په پاکستان کې د وکيلانو ګډې کمېټۍ ويلي د تحریک انصاف د حکومت د پوځي مشر جنرل باجوه د مودې غځولو د پرېکړې پرضد به ۲۸م د تورې ورځې په توګه نمانځي او احتجاجا به کاربندیز کوي.
د وکيلانو د ګډې کمېټۍ مرستیال مشر سيد امجد شاه وايي د دوی کاربنديز د کوم شخصيت پرضد نه دی بلکې دوی ادارې پياړې کول غواړي.
وي او ای ډیوه سره په خبرو کې نوموړي وويل "کله چې د اګست په مياشت کې حکومت د پوځي مشر د مودې غځولو پرېکړه کړې وه هغه وخت د وکيلانو د منتخب تنظميونو ګډې کمېټۍ دغه پرېکړه غندلې وه ځکه وزیراعظم عمران خان په خپله ويلي ؤ چې که جګړه ولې نه وي د پوځي مشر موده دې ونه غځول شي".
هغه وويل د وکيلانو د تنظيمونو استازو په ګډه پرېکړه کړې چې "په کومه ورځ موده غځېده پېل کيږي هغه ورځ به دوی د تورې ورځې په توګه نمانځي".
امجد شاه وايي "دغه ډول د شخصياتو له امله ادارې کمزورې کيږي، د شخصيتونو ضرروت نه وي ادارې پياوړې کول پکار دي، ځکه د بار دا دريځ دي دا قوم او دا رياست به هغه وخت پیاوړی کيږي کله چې ادارې پياوړې وي او چې د کله پورې دا نظام داسې روان وي په مودو غځولو، نو دا نظام ورسره کمزوری کيږي".
هغه وويل د پوځي مشر يا د مشر قاضي سره یې اختلاف نشته دوی يواځې د ادارو خبره کوي چې د شخصيتونو په ځای دې ادارې پیاوړې کړی شي.
شاه زياته کړه په ۲۸ نومبر به په ټول پاکستان کې وکيلان احتجاجا عدالتونو ته نه ځي او د تورې ورځې نمانځلو په توګه به یې په لاسونو تورې پټۍ تړلې وي.
د پاکستان د سرکاري ميډيا ترمخه د پوځ د مشر جنرل قمر جاوېد باجوه د ماموريت د مودې غځولو امر د اګست په ۱۹ نېټه شوی ؤ.
د ځايي میډيا ترمخه دوه ورځې وړاندې د وزیراعظم عمران خان دفتر پخلی کړی ؤ چې د پوځي مشر جنرل قمر جاوېد باجوه د ماموريت د نورو درېو کالو مودې غځولو پرېکړه د اګست په مياشت کې شوې وه.
د وزيراعظم دفتر دغه خبر په داسې حال کې خپور کړی چې د پوځ مشر د وزیراعظم سره ليدلي وو.
عمران خان په کال ۲۰۱۲م کې د پاکستان يو ټيلي ويژن چېنل (سما) سره په مرکه کې ويلي ؤ چې "که هغه وزيراعظم وی د جنرل اشفاق پروېز کياني د ماموريت موده به يې نه غځوله".
عمران خان ويلي ؤ ځکه به يې د پوځي مشر ماموريت نه غځولو چې د هغه په وېنا "زه پياوړې ادارې غواړم زه په دې يقين کوم چې ملک افراد نه چلوي ادارې يې چلوي، زه به د دې ملک ادارې پیاوړې کوم چې د ادارې کوم قانون وي هغه به ټول مني".
د پاکستان پيپلز ګوند حکومت په کال ۲۰۱۰م کې د هغه وخت د پوځي مشر جنرل اشفاق پروېز کیاني د ماموریت موده د درې کالو دپاره غځولې وه.
امجد شاه وايي د تحریک انصاف حکومت چې د ججانو د ماموريت دپاره د عمر سېوا کولو په لړ کې د ائين د ۱۷۹ ماده کې د بدلون دپاره قانوني مسوده پارلیمان ته راوړې وه، وکیلانو هغه هم غندلې وه.
