په کراچۍ کې د پاکستان ډېموکرېټک مومنټ يا جمهوري غورځنګ پي ډي اېم احتجاجي جلسې ته په وېنا کې د مسلم ليګ ن مشرې او د پخواني وزیراعظم نواز شريف لور مريم نواز وویل، نواز شریف په ګوجرانواله کې د پوځ پرضد خبره نه ده کړې، يو يا دوه تنه اداره نه وي د ادارو د بدنامولو سبب جوړیږي او ادارو ته زيان رسوي.
مريم نواز وايي" هر پوځي که سپاهي وي او که افسر دوی ورته سلام کوي خو که تاسو غواړئ چې د اولس ووټونه د بوټانو لاندې کوي چقوي يې، هغو ته به سلام وکړو نو دغه زمونږ نه، نه کيږي".
هغې زياته کړه "چې حکومتونه جوړوي غورځوي او ووټونه بوټانو لاندې کوي، هغه د دوی اتل نه شي کېدی هغه دوی نه شي منلی".
مريم نواز دغه خبره په داسې حال کې کړې چې په 16م اکتوبر په ګوجرانواله ښار کې د پي ډي اېم جلسې ته په وېنا کې نواز شریف د پاکستان د پوځ د مشر جنرل قمر جاوېد نه پوښتنې کړې او د هغه سره یې د استخباراتي ادارې ايي اېس ايي په مشر تورونه لګولي وو.
وروسته وزيراعظم عمران خان د نواز شریف په ځواب کې ویلي ؤ چې د پوځ د مشر پرضد وېنا کول په پوځ بريد دی او عدالتونو او د احتساب ادارې ته یې زر تر زره د مقدمو د فېصلو کولو ويلي ؤ.
عمران خان ویلي ؤ، چې د اسمبلۍ بنديوانو غړو ته نور اجازه ـ يا پروډکشن ارډر نه ورکوي چې د اسمبلۍ په غونډه کې ګډون وکړي.
د کراچۍ د پي ډي اېم جلسې ته په وېنا کې د پاکستان پيپلز ګوند مشر بلاول بټو زرداري د پاکستان تحریک انصاف په حکومت او وزیراعظم عمران خان سخت ټکونه وکړه او وې يې ویل، دوی په ملک کې حقيقي جمهوريت غواړي او د جمهوريت او اولس د حقونو او ظلم پرضد يې دغه غورځنګ پېل کړی دی.
هغه وويل دغه غورځنګ په ملک کې د هرې شعبې سره تعلق لرونکي دپاره دی او په ملک کې چې ټولې ادارې سره د ميډيا د فشار لاندې ساتل کيږي دوی به یې ترې خلاصوي.
د پي ډي اېم مشر مولانا فضل الرحمان وويل، "دوی مېدان ته راوتلي دي او مجبورلی شي چې په ټګۍ جوړ حکومت پرې ومنلی شي او د دغه کار دپاره ويرول شو، لالچ ورته ورکړی شو، خو ټول پړاؤنه تېر شو او دوی ته دغه ګوډاګی حکومت نه دی قبول.
مولانا فضل الرحمان وويل دوی راوتلي او د دغه حکومت نه به ځان خلاصوي.
د پښتونخوا ملي عوامي ګوند مشر محمود خان اڅکزي هم وويل،"چا چې عمران راوستلی هغوی د دې ملک د تباهۍ زمه وار دي".
په کراچۍ کې د پي ډي اېم جلسې ته د عوامي نيشنل ګوند امير حېدر خان هوتي، محسن داوړ او د نورو ګوندونو مشرانو هم وېناوې وکړې.
پي ډي اېم وايي دغه ټاکل شوی [سلېکټډ] حکومت به لرې کوي او دا عمل به په سياسي جمهوري لار ترسره کوي.
خو حکومت د پي ډي اېم جوړېدو ته په ځواب کې وايي چې مخالفه ګوندونه د خپلو مشرانو د بډو رشوتونو د پټولو دپاره په حکومت فشار اچوي او د دغه کار دپاره يې پي ډي اېم جوړ کړی دی.
