دافغانستان ولسمشر ښاغلي اشرف غني د هوا له ګرمېدو سره د اوبو ارزښت او بیې لوړېدو ته په اشارې ویلي، له دې وروسته ګاونډیان زموږ له اوبو څخه وړیا ګټه نشي اخیستی او نه به هم د اوبو اوږدمهالي تړونونه وکړو.
دافغانستان دصدارتي ماڼۍ دبیان له مخې ولسمشر اشرف غني دجمعې په ورځ د ولسي جرګې دبیلابیلو کمېسیونونو مسوولینو او غړو سره کتنو کې ویلي سوله زموږ د هیوادوالو لویه غوښتنه او د حکومت مهم لومړیتوب او مسوولیت دی.
ښاغلي غني ویلي د سولې په اړه اجماع موجوده ده، مګر طالبان باید له پاکستان، نشه یي توکو، جرمي شبکو او بین المللي تروریستي سازمانونو سره په خپلو اړیکو کې د وضاحت ترمنځ د ولس پوښتنو او اندېښنو ته ځواب ووایي.
ولسسمشر په ټينګار سره وویل، له سراسري اوربند پرته سوله بې مانا ده. د سولې ټول ابعاد سنجول شوي، د برابرې شوې طرحې او پلان د تطبیق په موخه به اساسي بحث وشي.
په دغه لیدنه کې ولسمشر غني د پوهنې، لوړو زده کړو، ارشاد، حج او اوقاف وزارتونو کې د اصلاحاتو بهیر، د سولې پروسې او اوبو د مدیریت، د برېښنا د تولید، د ظرفیتونو د لوړولو، د کرنې او کانونو د انکشاف ، زېربنا او نورو برخو کې د حکومت راتلونکو پلانونو په اړه معلومات هم ورکړل.
هغه وویل د پوهنې سیستم د ارزونې او نویو اصلاحاتو په پایله کې د بنیادي تحولاتو ترڅنګ باید د وزارت له لوري د هیواد په کچه د ولایتونو ترمنځ د منابعو غیرعادلانه وېش له منځه لاړ شي.
هغه زیاته کړه، وزارت او ټوله دستګاه باید ښوونځي ته ځواب ویونکې وي، نه برعکس او په راتلونکي کې د شپږ زره ښوونځیو د ودانیو د جوړولو ترڅنګ به ښوونځي له نوري فایبر سره هم وتړل شي.
ولسمشر اشرف غني د اوبو ارزښت ته په اشارې وویل، اوبه ژوند ته مثبت بدلون ورکوي او د ولسي جرګې له لوري د اوبو د نوي تصویب شوي قانون له تطبیق سره به په دې برخه کې ښه پرمختګ رامنځته شي.
