د پاکستان په بلوچستان صوبه کې په يوه چاودنه دوه کسان وژل شوي او درې د اېف سي ځواک سرتيري پکې ژوبل شوي دي.
د سرکاري ميډيا ترمخه دغه چاودنه د اتوار/يکشنبې په ورځ (31 اکتوبر) په پنجګور بازار کې شوې ده.
پوليس چارواکو ويلي، چاودېدونکي مواد په سړک دپاسه په ودرول شوي موټر سايکل کې په ځای کړی شوي او د اېف سي ځواک ګاډی پکې په هدف کړی شوی دی.
چارواکو ويلي په چاودنه کې دوه لاروي وژل شوي او د اېف سي ځواک درې سرتيري ټپيان شوي دي.
په سمدستي ډول د بريد زمه واري چا نه ده منلې.
د بلوچستان صوبې وزيراعلا عبدالقدوس بزنجو چاودنه غندلې او ویلي يې دي ترهګر د دښمن د مخالفه هيوادونو په ايجنډا لګيا دي په ملک کې بدامني جوړوي.
په وروستيو میاشتوکې د بلوچستان په بېلابيلوبرخو او د خېبرپښتونخوا په ځانګړي ډول قبایلي ضلعو کې د بدامنۍ پېښې سېوا شوي دي.
خو ورسره په بلوچستان صوبه کې بيا سي ټي ډي پوليس وخت په وخت دعوې کوي چې د بېلتون خوښو ډلو سره تړاو لرونکي ترهګر او د داعش وسله وال يې وژلي دي.
