(اېسوشیټډ پرس) - د طالبانو یو چارواکي ویلي دي چې د افغانستان په شمال ختیځ ولایت بدخشان کې د زنانه صحافیانو یو رېډیو په دې دلیل چې د روژې په میاشت کې یې موسیقي خپره کړې ده، وتړل شوه.
صدای بانوان چې معنا یې د ښځو غږ دی، د افغانستان یوازېنۍ پاته رېډیو وه چې ښځو چلوله. دا رېډيو لس کاله وړاندې جوړه شوې او اته (۸) کارکوونکي لري چې شپږ یې ښځې دي.
په بدخشان ولایت کې د اطلاعاتو او کلتور د ادارې مشر معزالدین احمدي د خالي/شنبې په ورځ وویل چې د "صدای بانوان" رېډیو په روژه میاشت کې د سندرو او موسیقۍ په خپرولو سره څو څو ځله "د اسلامي امارت د قوانینو او ضابطو" خلاف ورزي کړې او د دې خلاف ورزۍ په خاطر تړلې شوې ده.
معزالدین احمدي زیاته کړه: "که دا رېډیو د افغانستان د اسلامي امارت تګلاره ومني او یو ضمانت ورکړي چې بیا به داسې څه نه تکراروي، مونږ به بیا د فعالیت اجازت ورکړو."
د هغې رېډیو مشره ناجیه سروش دا خبره ردوي چې ګني کومه خلاف ورزي شوې ده، او وایي چې د رېډیو بندېدل لازم نه و او دا ګام یې یو سازش بللی دی. مېرمن سروش وایي، طالبانو "مونږ ته وویل چې تاسو موسیقي خپره کړې ده. مونږ هېڅ قسمه موسیقي نده خپره کړې."
ناجیه سروش وویل چې د زیارت/پنجشنبې ورځې د غرمې مخکې د طالبانو د اطلاعاتو او کلتور وزارت او د امر بالمعروف او نهې عن المنکر وزارت استازي د دوی رېډیو سټېشن ته ورغلل او هغه یې بند کړ. مېرمن سروش زیاته کړه چې کله د رېډیو عملې د امربالمعروف او نهې عن المنکر دفتر سره رابطه ونیوله، نو چارواکو ورته ویلي و چې هغوی د دې سټېشن د تړل کېدو په هکله اضافه معلومات نلري.
افغانستان باندې د ۲۰۲۱ کال په اګست میاشت کې د طالبانو د قبضې وروستو، ګڼ شمېر صحافیان بې روزګاره شول. د افغانستان د جرنلسټانو د آزادې اتحادیې ترمخه، زیات شمېر مېډیا یا د رسنیو دفترونه د فنډونو د نشتون له امله او یا په دې دلیل چې کارکوونکي یې د ملک نه فراري شول، تړل شوي دي.
طالبانو په افغانستان کې ښځې د اکثرو کارونو منعه کړي دي او د سکول د شپږم جماعت نه پورته، په شمول د پوهنتون یې د ښځو جېنکو په تعلیم هم پابندي لګولې ده. په موسیقي باندې تر اوسه رسمي بندیز ندی اعلان شوی.
