لاس رسیدونکی لینک

تازه خبر

د علي وزیر په درېیمه مقدمه کې هم ضمانت منظور شو


د جنوبي وزيرستان نه د قومي اسمبلۍ غړي او پښتون ژغورنې غورځنګ مخکښ علي وزير په درېمه مقدمه کې ضمانت منظور کړی شو، په څلورمه مقدمه کې يې د ضمانت په خواست اورېدنه روانه ده په 19م جولايۍ به يې اورېدنه کيږي، نوموړي ته له دې وړاندې د پاکستان سپريم کورټ او د سيند هايکورټ په دوه مقدمو کې ضمانتونه ورکړي دي.

د علي وزير وکیل قادر خان اېډوکېټ نن د جمعې په ورځ [15 جولايۍ] وي او اې ډيوه ته وويل، د ترهګرۍ ضد 15م نمبر عدالت د علي وزير ضمانت د پينځه لکه روپو په مچلکې سره منظور کړو.

هغه وويل د علي وزیر پرضد څلورمه مقدمه د ترهګرۍ ضد 12م نمبر عدالت کې روانه ده په 19م جولايۍ به یې د ضمانت په خواست اورېدنه کيږي.

هغه زياته کړه هيله ده عدالت په راتلونکې نېټه په دغه مقدمه کې هم د ضمانت په خواست فېصله واوروي.

علي وزير ته چې نن په کومه مقدمه کې ضمانت ورکړی شوی په دې مقدمه کې د علي وزير د ضمانت په خواست د کراچۍ د ترهګرۍ ضد دوېم نمبر عدالت په دوېم جون فېصله محفوظ کړې وه او په 23 جون يې د فېصلې اورولو ویلي وو، خو په ياده نېټه دا فېصله نه وه اورول شوې او بيا يې د 28 جون نېټه پکې ورکړی شوې وه، خو بيا دغه مقدمه د ترهګرۍ ضد 15م نمبر عدالت ته منتقل کړی شوې وه.

د علي وزیر او د پي ټي اېم د مشرانو پرضد دغه مقدمه په کال 2019 کې د کراچۍ د سهراب ګوټ په تاڼه کې درج شوې وه.

د روان کال د فرورۍ په میاشت کې په ياده مقدمه کې د کراچۍ د ترهګرۍ ضد دوېم نمبر عدالت د علي وزيرد ګرفتارولو حکم کړی وو.

علي وزير ته له دې وړاندې د پاکستان سپريم کورټ او سيند هايکورټ په دوه مقدمو کې ضمانتونه ورکړي وو.

په کراچۍ کې د علي وزير پرضد جوړې مقدمې

د 2018 مقدمه

علي وزیر ته چې سيند هايکورټ په کومه مقدمه کې ضمانت ورکړی، دغه مقدمه په کال 2018 کې د علي وزير او هغه سره د نورو کسانو پرضد د کراچۍ په شاه لطيف ټاون تاڼه کې هغه وخت جوړه شوې چې دوی د پي ټي اېم د جلسې دپاره کمپاين کولو.

په دې مقدمه کې په علي وزير فرد جرم لګول شوی، او د کراچۍ د ترهګرۍ ضد لسم نمبر عدالت پکې په 15 فرورۍ د هغه د ضمانت خواست رد کړی وو.

د 2020 مقدمه

علي وزیر په لومړي ځل د کال 2020 د دسمبر د مياشتې راهسې د پي ټي اېم د مشرانو پرضد جوړه مقدمه کې د کراچۍ په مرکزي زندان کې بندي کړی شوی وو، په کومه مقدمه کې چې سپريم کورټ د تير کال د نومبر په 30 د هغه ضمانت منظور کړی وو.

دغه مقدمه چې په کراچۍ کې د پي ټي اېم د شپږم دسمبر 2020 د جلسې وروسته درج شوې، په ياده مقدمه کې تور لګولی شوی چې جلسې ته وېنا کوونکو د رياست او رياستي ادارو پرضد د کرکې او شر ډکې وېناګانې کړې وې.

د علي وزیر پرضد چې د کال 2020 مقدمه په عدالت کې روانه وه، د دغه مقدمې د اورېدنې په مهال د کال 2018 په مقدمه کې د هغه ګرفتاري تېر کال د جون په مياشت کې ښودل شوې او د کراچۍ د ترهګرۍ ضد په لسم نمبر عدالت کې پرې بيا دغه مقدمه روانه وه.

د 2019 مقدمه

او د کال 2018 د مقدمې د اورېدنې په مهال د هغه په بله مقدمه کې ګرفتاري ښکاره کړی شوې وه، دغه بله مقدمه د پي ټي اېم د مشرانو پرضد په کال 2019 کې د سهراب ګوټ په تاڼه کې درج شوې وه.

په ياده مقدمه کې د پي ټي اېم يو فعال عالمزېب مسيد نيول شوی او بيا د کراچۍ د ترهګرۍ ضد عدالت د عالمزېب مسيد د ضمانت خواست رد کړی او په 16 ستمبر 2019 سپريم کورټ د هغه ضمانت منظور کړی وو، نن په دغه مقدمه کې عدالت د علي وزیر ضمانت منظور کړو.

د 2018 بله مقدمه

د علي وزير پرضد چې اوس کومه مقدمه روانه ده او په 19 جولايۍ يې د ضمانت په خواست د ترهګرۍ ضد 12نمبر عدالت کې اورېدنه کیږي، دا مقدمه هم د کال 2018 د مې په مياشت کې د کراچۍ د بوټ بېسن په تاڼه کې درج کړی شوې وه.

ياده مقدمه د پي ټي اېم د کراچۍ د کال 2018 د جلسې دپاره د روان کمپاين په مهال جوړه کړی شوې وه، او د پي ټي اېم د يو پروګرام حواله پکې ورکړی شوې چې علي وزیر ورته په وېنا کې د رياست پرضد خبرې کړې وې.

دا مقدمه د تېر میاشتې جون په لومړو کې راښکاره کړی شوې وه.

د علي وزیر دپاره د پي ټي اېم پرلت

د علي وزير د خوشي کولو دپاره پي ټي اېم د روان کال د فرورۍ د 13 نه تر اتم مارچ پورې د سيند اسمبلۍ مخې ته احتجاجي پرلت کړی وو، دغه پرلت وروسته له هغې د يوې مياشتې دپاره ځنډول شوی چې د پي ټي اېم مشر منظور پشتين ویلي سيند حکومت ورسره مذاکرات کړي او د دوی د غوښتنو منلو باور يې ورکړی دی.

  • 16x9 Image

    فضل عزیز

    فضل عزيز په کراچۍ کې د وي او اې ډيوه خبريال دی په سياسي، تعليمي، صحت او کلتور سره په ټولنيزو موضوعاتو وېب، رېډيو او ټيلي ويژن ته رپورټونه جوړوي او په ځانګړو موضوعاتو ليکل هم کوي. د کراچۍ د اردو پوهنتون نه يې د جرنلزم او کراچۍ پوهنتون نه يې د نړيوالو اړيکو د ماسټرۍ ډګريانې ترلاسه کړي دي.​

ځانګړې ویډیوګانې

بي بي شیرینه

بي بي شیرینه – په ټیلې ویژن
please wait

No media source currently available

0:00 1:59:58 0:00

Recommended

XS
SM
MD
LG