د خېبرپښتونخوا وزيراعلی محمود خان چې د سوات ضلعې سره تعلق لري د دوه اربه او ۳۷ کروړو روپو شتمنۍ لرونکی په څلورو واړو صوبو کې تر ټولو زيات شتمن وزيراعلی او د صوبايي اسمبلۍ غړی دی.
د ډان ورځپاڼې د رپوټ ترمخه د محمود خان سره د دوه اربه او ۳۳ کروړه روپو زرعي ځمکې او ۴۱ اعشاريه پينځه ملينه روپۍ په بېنک کې لري خو نوموړی په خپل نوم ګاډی نه لري.
د محمود خان په شتمنيو کې ۳۵ تولې سره زر دي خو د هغې ماليت يې نه دی ښودلی.
د کال ۲۰۱۸م د ۳۰ جون د مالي کال ختمېدو پورې د شتمنيو په تفصيلاتو کې په دوېم نمبر شتمن د عوامي نيشنل ګوند بهادر خان دی.
د هغه د جايداد مالیت ۸۷ کروړه ۵۵ لاکه روپۍ او د کرکيلې د ۴۱ کروړه روپو ځمکه لري.
په رپوټ کې د خېبرپښتونخوا د بونېر ضلعې سره تعلق لرونکی سيد فخر جهان د ۷۷۶ ملينه روپو شتمنۍ لري د هغه په شتمنیو کې د ۷۶۶ ملينه روپو زرعي او غېر ځمکې او دوکانونه شامل دي.
د نوموړي سره په بېنک کې يواځې پينځه لاکه روپۍ ښودل شوي دي.
په ياد رپوټ کې د صوبايي اسمبلۍ د يو شمېر نورو ممبرانو شتمنۍ هم ښودل شوي دي.
