په کراچۍ کې د پښتون ژغورنې غورځنګ [پي ټي اېم] بل مشر محمد شېر خان مسید پولیسو نیولی دی، پوليس وايي هغه هم د کراچۍ د پي ټي اېم د شپږم دسمبر د جلسې په مقدمه کې نيول شوی دی.
د پي ټي اېم د کراچۍ د کور کمېټۍ غړي محمد الله وي او ای ډیوه سره په خبرو کې هغه وويل، تېره شپه نزدې 11 بجې پوليسو د محمد شېر مسيد په کور چاپه اچولې او نيولي يې دي.
پوليس افسر انسپکټر محبوب الهي چې د پي ټي اېم د شپږم دسمبر د جلسې په مقدمه کې د نیول شوؤ علي وزير، نور الله ترين او نورو نه پلټنې کوي، د محمد شېر مسيد د نيولو تاييد کوي.
محمد الله وايي په بل چا نه دي خبر خو ګڼي چې نورې ګرفتاريانې به هم وشي.
د شپږم دسمبر د کراچۍ د پي ټي اېم د جلسې په جوړه مقدمه کې له وړاندې نه د پي ټي اېم مخکښ او د قامي اسمبلۍ غړی علي وزير په پېښور کې نيول شوی او پوليسو بيا کراچې ته راوستی ؤ.
د علي وزیر د ګرفتارۍ پرضد چې پي ټي اېم احتجاجي مظاهرې کولې په کراچۍ کې د مظاهرې په وخت نور الله ترين او وروسته بيا نور درې کسان نيول شوي وو.
علي وزير او نورالله ترين سره د درېو نورو ملګرو په 19 دسمبر عدالت ته وړاندې کړی شوي، او عدالت بيا د 30م دسمبر پورې په ريمانډ پوليس ته حواله کړي دي.
د کراچۍ د سهراب ګوټ تاڼې د پوليس په جوړه مقدمه کې د منظورپشتین، علي وزير، محسن داوړ، نور الله ترين او محمد شېر محسود سره د ګڼو کسانو نومونه ليکل شوي او ويل شوی چې په دغه جلسه کې د 1800 نه تر 2000 پورې کسانو ګډون کړی او پرضد يې مقدمه درج شوې ده.
د مقدمې ترمخه د جلسې ګډون والو ته وېنا کوونکو د رياستي ادارو، د پاکستان د پوځ، پوليس او رېنجرز پرضد د سپکاوي د شر نه ډکه او ناوړه ژبه کارولې ده، ځکه د دوی پرضد د تعزيرات پاکستان د مادو 34، 188، 505 –(2)، 153-A، 120-B لاندې مقدمه درج شوې ده.
