لاس رسیدونکی لینک

Breaking News

په خېبرپښتونخوا کې ورګډو شوؤ قبايلي سیمو د بشري حقونو مبارز وکيل په حق رسېدلی


عبدالکريم محسود

په خېبرپښتونخوا کې ورګډو شوؤ قبايلي ضلعو کې د د بشري حقونو فعاله مبارز، د قبايلي سيمو د وکیلانو د اتحاديې جوړؤنکی او لومړی مشر عبدالکريم محسود په حق رسېدلی دی.

محسود د ورپېښې ناروغۍ له امله د ۵۵ کالو په عمر کې په حق رسېدلی دی.

عبدالرلکريم محسود څوک ؤ؟

د ارواښاد تعلق د جنوبي وزيرستان د سراروغه تحصيل د شاته پاتې علاقې سپين غړي سره ؤ، ابتدايي زده کړې يې په ټانک او د وکالت د ډګرۍ پورې نورې زده کړې يې په ډېره اسماعيل خان کې ترسره کړې وې او هغه دا وخت د پېښور هايکورټ وکیل ؤ.

د محسود په قبايلي سيمو کې د بشري حقونو دپاره مبارزه او سياست

ارواښاد د زدکړو په وخت کې په ګومل پوهنتون کې د پښتون سټوډنټ فېډرېشن څخه په ساست کې برخه اخيستل پېل کړي او د باچاخان او ولي خان سره يې يو ځای سياسي فعاليتونه ترسره کړي او جېلونه یې خوړلي.

هغه د قبايلي سيمو د وکيلانو اتحاديه جوړه کړې او په وروستيو کې د پخوانۍ فاټا په خېبرپښتونخوا کې ورګډولو کې يې نه ستړې کېدونکې مبارزه کړې وه.

د هغه ملګري وايي تل يې په قبايلي سیمو کې د ترهګرۍ او هلته د بشري حقونو د سرغړونو پرضد احتجاجونه کړي او تراوسه یې دغه عمل دوامداره ساتلو.

هغه په پېښور هايکورټ کې نزدې ۳۵ کاله وکالت کړی او هلته یې تل د قبايلي او جنوبي سیمو سره تعلق لرونکو خلکو دپاره خدمتونه ترسره کړي دي.

د پښتون ژغورنې غورځنګ کلک ملاتړی ؤ

عبدالکریم محسود پښتون ژغورنې غورځنګ (پي ټي اېم) سره د اولې ورځې نه کلک ملګری او تل يې د دې غورځنګ په هلو ځلو کې فعاله رول لوبولو.

د پي ټي اېم فعاله ثنااعجاز وايي د پي ټي اېم په غړو چې څومره مقدمې وې د هغو دپاره په وکالت کوونکو کې يو تکړه وکیل عبدالکريم محسود هم ؤ.

هغې وویل ارواښاد ورته د پي ټي اېم د اسلام اباد په لومړي لاريون او احتجاج کې مېلاؤ شوی او بیا يې تل د پي ټي اېم په ټولو هلوځلو کې برخه اخیسته.

د ارواښاد په مړينه د نوميالي وکيل لطيف افريدي څرګندونې

د پېښور هايکورټ د وکیلانو د اتحاديې مشر او نوميالی وکيل لطيف افريدی وايي د عبدالکريم محسود مړينه د پېښور هايکورټ د وکيلانو دپاره يو لوې زيان دی او زياتوي د ارواښاد په مړینه په ځانګړي ډول د وزيرستان ټول خلک د يو تکړه وکیل او مبارزه څخه محرومه شو.

هغه وويل د دغه ډول بشر دوسته وکیل کمی پوره کېدل به وخت واخلي.

د عبدالکريم ورور عبدالمجيد اېډوکېټ وايي ارواښاد د زړه په ناروغۍ اخته ؤ او دوه مياشتې وړاندې يې د زړه اپرېشن شوی او بېګاه د شپې يې ناڅاپه طبيعت خراب شو او چې روغتون ته یې رسولو هلته يې ژوند د لاسه ورکړی دی.

هغه وويل د محسود یوه مېرمن او اته تنه اولاد دی چې پکې څلور زامن او څلور لوڼه دي، د هغه درې زامن هم د وکالت ډګرۍ کوي.

ارواښاد به په خپله پلارنۍ سیمه سپين غړۍ کې خاورو ته سپارل کیږي.

  • 16x9 Image

    عدنان بېټنی

    عدنان بېټنی د پښتونخوا په ډېره اسماعیل خان ښار کې د وي او اې ډیوه خبریال دی. هغه د افغانستان او پاکستان تر منځ د پولې دواړو غاړو خصوصاً له وزیرستانه د نورو مسلو تر څنګ د ترهګرۍ، جنګځپلو کډوالو، بشري حقونو او د دواړو هېوادونو تر منځ پر سیاسي اړیکو او اقتصاد رپوټونه جوړوي. نوموړي د ډېره اسماعیل خان له ګومل پوهنتونه د جرنلزم له زدکړو سره سره د سیاسیاتو ماسټري ډګري هم تر لاسه کړې ده.

  • 16x9 Image

    فضل عزیز

    فضل عزيز په کراچۍ کې د وي او اې ډيوه خبريال دی په سياسي، تعليمي، صحت او کلتور سره په ټولنيزو موضوعاتو وېب، رېډيو او ټيلي ويژن ته رپورټونه جوړوي او په ځانګړو موضوعاتو ليکل هم کوي. د کراچۍ د اردو پوهنتون د جرنلزم د څانګې نه يي د ماسټر ډګري ترلاسه کړې ده.​

XS
SM
MD
LG