واشنګټن – د اوکراین ولسمشر ویلادیمیر زېلینسکي د خالي یا شنبې په ورځ د ناټو له مشر ینز سټالټنبرګ سره د تورې بحیرې له لیارې د غلو دانو د صادراتو د تړون د بېرته پر ځای کولو پر مسلې خبرې کړي.
د ملګروملتونو په منځګړیتوب شوي تړون کې چې د ګل یا دوشنبې په ورځ یې وخت پوره کېږي د دې خبرې ضمانت شوی و چې د تورې بحیرې له لیارې به د اوکرین له بندرونو څخه په غنمو او نورو کرنیزو محصولاتو بار کښتۍ په خوندي توګه تېرېږي.
زېلینسکي وویل، هغه او سټالټنبرګ "ژمن دي چې د تورې بحیرې د لیارې پرانېستلو په برخه کې راتلونکي ضروري ګامونه لومړیتوب لري."
زېلینسکي همدارنګه د غلو دانو د لېږد ددغه تړون په اړه د جمعې په ورځ د ترکیې له ولسمشر رجب طیب اردوان سره هم خبرې کړي.
زېلینسکي وویل، "مونږ خپلې هلې ځلې همغږې کړې چې د تورې بحیري د غلو تړون بېرته پرځای شي. د روس د کړنو له امله نړۍ یو ځل بیا د خوراکي توکو د کموالي له ناورین سره مخ ده. د افریقا او اسیا ۴۰۰ میلیونه خلک د ولږې له ګواښ سره مخ دي."
د تورې بحیرې د نېټې له پای ته رسېدو سره ماسکو د تورې بحیرې زیاتې برخې د کښتیو له لیارې لېږد ته خطرناکې اعلان کړې او د اوکراین په بندرونو یې د ډرنونو او توغندیو بریدونه کړي چې ۶۰۰۰۰ میټریک ټنه غنم پکې له منځه تللي.
ماسکو خبرداری ورکړی چې دوی به هغه کښتۍ چې د تورې بحیرې له لیارې تېرېږي داسې وګڼي لکه اوکراین ته چې وسلې لېږدوي.
دې ته ورته اوکراین ویلي، چې دوی به هغه کښتۍ چې د روس تورې بحیرې لوري ته روانې وي داسې وګڼي چې "پوځي سامانونه پکې بار دي او له ټولو خطرونو سره به مخ وي."
له هغې راهیسې چې د غلو دانو د لېږد دغه تړون پای ته رسېدلی د هغو کښتیو شمېر ۳۵ فیصده کم شوی چې د تورې بحیرې له لیارې به د غنمو بارولو ته ورتلې.
همدارنګه د دغې بې باورۍ له زیاتېدو سره چې کېدای شي روس به په تجارتي ترافیک باندې برید وکړي، د کښتیو د بیمې یا انشورېنس کمپنیو د هغو کښتیو بیمه ځنډولې کومې چې له اوکراین څخه غنم لېږدوي، پرته له هغو وړو بندرونو چه د ډانباس په اوږدو کې دي.
خو د دې ټولو ګواښونو سره سره د ځینو کښتیو مالکان لیواله دي چې له اوکراین څخه د نړۍ بېلابېلو بندرونو ته غنم ولېږدوي.
