لاس رسیدونکی لینک

Breaking News

عارف وزیر ژوند د لاسه ورکړو


د پښتون ژغورنې غورځنګ (پي ټي اېم) فعال عارف وزير په روغتون کې ژوند د لاسه ورکړو، د هغه د سر عمليات (اپرېشن) روان ؤ او په دغه مهال يې ساه ورکړه.

د پي ټي اېم ثنا اعجاز او عبدالله ننګیال بېټني وي او ای ډيوه سره په خبرو کې پخلی وکړو چې د عارف وزیر د سر عمليات د اسلام اباد په پمز روغتون کې روان ؤ او په دغه مهال هغه ژوند د لاسه ورکړو.

په عارف وزیر پرون د جمعې په ورځ د جنوبي وزیرستان په مرکز واڼه کې وسله وال بريد شوی او هغه پکې سخت ټپي شوی ؤ.

د ټپي کېدو سمدست وروسته د واڼه روغتون ته وړل شوی، بيا ډېره اسماعيل خان او بيا د شپې د ډېره اسماعيل خان نه د اسلام اباد پمز روغتون ته منتقل کړی شوی ؤ.

ثنا اعجاز وويل د پي ټي اېم مشران او ګڼ غړي په پمز روغتون کې دي د راتلونکې تګلارې په اړه به مشوره کوي.

عارف وزیر د پښتون ژغورنې غورځنګ د مخکښ او قامي اسمبلۍ غړي علي وزير د تره زوی ؤ.

علي وزير تېره شپه په يو پېغام کې په خپلو پلويانو غږ کړی ؤ چې هغه دې پرامنه پاتې شي.

هغه ويلي ؤ دوی قربانۍ ورکوي او ورکوي يې خو د خپل سوچ او فکر نه به په شا نه شي.

  • 16x9 Image

    فضل عزیز

    فضل عزيز په کراچۍ کې د وي او اې ډيوه خبريال دی په سياسي، تعليمي، صحت او کلتور سره په ټولنيزو موضوعاتو وېب، رېډيو او ټيلي ويژن ته رپورټونه جوړوي او په ځانګړو موضوعاتو ليکل هم کوي. د کراچۍ د اردو پوهنتون نه يې د جرنلزم او کراچۍ پوهنتون نه يې د نړيوالو اړيکو د ماسټرۍ ډګريانې ترلاسه کړي دي.​

XS
SM
MD
LG