د خېبرپښتونخوا په شمالي وزيرستان ضلع کې د درېو مياشتو په ماشوم کې د پولیو وايرس تصديق شوی دی، دا په روان کال کې په پاکستان کې د پوليو 18م پېښه ده چې مخې ته راغلې ده.
پاکستان کې د پوليو د مخنيوي د پروګرام ترمخه روان کال [2022] کې تراوسه پورې د پوليو په 18 مثبتو پېښو کې 16 يواځې په شمالي وزيرستان کې ثبت شوي او دوه نورې هم د خېبرپښتونخوا په لکي مروت ضلع کې معلومې شوي دي.
د بيان ترمخه تازه چې کوم ماشوم د پوليو ښکار شوی په 25 اګست يې معذوره ښکاره شوې وه.
ویل شوي پاکستان کې تېره اوونۍ د ملک تر ټولو غټ اقتصادي ښار کراچۍ کې د پوليو وايرس نمونې تاييد شوي دي، له دې وړاندې په بنو، پېښور، سوات او لاهور کې هم د پولیو وايرس تصديق شوی دی.
په بيان کې زیاته کړی شوې چې کراچۍ په تاريخي لحاظ سره د پوليو وايرس مرکز پاتې شوی او د پوليو وايرس د خورېدو دپاره په حساسه ګرځول شوو ضلعو کې شامل ده.
د صحت وزیر قادر پټېل ويلي، د سختو موسمي حالاتو له امله چې چرته ممکن وي ماشومانو ته د ويکسين ورکولی شي او په حالاتو ښه کېدو په سېلاب ځپلو علاقو کې په ممکنه توګه د کمپاين کولو تيارۍ روانې دي.
هغه زیاته کړې په موجوده حالاتو کې د پوليو وايرس خورېدو اندېښنې سېوا شوي دي.
خېبرپښتونخوا کې د پوليو د مخنیوي د پروګرام ډپيټي کوارډينېټر ذيشان امين هم وايي په ځانګړي ډول د خېبرپښتونخوا په جنوبي ضلعو کې دوی د دې مسلې سره مخ دي چې خلک ماشومانو ته د پوليو ضد څاڅکو ورکولو نه انکار کوي.
وي او اې ډيوه سره په خبرو کې هغه وویل کله چې ماشومانو ته د پولیو ضد څاڅکي ور نه کړی شي او دوی ته د پوليو وايرس ورسي، د پوليو وايرس په وړاندې يې قوت مدافعت کمزوری وي او پوليو يې ووهي.
هغه وویل دوی بيا هم کوشش کوي چې بيا بيا د پوليو ضد څاڅکو کمپاينې وشي او يو ماشوم هم د پوليو ضد څاڅکو اخستو څخه پاتې نه شي.
د پوليو د مخنيوي د پروګرام ترمخه په کراچۍ او نورو علاقو کې د سېلاب نه اغېزمنو خلکو نورو ځايونو ته د کډو کولو سخت چېلنج رامخې ته دی او په موجوده موسم کې د پوليو وايرس خورېدو خطره زياته ده.
پاکستان کې د پوليو د مخنيوي د پروګرام چارواکي وايي دوی ته د پوليو د خاتمې په لړ کې تر ټولو غټ چېلنج د میاندو پلارانو ماشومانو ته د پوليو ضد څاڅکو ورکولو نه انکار کول دي.
چارواکي وايي باوجود د دې چې په خېبرپښتونخوا کې وخت په وخت د پوليو په ټيمونو بريدونه کيږي دوی هڅه کوي چې کور په کور ټيمونه ورسوي او ماشومانوته د پوليو ضد څاڅکي ورکړي.
