لاس رسیدونکی لینک

Breaking News

دسکرو کانونو کې دبشري حقونو په سرغړونو ایچ ار سي پي اندېښنه ښودلې


د پاکستان د بشري حقونو کمېشن د بلوچستان د سکرو په کانونو کې د بشري حقونو د سرغړونو په اړه خپله ژوره اندېښنه څرګنده کړې ده.

په کوټه پریس کلب کې دبشري حقونو د تنظیم دبلوچستان مشر حبیب طاهر ایډوکېټ یوې خبري غونډې ته په وینا کې وویل چې دپاکستان دبشري حقونو کمېشن (ایچ ار سی پی) د حقایقو د موندنې ډله په دې اړه سخته اندیښمنه ده چې د سکرو کان کیندونکي د بشري حقونو د سختو سرغړونو سره مخ دي.

هغه د پاکستان سنټرل لېبر فیډرېشن د کانونو د کارګرانو د مرکزي اتحاد درپورټ په حوالې ورکولو سره ویلي په ۲۰۲۱ کال کې د کانونو په پیښو کې لږ تر لږه ۱۷۶ کان کیندونکي مړه شوي او ۱۸۰ نور ټپیان شوي دي.

هغه زیاته کړه، په بلوچستان کې کان کیندونکي د وسلوالو له خوا د هدفي بریدونو له اضافي خطر سره هم مخامخ دي.

نوموړي وویل دماینونو د نمونې پراساس چې ټیم یې لیدنه کړې، د دوئ روغتیا ته هم پاملرنه نه ده شوې.

" د سکرو د هر کان مالک باید دکان مخې ته ایمبولانس او بیړني روغتیایی کارکوونکي ولري"

هغه زیاته کړه چې"صوبه کې له 6,000 څخه زیاتو کانونو کې یوازې 27 کانونو کې د روغتیا اسانتیاوې شتون لري او څرګنده شوې ده چې ډیر کارګران د EOBI یا دټولنیز خوندیتوب پروګرامونو سره راجسټرډ شوي نه دي.

دحبیب طاهر ایډوکېټ په وینا "دکانونو په پېښو کې د مړینې او ټپي کیدو معاوضه په نورو صوبو کې پینځه لکه خو په بلوچستان کې درې لکه روپۍ ده،دا باید په چټکۍ سره اصلاح شي"

دبشری حقوقو سازمان وویل د کارګرانو اتحادیې د سکرو دټېکداری نظام څخه ډیرې ناخوښه دي.

دبشري حقونو سازمان دا سپارښتنه هم وکړه چې حکومت دې دسکرو کان کیندنې څانګې ته دیو صنعت درجه ورکړي او د کانونو مالکان او ټیکداران دې د1923 دقانون او وروسته د بدلون سره سم باید ژر تر ژره د کانونو د خوندیتوب او روغتیا په اړه د مزدورانو د نړیوال سازمان د176 کنونشن پریکړې عملي کړي.

په دې وروستیو کې دبلوچستان حکومت ویلي چې دوئ د صوبې دمعدنیاتو له پاره نوی قانون منظور کړی دی چې د عملي کېدو سره به یې د کان کیندونکو ستونزې هوارې شي .

XS
SM
MD
LG