پاکستان د ژورنالسټانو د تحفظ نړیوالې ادارې (کميټي ټو پروټېکټ ژورنالسټس، سي پي جی) د ايشیا مشر سټيون بټلر ملک ته نه پرېښودی او د لاهور د هوايي اډې څخه يې بيرته امریکا ته لېږلی دی.
سي پي جی ویلي د سټيون بټلر نوم د پاکستان د کورنيو چارو وزارت په تور نوملړ کې اچولی دی.
سي پي جی ويلي په لاهور ايئرپورټ چارواکو د بټلر نه پاسپورټ اخيستی او هغه يې بيرته د قطر په الوتکه کې دوحه ته لېږلی او چارواکو هلته د واشنګټن په الوتکه کې کښېنولی او بيرته یې امريکا ته لېږلی دی.
د سي پي جی مشر جويل سايمن ويلي، "د بټلر پاکستان ته نه پرېښودل په پاکستان کې د هغو خلکو په مخ د څپېړې ګوزار دی څوک چې په دغه هېواد کې د مطبوعاتو ازادۍ ته اندېښمن دي".
سايمن د "پاکستان د چارواکو نه د بټلر ملک ته نه پرېښودو په اړوند سپيناوی غوښتی او که پاکستان د مطبوعاتو ازادۍ ته ژمن وي د دې پېښې سوتره پلټنې دې وکړي".
په پاکستان کې ژورنالسټانو د بټلر ملک ته په نه راپرېښودو د چارواکو په دې عمل نيوکې کړي او دې ته يې د "نوي پاکستان" کړنې ويلي دي.
ژورنالسټ حامد مير په ټویټر دې عمل د هټلر رويه ويلي دي او په بل ټویټ کې يې ويلي،
"چا چې د سټيون بټلر پاکستان ته د نه راپرېښودو او بيرته امريکا ته د لېږلو امر کړی دا په حقيقت کې نړۍ ته ويل غواړي چې په پاکستان کې جمهوريت دوکه يا فراډ دی او هغه څوک چې د مطبوعاتو د ازادۍ خبره کوي هغه به د عمران خان په نوي پاکستان کې نه شي زغمل کېدی".
پاکستاني چارواکو د سټيون بټلر ملک ته د نه پرېښودو په اړوند د دې خبر خپرېدو پورې په رسمي ډول کوم بيان مخې ته نه دی راغلی.
بټلر پاکستان ته د بشري حقونو د ارواښادې فعالې او تکړه قانون پوهه عاصمه جهانګير په نوم په تابيا شوي کانفرنس کې ګډون له راتلو چې بیرته ستون کړی شوی دی.
