لاس رسیدونکی لینک

Breaking News

په څو اوونيو کې به په پاکستان کې د کرونا وايرس دوايي جوړېدل پېل شي، ظفر مرزا


Zafar Mirza

د صحت په چارو کې د پاکستان د وزيراعظم مرستیال ډاکټر ظفر مرزا ویلي په پاکستان کې به په څو اوونيو کې د کرونا وايرس دوايي جوړېدل پېل شي.

د امریکا د دوایانو جوړؤنکې يوې کمپنۍ د کرونا وايرس د علاج دپاره کارېدونکې دوايۍ (رېمډيسوير) جوړولو په لړ کې د پاکستان او هند د پينځه کمپنيانو سره معاهده کړې ده.

راپورونه وايي امریکايي کمپنۍ ګيليډ چې د کوم کمپنيانو سره معاهده کړې د پاکستان (فېروز سنز) کمپني پکې شامل ده او ويل شوي دغه جوړېدونکې دوايي به د نړۍ ۱۲۷ هېوادونو ته لېږلی کيږي.

ظفر مرزا نن د جمعې په ورځ يوې خبري غونډې ته په وېنا کې د امریکايي کمپنۍ د پاکستاني کمپنۍ سره د معاهدې خبره کړې او ويلي يې دي د قاعدو د منظورۍ وروسته په اته اوونيو کې به د دې دوايۍ جوړېدل پېل شي.

مرزا ويلي پاکستانۍ کمپنۍ ته د دې دوايۍ جوړولو لائسنس مېلاؤ شوی او دوی به هڅه کوي چې د دې بيه کمه وي.

هغه وويل په امریکا کې د دغه دوايۍ کارولو سره په کرونا وايرس کې ۳۰ فيصده کمی راغلی دی.

د فېروز سنز مشر عثمان خالد وي او ای ته ویلي په بېړنيو بنیادونو د دوايۍ په جوړولو کار روان دی او امریکايي ادارې اېف ډي ای او د جاپان ادارو يې منظوري ورکړې ده.

هغه ويلي دا خبره کول به د وخت نه وړاندې وي چې د دوايي د جوړېدو وروسته په څومره وخت کې دا مارکيټونو ته راشي او د دې بيه به څومره وي خو د دوی کمپنۍ کولی شي چې په کال کې د ۴۰ ته ۵۰ لکو په شمېره کې دا دوايي جوړه کړي.

هغه زیاته کړې تراوسه چې څومره تجربې شوي دا دوايي د مرض پوره علاج نه دی خو په امریکا کې دا دوايي کارول شوې او ناروغان يې زر ښه کړي دي.

هغه ويلي د دې دوايۍ د کارولو د مړو شمېره هم راکمه شوې خو زياته کړې يې ده په دې اوس هم څيړنې روانې دي.

XS
SM
MD
LG