لاس رسیدونکی لینک

Breaking News

په کوز جنوبي وزیرستان کې د ناامنۍضد او امن دپاره د ولسي غونډې وروسته احتجاجي ناسته پېل شوې


جنوبي وزیرستان کې احتجاجي پرلت پېل شوی

د خېبرپښتونخوا په کوز جنوبي وزیرستان ضلع کې پرون د جمعې په ورځ [شپږمه جنورۍ] د ناامنۍ ضد او امن دپاره غټه ولسي غونډه شوې او د غونډې وروسته بيا احتجاجي پرلت پېل شوی دی.

احتجاج کونکي وایي د تاریخ بد ترینې ناامنۍ سره مخ دي، دوی د سيمې نه اېف سي ار قانون ختم شوی خو دغلته اوس هم د پاکستان قانون نه عملي کیږي.

دوی وایی د امنیت ټینګښت د ریاست او ریاستی ادارو ذمه واري ده او په علاقه کې دې په هر قسمه وسله والو ډلو بندیز ولګول شي.

خو حکومتي چارواکي د وړاندې نه دا دریځ لري چې د کله نه دا سيمې په صوبه کې شاملې کړل شوي حالات پکې ښه شوي او د خلکو محروميو ختمولو لپاره پکې د اربونو روپو ترقیاتي چارې روانې دي.

احتجاج کونکي لس بنیادي غوښتنې لري، 1: امنیت ټینګښت د ملکي امنیتي ادارو دنده ده او که پولیس د مطلوبو کسانو او یا په کوم ځای کې د لټون عملیات او یا د عملیاتو ترسره کولو ته اړتیا وي، نو د قانون له مخې باید اقدام وکړي. له پولیسو پرته نور امنیتي ځواکونه دې د عملیاتو پرمهال عام خلک نه ځوروي او په دې لړ کې چې کله پولیس ته د ایف سي یا پوځ اړتیا وي، بیا د 2002 د آرټیکل 126 لاندې پولیس مرسته وکړي. خو په خپله دې بل کوم وسله وال ځواک نه رامینځ ته کیږي.

2: پخوانۍ فاټا په خېبرپښتونخوا کې ګډه شوې چې تر مخه يې د 1973 د اساسي قانون ټول شقونه د پخوانۍ فاټا په سیمو کې عملي کیږي نو له اساسي قانون له مخې د امن کمیټۍ، قامي لښکر او د وسله والو سره شوې 2007 کال تړون په هېڅ صورت کې د منلو نه دی.

3: په جنوبي وزیرستان کې امن د حکومت د واکمنۍ سره اړه لري. د حکومت واکمني لپاره دې ضلعې ته خپل پولیسو افسر ډي پي او او قاضیانو په ګډون د ټولو لاین ډیپارټمنټونو دفترې د ټانک نه د ضلعې مرکز واڼه ته منتقل کړل شي.

4: د نامالومه کسانو څخه دې د علاقې یو ځوان جمشید وزیر زر تر زره خوشی کړل شي. 5: د امنیت د ټینګښت دپاره دې په سپین، اعظم ورسک، شکۍ، انګور اډه، زرمېلان او رغزۍ سيمو کې، د ضلعو په نورو وړو او لویو بازارونو کې دې د پولیسو پوستې جوړې کړل شي.

6: د ګزمې پر مهال د پولیسو د تاڼو، پوستو او پولیسو د ګزمې پرمهال د هغوی د ساتنې لپاره دې په بیړني ډول ایف سي ځواک ځای کړل شي.

7: د تورو شیشو ګاډي که هغه دولتي وي او که غیر دولتي پر ضد دې بې توپیره بندیز ولګول شي، سرغړونکي دې نیول کیږي او د قانوني چلند لپاره دې عدالتونو ته وړاندې کیږي.

8: د نشه یي توکو پر وړاندې باید بې توپیره اقدامات واخستل شي. 9: په هر ډول وسله وال تنظیمونو دې بندیز ولګول شي. 10: د افغانستان او پاکستان ترمینځ د جنوبي وزیرستان په انګور اډه پوله د سوداګرۍ پر وړاندې ټول خنډونو دې لرې کړل شي او پاکستاني شناختي کارډ لرونکو ته دې د انګور اډې په دروازه د تلو راتلو اجازه ورکړل شي.

د پرلت یو ګډون وال او د عوامي نیشنل ګوند فعال ایاز وزیر وویل د دوی سره د انتظامیې ځايي مشرانو رابطه کړې او دا غوښتنې یې ورسره شریکې کړي دي او دوی ته د ځواب ویلو نن دوه بجې وخت ورکړل شوی دی.

د پاکستان پیپلز ګوند د ضلعې عمومي سیکتر عمران مخلص وویل ترڅو چې د دغو غوښتنو پوخ ډاډ نه وي ورکړل شوی پرلت به روان وي.

د پاڅون یو غړي ندیم خان زیاته کړه دا په تیره میاشت کې پرله پسې درې ولسي غونډې وشوې خو د دوی د امن په غوښتنه عمل نه دی شوی. هغه وویل مجبور شوي چې په احتجاجي پرلت یې لاس پورې کړو.

وي او ای په دې اړه د کوز جنوبي وزیرستان د انتظامیې او پولیسو مشرانو سره د رابطې هڅه کړې خو څه ځواب یې تر لاسه نه کړو.

خو د دفترونو چارواکو یې وویل پرون مازیګر وروسته د ځایي مشرانو په مینځګریتوت يې د پرلت کونکو سره لیدلي د دوی غوښتنې يې اوریدلې خو په دغو غوښتنو کې ځینې د پوځ او ځینې د حکومتونو تر کچې اړه لري او د هغوی سره هم شريکې کړی شوي او چې د هغه ځایی نه څه ځواب وویل شي هغه به د پرلت کونکو شريک کړي.

پرون په جنوبي وزیرستان کې په ولسي غونډه کې سياسي او پښتون ژغورنې غورځنګ مشرانو ګډون کړی، دوی په سيمه کې د امن په ځای کولو، په زوره د بې درکۍ، تاوان دپاره تښتونو او هدفي وژنو د لړۍ ودرولو غوښتنې کړي دي.

  • 16x9 Image

    عدنان بېټنی

    عدنان بېټنی د پښتونخوا په ډېره اسماعیل خان ښار کې د وي او اې ډیوه خبریال دی. هغه د افغانستان او پاکستان تر منځ د پولې دواړو غاړو خصوصاً له وزیرستانه د نورو مسلو تر څنګ د ترهګرۍ، جنګځپلو کډوالو، بشري حقونو او د دواړو هېوادونو تر منځ پر سیاسي اړیکو او اقتصاد رپوټونه جوړوي. نوموړي د ډېره اسماعیل خان له ګومل پوهنتونه د جرنلزم له زدکړو سره سره د سیاسیاتو ماسټري ډګري هم تر لاسه کړې ده.

ځانګړې ویډیوګانې

هېلو وي او اې په ټي وي

هېلو وي او اې په ټي وي
please wait

No media source currently available

0:00 0:59:57 0:00

بي بي شیرینه

بي بي شیرینه – په ټیلې ویژن
please wait

No media source currently available

0:00 1:59:58 0:00

Recommended

XS
SM
MD
LG