لاس رسیدونکی لینک

Breaking News

سيند: د ډزو په پېښو کې د اسمبلۍ ښځينه ممبره او د ای اېن پي پخوانی مرکزي غړی وژل شوي


د پاکستان په سيند صوبه کې د ډزو په دوه پېښو کې د پيپلز ګوند سره تعلق لرونکې د اسمبلۍ يوه ښځينه غړې او د عوامي نيشنل ګوند پخوانی مرکزي غړی وژل شوي دي.

د سيند صوبې د نوشهره فيروز ضلعې پوليس مشر (اېس اېس پي) ډاکټر فاورق اعوان خبريالانو سره په خبرو کې ويلي، د سيند اسمبلۍ غړې شهناز انصاري د ځمکې په يوه شخړه کې وژل شوې ده.

د ځايي ميډيا ترمخه انصاري څو ډزه لګېدلې او روغتون ته د وړلو نه وړاندې يې ساه ورکړې ده.

پوليس ويلي د پېښې وروسته يې علاقه په ګېره کې اخيستې او څو مشکوک کسان يې هم نيولي دي.

د پيپلز ګوند مشر بلاول بټو زرداري د پېښې غندنه کړې او د پېښې د پلټنو غوښتنه يې کړې ده.

په سيند صوبه کې د پيپلز ګوند حکومت دی او وزیراعلی مرادعلي شاه پوليس ته لارښوونه کړې چې په سمدستي ډول د پېښې په اړه رپوټ وړاندې کړي.

شهناز انصاري د کال ۲۰۱۸م په عامو انتخاباتو کې د پيپلز ګوند د ښځو په خصوصي څوکۍ د سيند اسمبلۍ غړې جوړه کړی شوې وه.

د ډزو بله د کراچۍ ښار د بلديه ټاؤن د سعيداباد پوليس تاڼې په علاقه کې رامنځته شوې او د عوامي نیشنل ګوند د مرکزي کمېټۍ پخوانی غړی ظفرالله خان د نامالومه کسانو په ډزو وژل شوی دی، خان کاروباري شخصيت او د کراچۍ په کلفټن علاقه کې مېشته ؤ.

د سعيداباد پوليس تاڼې محرر شفيق وي او ای ډيوه سره په خبرو کې د پېښې په اړه ويلي په دوه موټر سايکلو سواره څلور کسان راغلي د خان نه يې موبايل اخيستی بيا يې پرې ډزې کړي او څلور ډزه يې ويشتی او وژل شوی دی.

شفيق زياته کړه ډزې کوونکې د موقعې څخه په تېښته کې بريالي شوي او دوی پلټنې پېل کړي دي.

د ظفر الله خان ورور سيد محمود افريدی چې د کراچۍ ټرانسپورټ اتحاديې عمومي سېکتر دی وايي، د خان سره یې زوی او بل ملګری هم په ګاډي کې ناست ؤ خو هغوی په پېښه کې روغ پاتې شوي دي.

وي او ای ډيوه سره په خبرو کې نوموړي وويل د دوی د چا سره دښمني نشته او پوليس ورته ویلي چې غلو په ظفرالله خان ډزې کړي او وژلی يې دی.

د عوامي نيشنل ګوند د سيند صوبې عمومي سېکتر يونس بونېری وايي، په کال ۲۰۱۴م کې د ظفر الله خوريی سېف الله خان چې د ای اېن پي د کراچۍ ښار د لویديځې ضلعې مشر ؤ هم په ډزو وژل شوی ؤ.

د عوامي نيشنل ګوند د سيند صوبې مشر شاهي سيد د ظفرالله خان د وژنې غندنه کړې او په پېښه کې د ککړو کسانو د نيولو غوښتنه يې کړې ده.

په کراچۍ ښار کې د کال ۲۰۱۳م راهسې د شرخوښو وران کارو، هدفي وژونکو، قلنګ اخيستونکو او په نورو جرمونو کې د ککړو پرضد د نيم پوځي ځواک رېنجرو او پوليس عمليات دوام لري.

چارواکي ادعا کوي چې په ښار کې امنيت په ځای کړی شوی خو په ښار کې بيا هم وخت په وخت د وژنو ترڅنګ د نورو جرمونو پېښې رامنځته کيږي.

  • 16x9 Image

    فضل عزیز

    فضل عزیز په کراچۍ ښار کې د ‌‌‌‌‌‌وي او ای ډيوه خبریال دی، د روزانه رپورټونه نه علاوه هغه په ځانګړي موضوعاتو لیکل هم کوي. هغه داردو پوهنتون نه په ژورنلزم کې د ماسټرۍ ‌‌‌‌‌‌ډګري اخستې ده.

XS
SM
MD
LG