واشنګټن: د ترکیې ولسمشر رجب طیب اردوغان د هندوستان له لومړي وزیر نریندرا مودي سره د هند او پاکستان ترمځ د پولې پر سر د تازه حالاتو په اړه خبرې کړې دي.
د ترکیې د ولسمشر د اړیکو له دفتر څخه په یو خپور شوي بیان کې د ګل یا دوشنبې په ورځ ویل شوي دي چې د اردوغان او نریندرا مودي په دغو ټیلیفوني خبرو کې د دواړو هېوادونو پر اړیکو هم خبرې شوې دي.
اردوغان د فیبرورۍ په وروستیو کې د پاکستان له لومړي وزیر عمران خان سره هم په ټیلیفوني خبرو کې د دواړو ګاونډیو هېوادونو ترمنځ په وروستیو اړیکو باندې خبرې کړې وې.
اردوغان همدارنګه د مارچ د میاشتې په اتمه نېټه د هند او پاکستان د لانجې په اړه د ملګروملتونو له عمومي منشي انټونیو ګوتاریس سره په ټیلیفون باندې خبرې کړې وې.
که څه هم د هند او پاکستان ترمنځ جګړه اوس سړه شوې ده خو بیا هم د دواړو لوریو لخوا په کشمیر کې د خال خال ډزو راپورونه راځي.
په یوه تازه راپور کې د پاکستان د پولیسو یو مشر ویلي چې هندي ځواکونو په لانجمن کشمیر کې په پاکستاني لوري باندې ډزې کړي چې په ترڅ کې یې یو ۷۰ کلن سړ وژل شوی دی.
د سیمیزو پولیسو مشر ارشد نقوي د ګل یا دوشنبې په ورځ وویل چې وژل شوي سړي غوښتل خپله لور وویني او یو خوندي ځای ته یې له ځانه سره بوځي.
د هند او پاکستان ترمنځ وروسته له هاغې کړکېچ زیات شو کله چې د فیبرورۍ په ۱۴ نېټه په هندي کشمیر کې د یو ځان وژونکي برید په ترڅ کې ۴۰ هندي نیمه سرتیري ووژل شول او د برید پړه بیا پاکستانۍ ترهګرۍ ډلې جېش محمد په خپله غاړه واخېسته.
ددې په ځواب کې د هند جنګي جټ الوتکو د فیبروۍ په ۲۶ نېټه د پاکستان په خاوره کې ۴۰ کیلومټره دننه د خیبر پښتونخوا په بالاکوټ نومې سیمه کې د ترهګرو مرکزونه په نښه کړل او بېرته خپل هېواد ته خوندي ستنې شوې.
هند دعوا کړې وه چې په دغه برید کې یې په ګڼ شمېر ترهګر وژلي او د هغوي روزنیز مرکز یې ویجاړ کړی.
هند دا هم ویلي چې پاکستان ددغه برید په اړه د معلوماتو د پټولو هڅه کوي.
تر دې یوه ورځ وروسته یعنې دفیبروۍ په ۲۷ نېټه د پاکستان لومړي وزیر عمران خان وویل چې د هندوستان دوه جنګي الوتکې یې وروسته له هاغې وویشتې کله چې د دوی خاورې ته واوښتې.
د یوې جنګي الوتکې پیلوټ هم پاکستان نیولی وو چې بیا د مارچ په لومړئ نېټه تر خوشې کېدو وروسته بېرته هندوستان ته ولاړ.
بل لوري ته د مارچ په لومړۍ نېټه د هند د هوايي ځواک مشر هم ادعا کړې وه چې د پاکستان اېف- ۱۶ جنګي الوتکه يې نسکوره کړې او هغه د پاکستان لوري ته غورځېدلې وه.
خو د پاکستان د پوځ وياند مېجر جنرل اصف غفور ويلي ؤ پاکستان د هند دوه جنګي الوتکې نسکورې کړي او د هند يو پايلټ يې نیولی دی کومه پاکستانۍ الوتکه نه دی نسکوره کړای شوې.
