واشنګټن - د نایجریا د کاتسینا صوبې ځایي پولیس وایي چې وسله والو کسانو د تېرې شنبې/خالي ورځې په ماښام د یو مسجد نه اوولس کسان اغوا کړل، چې څلور تنان یې بېرته ژغورل شوي خو د دیارلسو (۱۳) پته یې لا نشته.
د کاتسینا صوبې د پولیسو ویاند ګامبو عیسی د ګل/دوشنبې په ورځ (د ډسمبر ۵مه) وویل چې د جومات نه اغوا کړی شوي لمونځ کوونکي چې تر اوسه لا پته دي، اکثره نارینه لویان دي.
د هغه وینا ده چې وسله وال په موټرسایکلونو سپاره و او په فونټوا سیمه کې یې په داسې حال کې په یو جومات یرغل وکړ چې خلکو هلته لمونځ کاوه. یرغل کوونکو د مسجد امام او یو بل کس په ډزو ویشتی او زخمیان کړي یې دي.
ځایي رسنیو د څه باندې څلوېښتو (۴۰) تنانو د لادرکه کېدو رپوټ ورکړی دی.
د نایجریا په شمالي سیمو کې د پېسو دپاره د خلکو د اغوا کولو واقعات زیات دي او حکومت یې په مخنیوي کې د مشکلاتو سره مخ دی.
د اغواګرو حملو د صدر محمدو بوهاري په حکومت، چې د آینده انتخاباتو د امن دپاره آمادګي نیسي، غټ فشار ګڼل کیږي. نایجریا کې به د فرورۍ میاشت کې صدارتي انتخابات ترسره شي.
په همدې حال کې د ابوجا او کوډانا ترمنځ رېل پټلۍ چې د وسله والو کسانو د حملې په نتیجه کې تړل شوې وه، د ګل/دوشنبې په ورځ په داسې حال کې بېرته پرانېستل شوه چې ګڼ شمېر قامي پولیس هلته کې ځای پر ځای شوي و.
د اورګاډي/رېل دا لاره پس د هغه تړل شوې وه چې د مارچ په ۲۸مه د وسله والو په حمله کې نهه (۹) مسافرین ووژل شول او دوه شپېته (۶۲) اغوا کړی شول.
وروسته بیا د مذاکراتو په نتیجه کې دا مسافرین کرار کرار په مختلفو ډلو کې راخوشې شول او وروستی یرغمل شوی کس، په اکټوبر کې آزاد شو.
