د پاکستان تحريک انصاف ګوند د حکومت د خزانې وزیر اسد عمر په داسې حال کې د خپلې چوکۍ څخه استعفی ورکړه چې د پاکستان اقتصاد د سختو مشکلاتو سره مخ دی.
اسد عمر نن د زيارت په ورځ د خپلې استعفی ورکولو خبر په خپله په ټويټر ورکړی دی.
هغه ويلي وزیراعظم عمران خان په کابينه کې د بدلون کولو په لړ کې هغه ته ویلي چې هغه د خزانې د وزارت په ځای د توانايۍ وزارت سمبال کړی.
هغه زياته کړې په کابينه کې به بله چوکۍ نه اخلي.
اسد عمر په خپل ټويټ کې ويلي عمران خان د پاکستان امېد دی او نوی پاکستان به جوړوي.
د پي ټي ايي د حکومت د خزانې وزير په داسې حال کې دغه چوکۍ پرېښودې چې د پاکستان د نړيوالې مالياتي ادارې ايي اېم اېف سره د پور (بېل اؤټ پېکج) خبرې رواني دي.
د پاکستان موجوده اقتصاد باوجود د دې چې سعودي عرب، متحده عرب اماراتو او چين ورته قرضونه ورکړي بيا هم د مشکلاتو سره مخ دی او نړيوالې مالياتې ادارې وايي، ښايي چې د پاکستان د اقتصاد راتلونکی هم ښه نه ښکاري.
د پاکستان تحريک انصاف ګوند د حکومت جوړېدو سره سم عمران خان او د خزانې وزير اسد عمر په خپله څو ځله بيا بيا دا خبره کړې چې د پاکستان اقتصاد د خپل تاريخ د سخت وخت سره مخ دی.
د پاکستان تحريک انصاف ګوند په حکومت کې د راتلو نه وړاندې يو شمېر ادعاوې کړې وې چې نوی پاکستان به جوړوي خو د پي ټي ايي حکومت د سختو نيوکو سره مخ دی چې په خپلو کړو ادعاؤ کې پاتې راغلی دی.
