خېبرپښتونخوا کې د قدرتي افتونو په وخت د انتظام ادارې [پي ډي اېم اې] ویلي، په صوبه کې د اتوار- یکشنبې د ورځې 25م جون نه تر 30م جون پورې د بارانونو او تېزې سيلۍ امکان دی.
پښتونخوا کې دا وخت سخته ګرمي ده او عام خلک د ګرمۍ او بجلۍ د لوډ شيډنګ شکايتونه کوي، ځينې خلک وايي د 10 نه 12 ساعتونو پورې بجلي نه وي.
پي ډي اېم اې د 25م جون تر 30م جون پورې د صوبې په چترال، کوز او بر دير، ملاکنډ، بونير، سوات، شانګله، هزاره ډیويژن، مردان، صوابۍ، پېښور، نوښار، چارسده، باجوړ، مومند او جنوبي ضلعو کې په وقفې وقفې سره د بارانونو او تېزې سيلۍ امکان څرګند کړی دی.
ادارې ويلي، د 26 نه تر 29 جون پورې په کرک، ټانک، ډېره اسماعیل خان، جنوبي او شمالي وزيرستان کې د بارانونو او سيلۍ امکان دی.
ویل شوي د بارانونو سره به ګرمي راکمه شي خو په 26م او 27م جون پېښور کې د سېلاب جوړېدو، او په برنو غرييزه سيمو کې د غرونو ښوېدو اندېښنه څرګنده کړی شوې ده.
پي ډي اېم اې د بارانونو او سيلۍ په مهال ادارو ته د چمتو پاتې کېدو ويلي چې د کم نه کم تاوان اوښتو دپاره اقدامات وکړي.
پي ډي اېم اې پرون په خلکو غږ کړی په ګرم موسم کې دې احتياط کوي او د غېر ضروري سفر څخه دې ډډه وکړي.
پرون د پاکستان د موسمياتي بدلون مرکزي وزيرې شېري رحمان خبرداری ورکړی او ويلي يې وو، پښتونخوا او ګلګت بلتستان کې د تودوخې کچه د 4 نه 6 درجو پورې زياتې پاتې کېدو له امله د سېلاب او واورو ويلي کېدو خطره سېوا شوې ده.
هغې ضلعې انتظاميو، مقامي ادارو او ټولنو ته د چمتو پاتې کېدو او احتياطي تدابيرو ويلي دي، په ځانګړي ډول راتلونکې اوونۍ کې د لوی اختر په موقع چې خلک په رخصتيانو کې شمالي سيمو پله سېل له ځي.
رحمان په خلکو د خونديتوب غږ کړی دی.
تېر کال هم په دې موده کې په خېبرپښتونخوا او بلوچستان صوبو کې د بارانونو او سيلۍ امکان څرګند کړی شوی او بيا د اګست په مياشت کې سخت سېلابونه راغلي، انساني او مالي تاوانونه يې اړولي وو.
