د پاکستان د کورنیو چارو وزیر رانا ثناالله وايي، په يونان کې ډوبه شوې کشتۍ کې نزدې د 350 پورې پاکستانيان سواره وو، او 281 پاکستانيانو د خپلو خپلوانو معلومولو دپاره رابطه کړې ده.
په قامي اسمبلۍ کې د کشتۍ د تفصيلاتو په اړه نوموړي وويل، تر اوسه پورې د 82 کسانو مړي تر لاسه شوي دي، د فرانزک او نادرا د لارې د هغو پېژنګلو کولی شي خو اندېښنه ده د مړو شمېره نوره ډېره سېوا شي.
هغه وويل، په ژغورل شوو 104 کسانو کې 12 پاکستاني وو.
نوموړي زياته کړه په ياده کشتۍ کې د 400 پورې کسانو ځای کېدو ګنجايش وو خو د 700 پورې کسان پکې کښېنول شوي وو.
د کورنيو چارو د وزیر په خبره، تراوسه پورې د 193 پورې کسانو نه د ډي اېن اې نمونې ترلاسه کړي دي.
هغه وويل، وزیراعظم د يادې پېښې د پلټنو دپاره د لوړې کچې کميټي جوړه کړې ده، کميټي به د انسانانو په قاچاق کې د ککړو پرضد ګامونه اخلي، په دغه لړ کې په قانون کې نیمګړتياوې به ګوري او د اصلاحاتو سپارښتنه به کوي.
هغه زياته کړه، په دې خلکو کې ډېر د پاکستان نه په قانوني لارو لاړ شي او په مخکې بيا د نورو ملکونو نه په غېر قانونه لارو ځي.
راپورونه وايي، د یونان چارواکو ویلي، د لیبیا نه د یونان په لوري روانه کشتۍ کې د 400 نه تر 750 پورې خلک سواره وو.
کشتۍ د 20 نه تر 30 ګزه پورې اږوده وه او د جون په 14مه د پېلوس نومې ټاون نه اتیاکلومیټره لرې د زیاتو کسانو او وزن له وجې په اوبو کې ډوبه شوې وه.
