیویژن سره د خبریال په توګه کار کړی او په بېلابېلو ورځپاڼو کې یې کالمونه هم لیکلي دي. په بلوچستان کې د ډیوه رېډیو او ټیلویژن لپاره د ملټي مېډیا په برخه کې پر بېلابېلو سیاسي، کلتوري او ټولنیزو موضوعاتو رپوټونه جوړوي.

     

XS
SM
MD
LG