لاس رسیدونکی لینک

Breaking News

تر شاهزاده چارلس وروسته د برتانیې وزیراعظم بوریس جانسن هم په کرونا وایرس اخته شو


واشنګټن ــــ د برتانیې تر شهزاده چارلس وروسته نن د دې هېواد وزیراعظم بوریس جانسن هم په کرونا وایرس اخته شوی دی.

ښاغلي جانسن ویلي په تېرو څلرویشت ګنټو کې یې د کرونا وایرس نخښې څه نه څه زیاتې شوې وې او د ټوخي تر څنګ یې تبه هم وه،‌ وایي کله چې یې د خپل ډاکټر په مشوره ټیسټ وکړ نو نتیجه یې مثبته راغله.

وزیراعظم جانسن وایي "ما اوس پخپله له خلکو ځان په کور کې ګوښه ساتلی، خو د ویډیو کانفرنس له لارې به د کرونا وایرس په ضد حکومتي چارې سمبالوم".

دوې ورځې وړاندې د برتانیې د ملکې الیزابیت زوی 71 کلن شهزاد چارلس ته هم کرونا وایرس ور پورې شوی خو د برتانیې شاهي کورنۍ وایي د هغه روغتیایي حالت ښه دی او په سکاټلېنډ کې یې ځان پخپل کور کې له خلکو بېل ساتلی.

د برتانیې وزیراعظم پر خپل ټویټر په خپره کړې ویډیو کې ویلي، چې که له کرونا وایرسه د ژغورنې پر احتیاطي تدابیرو بشپړ عمل وشي نو هېواد به یې ډېر ژر له دې ناروغۍ را ووځي. نوموړي د دې نړیوالې وبا په ضد د خپل هېواد ټول کارکوونکي ستایلي:

"د برتانیې د روغتیا له مرکزي‌ ادارې (این ایچ ایس)، پولیسو، د ټولنیزو چارو له فعالانو، استادانو، د ډي ډبلیو پي [د کار او پینشن ادارې] له کارکوونکو او د برتانیې له ټولو هغو 6 لکه کسانو چې په رضاکارانه توګه د کرونا وایرس د مخنیوي لپاره کار کوي له ټولو مننه کوم".

په برتانیا کې تر دې مهاله له کرونا وایرسه د اغېزمنو کسانو شمېر 11,816 ته رسېدلی او د مړیو شمېر یې 578 ته رسېدلی او تر اوسه یواځې 135 تنه ترې روغ شوي‌ دي.

XS
SM
MD
LG