د پاکستان پوځ ویلي، د کراچۍ په پېښه کې ککړ د رېنجرز ځواک او استخباراتي ادارې ايي اېس ايي چارواکي د چوکو څخه لرې کړی شوي دي.
ايي اېس پي ار ويلي، د 18م اکتوبر د کراچۍ د پېښې په ترڅ کې د سيند صوبې د پوليس مشر په شکايت د پوځ مشر په امر پلټنې پوره کړی شوي او ويل شوي د قايداعظم د مزا د سپکاوي په پېښه په رېنجرز او ايي اېس ايي سخت اولسي فشار ؤ چې ګامونه واخلي.
پوځي بيان
پوځ ویلي په ياده پېښه کې دغو افسرانو د اولسي فشار او حالاتو ته په کتو د جذباتو څرګندونه کړې او په خپله يې ګام يې پورته کړی ځکه چې دوی ته د سيند پولیس عمليات په قلاره يا سم نه ښکارېدل.
په پوځي بيان کې ویل شوي چې د رېنجرز او ايي اېس ايي افسرانو په مناسبه طريقه دا ګام پورته کولی شو که د پوهې نه يې کار اخستی وی نو دا پېښه به نه رامنځته کېده او د دوه ادارو ترمنځ به بدګمانۍ نه جوړېدې.
ویل شوي په دغه اړه به نور عملیات په پوځي مرکز [جي اېچ کيو] کې اخستلی شي او دغه چارواکي د خپلو چوکو څخه لرې کړی شوي دي. خو په بيان کې د چارواکو په اړه نور جزیات نه دي ورکړی شوي.
په 18 اکتوبر څه شوي ؤ؟
په 19م اکتوبرد ګل/ دوشنبې په سهار د پاکستان مسلم ليګ ن مرستیالې مشرې او د پخواني وزیراعظم نواز شريف لور مريم نواز په کراچۍ کې ویلي ؤ هغه او مېړه يې (ر) کېپټن صفدر د هوټل په کوټه/ کمره کې اووده ؤ سهار وختي پوليس راغلي د هغو د کوټې دروازه يې ماته کړې او صفدر يې د ځان سره بوتللی ؤ.
مريم نواز په 18م اکتوبر په کراچۍ کې د پي ډي اېم جلسې له د مېړه سره کراچۍ ته تللې او بيا د قايداعظم مزار ته سره د ګوند د پلويانو دوی ورغلي او صفدر د قايداعظم په مزار کې [ ووټ له عزت ورکړئ] نعرې وهلې وې. وروسته د مريم او صفدر سره د 200 کسانو پرضد مقدمه درج شوې چې د قايداعظم د مزار سپکاوی يې کړی دی.
(ر) کېپټن صفدر چا نيولی ؤ؟
د صفدر د نیولو وروسته د مریم نواز ویاند د سيند صوبې پخواني ګورنر محمد زبېر ویلي ؤ د صوبې وزیراعلی مراد علي شاه ورته ویلي چې د شپې په مهال کسان ورغلي د صوبې د پوليس مشر ايي جي يې د نيم پوځي ځواک رېنجر د افسر (سېکټر کمانډر) دفتر ته بوتللی د صفدر د نيولو امر يې پرې لاسليک کړی او بيا يې پوليس ورليږلي چې اوس هغه ونيسي، او پوليس مشر يې د څو ساعتونو پورې د ځان سره کښېنولی ؤ.
هغه ویلي ؤ دغه کار رېنجرز ځواک او پوځ کړی ؤ.
د پاکستان تحریک انصاف د حکومت د اطلاعاتو وزير شبلي فراز هغه وخت ویلي ؤ د قايداعظم د مزار سپکاوی شوی او که هر څوک ؤ هغه به نيول کېدو.
د سيند صوبې د پوليس غبرګون
د يادې پېښې وروسته د سيند صوبې پوليس مشر (ايي جي) مشتاق مهر په رخصتۍ د تلو ویلي ؤ او له دغې وروسته يو شمېر پوليس افسرانو هم په رخصتۍ د تلو خواستونه کړي دي.
د سيند پوليس ویلي ؤ په 18/ 19 اکتوبر چې کومه پېښه شوې د سيند پوليس دغه عمل دردولي او د خفګان سبب یې ګرځېدلې ده.
د پوځ د مشر جنرل باجوه د پلټنو امر
وروسته بيا د پاکستان پيپلز ګوند مشر بلاول بټو زرداري د پوځ د مشر جنرل قمر جاوېد باجوه او د استخباراتي ادارې د ايي اېس ايي د مشر جنرل فېض حميد نه غوښتنه کړې چې د خپلې ادارې پلټنې وکړي چې څنګه د صوبې په کارونو کې لاسوهنه کوي، او هغه خلک مالوم کړي چې د شپې په دوه بجې يې د سيند صوبې د پوليس مشر د کوره راتاؤ شوي وو.
د پوځ مشر بيا د کراچۍ کور کمانډر ته د پېښې د پلټنو لار ښوونه کړې وه او رپورټ يې ترې غوښتی ؤ. ویل شوي ؤ دغه رپورټ به په لسو ورځو کې وړاندې کړی شي خو ياد رپورټ په اړه پوځ نن په 10 نومبر بيان خپور کړو.
