د پاکستان د بلوچستان صوبې حکومت د پښتون ژغورنې غورځنګ (پي ټي اېم) په مشر منظور پشتين، علي وزیر او محسن داوړ سره په نورو صوبې ته په داخلېدو د 90 ورځو بندېز لګولی دی.
دغه اعلاميه چې په ټولنيزو رسنیو خپره شوې، د بلوچستان د کورنيو او قبايلي چارو محکمې په 11 نومبر نېټه خپره کړې ده.
وي او اې ډیوه د بلوچستان صوبايي حکومتي چارواکو سره د دغه اعلاميې په اړه د رابطې هڅه کړې، خو ځواب ورته نه دی شوی، خو حکومتي سرچينې اعلامیه تاييدوي.
په اعلاميه کې ويل شوي، د امن عامه د ساتنې د 1960 د ارډيننس لاندې په منظور پشتين، محسن داوړ، علي وزیر، سېد عالم مسيد، عبدالله ننګيال او ثنا اعجاز چې دوی د پښتون ژغورنې غورځنګ مشران دي، د 11 نومبر 2021 څخه د اتمې جنورۍ 2022 پورې د صوبې يوې ضلعې ته نه شي داخلېدی.
د پي ټي اېم مشر منظور پشتين په ټويټر دغه اعلاميې ته ويلي، "د بلوچستان حکومت راباندې يو ځل بيا صوبې ته په ورتګ بندېز لګولی دی. د برتانيې کالونيل رياست به هم دغه شان کول. پي ټي اېم د امن غوښتنه کوي. هغه څوک چې امن ته ترې خطره ده پرانستي ګرځي. دا ډول جرمي چلند بايد ودرول شي".
د بلوچستان صوبايي حکومت دغه اعلاميه په داسې وخت کې خپره کړې چې په اتم نومبر منظور پشتين اعلان کړی وو چې د پي ټي اېم د بندي غړو د خوشي کولو دپاره په 14 نومبر په پېښور، کوټه او کراچۍ کې د احتجاجي مظاهرو او بيا په 26 نومبر په کوټه، په پينځم دسمبر ټانک خېبرپښتونخوا او په 19 دسمبر به په کراچۍ کې جلسې کوی.
وروسته په 14 نومبر پشتين د پېښور پرېس کلب مخې ته احتجاجي مظاهرې ته په وېنا کې ويلي وو، په 26 دسمبر به پي ټي اېم د سيند اسمبلۍ مخې ته احتجاجي پرلت وهي او که په لسو ورځو کې د پي ټي اېم قېديان خوشي نه شو نو بيا د کراچۍ نه تر کوټې پورې، او د هغه ځای نه به په ټوله پښتنه سيمه بټګرام او مانسهره به راتاويږو او اسلام اباد ته به لاريون کوي.
په منظور پشتين د کال 2018 په وروستيو او په کال 2019 کې هم بلوچستان صوبې ته په ورتګ بندېز لګول شوی وو.
