لاس رسیدونکی لینک

Breaking News

پاکستان د اېف ای ټي اېف د شرطونو پوره کولو دپاره قوانين بدلوي


پاکستان فېصله کړې چې د ترهګرۍ د مالي مرستو او غېر قانوني پېسو د وړو راوړو د څار نړیوالې ادارې (اېف ای ټي اېف) د شرطونو پوره کولو دپاره به څو قوانين بدلوي.

د ډان ورځپاڼې ترمخه د پاکستان د وزيراعظم د ماليې د مشاور عبدالحفيظ شېخ په مشرۍ غونډه کې دغه پرېکړه شوې او ورځپاڼې د سرچينو له قوله ويلي چې د روان کال جون د میاشتې پورې به پاکستان د ترهګرۍ د مخنيوي، د ترهګر ګرځول شوؤ کسانو يا تنظيمونو ته د سزا ترڅنګ به په نورو قوانينو کې د نړیوال معیار ترمخه بدلون کولی شي.

ويل شوي د پاکستان برني اېوان سېنېټ د اېف ای ټي اېف د شرطونو پوره کولو په تړاؤ دوه قانوني مسودې هم منظورې کړي دي.

پاکستان تازه پرېکړه په داسې حال کې کړې چې پاکستان د اېف ای ټي اېف د خړنوملړ څخه ويستلو کې د امریکا نه مرسته غوښتې ده.

تېره مياشت د پاکستان په سفر د سويلي اسيا دپاره د امریکا د بهرنيو چارو مرستيالې اېلس وېلز ويلي ؤ، "پاکستان دې د ترهګرۍ د مالي مرستو او غېر قانوني پېسو د وړو راوړو د څار نړیوالې ادارې (اېف ای ټي اېف) او نړيوالې ورورولۍ سره کړې ژمنې پوره کړي".

هغې ويلي ؤ د پاکستان دغه هڅې ستایي چې د ترهګرۍ په اړوند د مالي مرستو د زمه وارو پوره کولو په لړ کې يې کړي دي.

خو د اېف ای ټي اېف د خړ نوملړ څخه د پاکستان د نوم ويستو په تړاو د امریکايي مرستو په اړوند وېلز ویلي د اېف ای ټي اېف غوښتنې تکنيکي دي او "امريکا د غېر قانونه پېسو لېږلو رالېږلو او ترهګرۍ د مالي مرستو د مخنيوي په لړ کې د پاکستان مرستې ته تياره ده".

هغې ويلي پاکستان دې په ملک دننه د ټولو تندلارو ډلو پرضد بې طرفه عملیات وکړي.

اېف ای ټي اېف د تېر کال اکتوبر په مياشت کې په پېرس کې غونډه کړې او په خپل رپوټ کې يې ويلي ؤ،

" اېف ای ټي اېف د پاکستان څخه په کلکه غوښتنه کوي چې د ۲۰۲۰م کال فرورۍ د میاشت پورې خپل پلان په ګړندۍ توګه مکمل کړي." ادارې ويلي ؤ، "که نه ، د راتلونکي غونډې پورې په دغه پلان باندې د پام وړ او دوامداره پرمختګ ونه شي ، اېف ای ټي اېف به اقدام وکړي."

د دې ترڅنګ اېف ای ټي اېف په اسلام اباد غږ کړی ؤ چې د ترهګرو د مالي سرچینو تړلو او د غېر قانونه پیسو د لېږدولو د مخنیوي لپاره دې نور ګامونه هم پورته کړي.

د پاکستان د بهرنيو چارو وزیر شاه محمود قرېشي ویلي پاکستان هيله لري چې امریکا به راتلونکې میاشت په فرورۍ کې په بيجنګ کې د اېف ای ټي اېف په غونډه کې د پاکستان ملاتړ وکړي.

قرېشي تېره مياشت د امریکا د سفر په مهال ويلي ؤ د اېف ای ټي اېف په تړاؤ د پاکستان دپاره د بيجنګ د فرورۍ غونډه مهمه ده ځکه چې د اپرېل په مياشت کې په پېرس کې په ټاکل شوې غونډه کې به د پاکستان د راتلونکې فېصله کیږي چې د اېف ای ټي اېف په نوملړ کې پاتې شي يا به ترې لرې کړی شي.

راپورونه وايي که پاکستان د اپرېل په مياشت کې د اېف ای ټي اېف د خړ نوملړ څخه لرې نه کړی شو بيا به تور نوملړ ته واچول شي.

XS
SM
MD
LG