لاس رسیدونکی لینک

Breaking News

پاکستان: د جرنلېسټانو د ساتنې او په زوره د بې درکۍ جرم ګرځولو قانوني مسودې منظور کړی شوي


د پاکستان د بشري حقونو مرکزي وزيرې شيرين مزارې ویلي، د کابينې د قانون سازۍ کمېټۍ د جرنلېسټانو د ساتنې او په زوره د بې درکه کولو عمل جرم ګرځولو قانوني مسودې منظور کړي دي.

مزاري په څلورمه مې په ټويټر ویلي،

"نن د کابينې د قانون سازۍ په اړوند ماملاتو هوارولو دپاره جوړې کمېټۍ (سي سي اېل سي) دوه مهمې قانوني مسودې منظور کړې چې پکې يوه د جرنلېسټانو د ساتنې يا خونديتوب او بله په زوره د بې درکۍ عمل جرم ګرځول شامل دي".

هغې ویلي دا د پاکستان تحريک انصاف د حکومت د بشري حقونو پياوړي کولو لور ته مهم ګامونه دي او "د کابينې د منظورۍ وروسته به دا قانوني مسودې د قامي اسمبلۍ غونډې ته وړاندې کوي".

شيرين مزاري د دغو قانوني مسودو د منظورۍ خبره په داسې حال کې کړې چې درې ورځې وړاندې په پاکستان کې د بشري حقونو کمېشن په ملک کې خپل کالني رپورټ جاري کړی او د نورو موضوعاتو سره پکې د جرنلېسټانو د مشکلاتو او په زوره د بۍ درکه کولو په عمل اندېښنه څرګنده کړی شوې ده.

د بشري حقونو کمېشن د کال 2020 په رپورټ کې ویلي، په ملک کې پرله پسې په درېم کال د ازادي اظهار رايې په اړه بندېزونه سېوا شوي دي.

ويل شوي چې د جرنلېسټ مطيع الله د تښتولو/ اغوا کولو نه واخله تر د جنګ ګروپ د مالک میرشکيل الرحمان د نيولو پورې، دا څرګندوي چې مطبوعاتي ګروپونه د يوې خاص بيانیې خپلولو دپاره مجبورولی شي.

د بشري حقونو کمېشن ویلي چې موجوده حکومت په کال 2018 کې د خپلو کړو وعدو باوجود په زوره د بې درکه کولو عمل جرم ګوځولو دپاره یوه قانوني مسوده منظوره نه کړی شوه.

په زوره د بې درکيانو په اړه د پلټنيز کمېشن د اول نه تراوسه پورې په بې درکه شوو کسانو کې تر ټولو زيات کسان په خېبرپښتونخوا کې بې درکه دي.

ويل شوي د دسمبر 2020 د اخرې پورې په صوبه کې د بې درکه کسانو په اړوند د درج مقدمو ټوله شمېره 2492 وه.

د بشري حقونو کمېشن ویلي د پلټنيز کمېشن خپره کړې شمېرې کره نه وي، رپورټونه وايي چې ټول کال خلک اوچتول کيږي او خوشي کول کيږي او اغېزمنه کورنۍ بيا د انتقامی عملیاتو له ويري مقدمې هم نه شي کولی.

د امریکا د بهرنيو چارو وزارت د اپرېل په مياشت کې په نړۍ کې د کال 2020 د بشري حقونو په اړه په خپل رپورټ کې د پاکستان پوځ، جاسوسي او د نورو امنیتي ادارو لخوا د بشري حقونو په سرغړونو اندېښنې ښودلې وې.

د پاکستان حکومت تل دغه ډول رپورټونه رد کړي او دعوه کوي چې په ملک کې د بشري حقونو خوندي ساتلو هڅې کوي او نوي قوانين جوړوي.

د اپرېل په وروستيو کې د امریکا د بهرنيو چارو وزیر انتوني بلینکن ویلي وو په پاکستان کې په میډیا قدعنونه د اظهار د ازادۍ لپاره خطرناک دي.

بلينکن د صحافتي ازادۍ د نړیوالې ورځ په مناسبت انلاین غونډه کې په پاکستان کې پر مېډیا د لګول شوو څرګندو قدعنونو په حقله وینا کې دغه خبره کړې وه.

د امریکا خارجه وزیر زیاته کړه مونږ د بشري حقونو په اړه راپورونو او د میډیا د لارې کتلي چې په پاکستان کې صحافیان او د هغوی کورنۍ اکثره د امنیتي ادارو، سیاسي ګوندونو، وسله والو او د نورو ډلو له خوا ځورول کیږي او ورته دهړکې ورکول کیږي.

په پاکستان کې فریډم نیټ ورک ګروپ پخپل کالني رپوټ کې ویلي، په پاکستان کې د کال 2020 مې له میاشتې نه تر اپریل 2021 پورې په میډیا او صحافیانو پورې تړلې 148 پیښې د حملو او سرغړونو رپوټ شوې دي.

په دغو کې 6 صحافیان وژل شوي او د صحافتي ذمه واریو پوره کولو په وخت د 7 صحافیانو د تښتولو ناکامه هڅې شوې، 5 صحافیان تښتول شوي، 25 نیول شوي، 15 ځورول شوي او د 27 پرضد مقدمې جوړې کړل شوي.

  • 16x9 Image

    فضل عزیز

    فضل عزيز په کراچۍ کې د وي او اې ډيوه خبريال دی په سياسي، تعليمي، صحت او کلتور سره په ټولنيزو موضوعاتو وېب، رېډيو او ټيلي ويژن ته رپورټونه جوړوي او په ځانګړو موضوعاتو ليکل هم کوي. د کراچۍ د اردو پوهنتون نه يې د جرنلزم او کراچۍ پوهنتون نه يې د نړيوالو اړيکو د ماسټرۍ ډګريانې ترلاسه کړي دي.​

XS
SM
MD
LG