لاس رسیدونکی لینک

Breaking News

بیل ګېټس او میلینډا تر 27 کلنې ملګرتیا وروسته سره بېل شول


واشنګټن ـــ د مایکرو سافټ کمپنۍ بنسټ‌ ایښودونکی بیل ګېټس او د هغه مېرمن او د خیرښېګړې په کارونو کې ملګرې میلینډا د ژوند 27 کلونه یو ځای تېر کړل او پرون له یو بله بېل شول.

دوی دواړو په یوه ګډ بیان کې لیکلي، چې د ژوند د ملګرو په توګه یې درې ځیرک اولادونه لوی کړي دي:

"موږ پر خپله ملګرتیا تر ډېر فکر او کار وروسته پرېکړه وکړه چې نور خپل ګډ ژوند پای ته ورسوو. موږ به د خپل فاونډېشن لپاره ګډ کار بیا هم کوو، خو باور نه کوو چې نور د ژوند د ملګرو په توګه یو ځای و اوسو".

په نړۍ کې دغه تر ټولو شتمه جوړۍ چې د دواړو سرمایه 130 اربه ډالره اټکل شوې ده، د خپل خیریه فاونډېشن له لارې یې په نړۍ کې په اربونو ډالره د خیرښېګړې په کارونو لګولې دي.

د ګل- دوشنبې په ورځ د طلاق په اعلان کې دواړو لیکلي، دوی به د بیل او میلینډا ګېټس فاونډېشن له لارې خپلو خیریه کارونو ته دوام ورکوي، چې د روغتیا، صنفي برابرۍ، تعلیم او نورو برخو لپاره کار کوي.

بیل او میلینډا ګېټس فاونډېشن د نړۍ د نورو هېوادونو تر څنګ له افغانستان او پاکستان سره هم له ډېرو کلونو راهیسې د پولیو ناروغۍ د مخنیوي لپاره مرستې کوي.

د یادونې وړ ده چې دوه کاله وړاندې په 2019م کال کې د ټیکنالوجۍ د مشهورې نړیوالې کمپنۍ امازان مشر جیف بیزوز او د هغه مېرمنې مېککینزي هم تر 25 کلنې ملګرتیا وروسته له یو بله طلاق اخیستی وو.

XS
SM
MD
LG