د پاکستان د سپریم کورټ مشرقاضي ښاغلي اصف سعید کهوسه ویلي دي چې د هېواد په هره ضلعه کې به دښځو په ضد دتشدد دمقدمو اوریدنې لپاره د زرو نه زيات ځانګړې عدالتونه جوړولی شي.
مشر قاضي وایي ددې عدالتونو ماحول به د نورو عدالتونو نه جدا وي دغو محکمو کې به عریضه کوونکي پرته له څه ویرې خپل دریځ څرګندولی شي.
پېښور هايي کورټ کې د زنانه ؤ دمقدمو وکیلې پلوشه ايډوکيټ ډيوه نيوز ته وويل موجوده عدالتونو کې په زنانه ؤ د تشدد په مقدمو کې بحث کول ډير مشکل وي او دا چې دغو ځانګړو عدالتونو جوړولو سره به داسې ډول مقدمو کې زنانه په اسانۍ سره انصاف ترلاسه کولی شي.
د پېښور هايي کورټ د وکیلانو دسازمان د اجرائیه شورا غړې نازمين اختر ايډوکيټ وايي چې د ښځو خلاف د تشدد د مقدمو د اورېدنې لپاره ځانګړو عدالتونو کې که چرې زنانه ججانې، وکيلانې او نورې زنانه مامورینې وګمارل شي نو ښځې به محکمو ته د وړاندې کیدلو په مهال په ښه توګه خپل دریځ واضحه کولی شي.
د زنانه و د حقونو د پاره کار کوونکې ادارې نور ايجوکيشن ټرسټ سره تړاو لرونکې محموده ګل ايډوکيټ وايي چي دې ځانګړو عدالتونو جوړولو سره به په عدالتونو دمقدمو بوج کم شي او د زنانه و سره دتړلو هر رقم مقدمو فيصلې به په لږ وخت کې کېږي.
خورشيد بانو چې د حوا لور نومې غير دولتي سازمان مشره ده د چيف جسټس ددې فيصلې ستائنه کوي خو وايي چې د نورو صوبو په څېر خېبر پښتونخوا کې هم په زنانه و د تشدد پر ضد قانون د يادو عدالتونو جوړولو تر څنګ پاس کول مهم دې.
د پاکستان د بشري حقونو دخپلواکه کمیشن ترمخه په کال 2018 کې دپاکستان دننه د ښځو په ضد د جنسي تشدد لږترلږه 845پیښې رامینځته شوي دي.
کمیشن وړاندې ویلي دي چې په خاصه توګه د پاکستان په کلیوالو سیمو کې غربت زیات دی اوجنسي تشدد د بدنامۍ سره تړل شوی دی ځکه د تشدد ښکار ښځې په دې اړه خبرې نه کوي او خلک هم په دې خبرو ځانونه غلې کوي
