د پاکستان د حکومت مرکزي وزيرانو د مخالفه پاکستان تحريک انصاف ګوند سره د مذاکراتو کولو رد کړی او د خزانې وزير اسحاق ډار ویلي څو پورې عمران خان د قام نه معافي نه وي غوښتي مذاکرات نه شي کېدی.
د خالي په ماسخوتن پاکستان تحريک انصاف ګوند د حکومت سره د مذاکراتو دپاره اووه کسيزه کميټي جوړه کړې او ياد ګوند ويلي وو د عمران خان په وېنا کميټي به د انتخاباتو په حوالې سره د حکومت سره تګلاره جوړوي.
د خزانې وزير اسحاق ډار د جيو نيوز په پروګرام [جرګه] کې ويلي، د نهمې پېښو هر څه بدل کړي دي.
پاکستان کې په نهمه مې د تحریک انصاف ګوند د مشر او مخکني وزیراعظم عمران خان د غبن په قضیه کې د نيولو وروسته د تحریک انصاف غړو د ملک په لويو ښارونو کې قهرجنې مظاهرې کړې وې، په راولپنډۍ کې په پوځي مرکز جي اېچ کيو، او لاهور کې د کور کمانډر په کور ورغلي، اوورونه یې اچولي، ګاډي یې مات کړي او د نورو سرکاري ودانيو ته د تاوانونو اړولو تورونه پرې لګول شوي وو.
د پاکستان حکومت ويلي، په نهمه مې پوځي ودانیو بریدونو کې ککړو کسانو پرضد به په پوځي عدالتونو کې مقدمې چلولی شي.
د اسحاق ډار نه وړاندې د کورنيو چارو وزير رانا ثناالله او د رېلوی وزير سعد رفيق هم د تحریک انصاف ګوند سره د مذاکراتو رد کړی وو.
رانا ثناالله د پنجاب صوبې په فېصل اباد ښار کې يوې جلسې ته په وېنا کې ويلي، عمران خان خو د نهمې مې د پېښو غندنه نه ده کړې څنګه ورسره مذاکرات شي.
هغه تور لګولی چې عمران خان اوس سازشونه کوي چې د پاکستان تحریک انصاف ګوند د کوم ياد غړي په کور حمله وکړي، يو تن دوه مړه کړي او تور یې په حکومت ولګوي.
له دغې وړاندې د رېلوی وزير خواجه سعد رفيق هم ويلي چې د خبرو يو وخت او ايجنډا وي عمران خان چې کومه کميټي جوړه کړې د هغې سره مذاکرات نه شي کېدی.
د حکومت سره د مذکراتو دپاره د تحریک انصاف په کمېټۍ کې شاه محمود قرېشي، پروېز خټک، اسد قېصر، حليم عادل شېخ، عون عباس، مراد سعيد او حماد اظهر شامل دي.
د تحريک انصاف د کمېټۍ جوړولو وروسته د حکومتي واکمنه ګوند مسلم ليګ ن مشر او پخواني وزیراعظم نواز شریف ويلي وو خبرې اترې د سياستدانانو سره کېدی شي.
هغه ویلي وو "د شهيدانو د يادګارونو سوځولو، ملک ته اوور اچوونکو ترهګرو او د وران کارو د ډلې سره هیڅ مذاکرات نه شي کېدی".
تېره میاشت هم د ايتلافي حکومت او پاکستان تحریک انصاف ترمنځ ناستې شوې وې خو بې د کومې نتيجې ختمې شوې وې.
د اتحادي حکومت او پاکستان تحریک انصاف ترمنځ د انتخاباتو د نېټې دپاره ناستې او خبرې د سپريم کورټ د امر په رڼا کې شوې وې.
د پاکستان سپریم کورټ د انتخاباتو د نېټې په اورېدنه کې د بېلا بیلو سیاسي ګوندونو مشران عدالت ته بللي او ورته یې ويلي وو دوی باید خپلو کې په یوه ورځ د انتخاباتو د نېټې ټاکلو دپاره مذاکرات وکړي او عدالت دې د دغو مذاکراتو د نتیجې نه خبر کړي.
