لاس رسیدونکی لینک

Breaking News

طالبان وايي که خليلزاد وغواړي په اسلام اباد کې ورسره ناستې ته اماده يُو


په قطر کې د طالبانو د سياسي دفتر وياند وايي، که زلمی خليلزاد وغواړي نو د طالبان اماده دی چې په اسلام اباد کې ورسره خبرو ته کښېني.

د طالبانو د قطر د سياسي دفتر وياند سهېل شاهين ويلي نن د شورو، چارشنبې په ورځ ناوخته د طالبانو پلاوي پاکستان ته ځي او تر شپږم اکتوبر پورې به هلته وي.

د راپورونو ترمخه د افغان سولې خبرو دپاره د امریکا ځانګړی استازی زلمی خليلزاد هم د اسلام اباد په سفر دی.

وايس اف امریکا سره په خبرو کې د طالبانو وياند سهېل شاهين وويل، "اتفاقا خليلزاد هم هلته دی زه په يقين سره نه شم ويلی چې د هغه د طالبانو د پلاوي سره خبرې وشي خو که هغه وغواړي تړون ته دې بيرته راشي نو دوي خو په خپله خبره ولاړ دي چې بيرته خبرو ته راشي".

شاهين زياته کړې د طالبانو د پلاوي د پاکستان د سفر کومه خاص ايجنډا نشته خو د کډوالو مسلې دي دوه اړخيزې خبرې دي او د امریکا د صدر ډانلډ ټرمپ د ټويټ وروسته د سولې د خبرو ځنډ او حالات دي او دا ټول هر څه په جامع ايجنډا کې شامل دي او دوي به د پاکستان د بهرنيو چارو د وزارت د لوړ پوړو چارواکو سره ويني.

نوموړي وويل د ملا برادر په مشرۍ د طالبانو ۱۲ کسيزه پلاوی د پاکستان سفر کوي.

سهېل شاهين وويل دا د وړاندې نه پلان شوی سفر دی او د دې سفر دپاره پاکستان دوي ته بلنه ورکړې وه.

په اسلام اباد کې زلمي خليلزاد سره د ناستې او خبرو په اړوند د طالبانو ویاند وويل دوي ګڼي چې جګړه د مسلې حل نه دی او دوي سوله ييزه حل غواړي.

هغه وويل په يو کال کې د دوي ترمنځ د خبرو نهه پړاؤنه شوي او دوي په اخره کې يو تړون ته هم رسېدلي وو که هغه وغواړي چې خبرې وشي او د دې وروسته به بېن الافغاني خبرې هم پېل شي.

"که هغه (خليلزاد) وغواړي خبرې ورسره کېدی شي".

اسلام اباد ته د امریکایي استازي زلمي خلیلزاد او طالبانو دا سفرونه په داسې حال کې کیږي چې امریکا ته د خپل اوسني سفر په مهال د پاکستان وزیراعظم ښاغلي عمران خان د زلمي خلیلزاد سره لیدلي وو او له هغه یې هیله کړې وه چې امریکا باید طالبانو سره د سولې ودرول شوې خبرې بیرته پیل کړي.

د پاکستان وزيراعظم عمران خان په دغه لیدنه کې ښاغلي خلیلزاد ته دا باور هم ورکړی ؤ چې پاکستان به له خپله انده افغانستان کې دسولې په عمل هر رقم مرسته وکړي.

XS
SM
MD
LG