لاس رسیدونکی لینک

Breaking News

د پاکستان د ديني عالمانو یو پلاوی "د ټي ټي پي سره خبرو دپاره" کابل ته روان شوی دی


واشنګټن - د پاکستان د دیني عالمانو یوه اته کسیزه ډله نن د ګل/دوشنبې په ورځ کابل ته روانه شوې ده او د طالبانو تر واک لاندې حکومتي خبرې اداره "باختر آژانس" وایي چې دا پلاوی به د تحریک طالبان پاکستان له مشرانو سره کابل کې خبرې کوي.

بل اړخ ته د پاکستان د حکومت خارجه دفتر د وي او اې ډېوه یوې پوښتنې ته په جواب کې، کابل ته د دې دیني عالمانو د سفر تصدیق کړی خو د دې سفر د هدف په اړه یې صرف همدومره ویلي چې "د علماوو تګ راتګ، د افغان علماوو او معاشرې د مختلفو صنفونو سره د تعامل دپاره په معمول ډول ترسره کیږي. دا پلاوی د همدې تګ راتګ برخه ده."

بل اړخ ته د پاکستاني خبریالانو په ټویټونو کې عکسونه ښيي چې په دغه پلاوي کې د کراچۍ نه مفتي تقي عثماني او نور مذهبي عالمان اسلام اباد ائیرپورټ (هوايي مېدان) ته رسېدلي دي. په ولسي کچه د طالبانو سره د پټو خبرو د مخالفت پرته، د پاکستان پوځ تېره اونۍ ویلي وو پاکستاني طالبانو سره به خبرې جاري ساتي.

د دې سفر په اړه د ډیوې پوښتنې ته د افغان طالبانو ویاند انعام الله سمنګاني هم تر اوسه ځواب نه دی ویلی، خو پاکستاني خبریال طاهر خان په خپل ټویټر پاڼه لیکلي: "د تحريک طالبان پاکستان او پاکستان حکومت ترمنځ د سولې په خبرو کې د منځګړتوب لپاره د پاکستان د علماوو استازي کابل ته تګ لپاره د اسلام اباد اېرپورټ ته ورسېدل."

طاهر خان زیاته کړې چې په پام کې ده چې دغه پاکستاني علماوو یو پلاوی به افغانستان ته لاړ شي او هلته به د تحریک طالبان پاکستان او امنیتي چارواکو ترمنځ په خبرو کې د پرمختګ لپاره هڅې وکړي چې مفتي غلام رحمان هم پکې شامل دی.

په دې وروستیو کې د افغانستان د طالبانو د حکومت په منځګړتوب کابل کې د پاکستان او ټي پي پي ترمنځ د سولې خبرې دوام لري چې د مطبوعاتي رپورټونو په اساس دغو مذاکراتو کې د سولې لپاره ټي ټي پي پاکستان ته شرط اېښی و چې اسلام اباد دې د افغانستان سره د لګیدلي قبایلي ضلعو زوړ حیثیت بیرته پرځای کړي .

که څه هم تحریک طالبان پاکستان او د پاکستان حکومت ترمنځ د نامعلومې مودې پورې ډزبندي اعلان شوې، خو په سیمه کې د ترهګرۍ پیښې او هدفي وژنې زیاتې شوي.

که څه هم د ډزبندۍ له اعلان راپدیخوا ټي ټي پي د کوم بريد ذمه واري نه ده منلې خو څيړونکي وايي دا بريدونه ښيي چې ټي ټي پي دننه نوي وسله والې ډلې جوړې شي يا پکې ځیني جنګيالي د داعش خراسان سره د یوځای کیدو اعلان وکړي.

د پاکستان د حکومت او تحریک طالبان پاکستان ترمنځ د سولې د خبرو د رابرسېره کېدو وروسته د پاکستان په پارلیمان کې هم سخت غبرګون مخې ته راغلی وو او سياسي ډلو غوښتنه کوله چې باید دا خبرې د پارليمان تر نظارت لاندې او په لارښوونه وشي.

د پېښور په ارمى پبلک سکول کې د وژل شوو زده کوونکو مېندې پلرونه هم د تحريک طالبان پاکستان سره په خبرو اعتراضونه لري او له حکومته غوښتنه کوي چې باید په دې خبرو کې دوى هم شامل کړای شي.

په دې وروستیو کې د پاکستان پوځ د پارليمان غړي د تحريک طالبان پاکستان سره د خبرو د عمل نه خبر کړي وو او حکومت ويلي وو چې دا خبرې به د پارليمان په لارښوونه او اجازه پر وړاندې بیایي.

  • 16x9 Image

    منزه شهید

    منزه شهید جرمني کښې خپل ماسټري په سیاسې علومو کښې تر لاسه کړې او د کال ۲۰۱۵ راهسې د امریکا غږ ډیوه څانګې سره همکاره ده. منزه په ملټي ميډیا، راډیو او ټلویزیون کښې د شپږو کلونو اوږده تجربه لري. هغه د خبریالۍ ترڅنګ په سیاسي او ټولنیزو موضوعاتو لیکنې کوي.

    په ټوېټرې د منزه شهید سره رابطه کولی شئ:

    @MunazaShaheed

XS
SM
MD
LG