پاکستان کې د پوليو مخنیوي پروګرام ویلي، پېښور کې په ماحولياتي نمونو کې د پولیو وايرس تصدیق شوی دی. پېښور کې د روانې میاشتې په سر کې په څلورم ځل په ماحولياتي نمونو کې د پوليو وايرس تصديق شوی وو.
سږ کال د پېښوراو خېبرپښتونخوا د بېلابيلو علاقو ترڅنګ په لاهور او کراچۍ کې هم په ماحولياتي نمونو کې د پوليو وايرس معلوم شوي وو.
د پوليو مخنیوي پروګرام ویلي، تازه چې کومه ماحولیاتي نمونه تصديق شوې د جولايۍ په څلورمه نېټه د پېښور د نري خوړعلاقې نه د سخا اوبو څخه نمونې اخستل شوې او په هغې کې د پولیو وايرس معلوم شوي دي.
ويل شوي دغه وايرس هم په جينياتي توګه د افغانستان د پوليو وايرسو سره يو شان دي.
په خبر کې زياته کړی شوې پېښور کې سږ کال دا تازه پينځمه ماحولياتي نمونه ترلاسه شوې او د نري خوړ څخه پرله پسې څلورم ځل دی چې د پوليو وايرس ترلاسه شوي دي.
پاکستان کې د صحت وزير عبدالقادر پټېل ويلي، وايرس پولې نه لري او ماشومان ناروغه کوي هغه که د پولې هرې خوا ته وي.
هغه ويلي، د مياندو پلارانو دپاره ضروري ده چې د ويکسينو په اهميت ځان بوه کړي نه يواځې په هر مهم کې ماشومانو ته د پوليو ضد څاڅکي ورکړي بلکې د حفاظتي ټيکو کورس یې هم مکمل کړي او د ناکاره ناروغو څخه یې وژغوري.
هغه زیاته کړې، پاکستان کې د پوليو د مخنیوي پروګرام په افغانستان کې د پوليو پروګرام سره مسلسل په تماس کې دی او دواړه په ګډه د پولې دواړو خواو ته د وايرسو د منتقلۍ په قابو کولو کار کوي.
په څلورمه جولايۍ په ماحولياتي نمونه کې د پوليو وايرس تاييد کېدو په مهال د پوليو د مخنيوي پروګرام وي او اې ډیوه ته ويلي وو، "سږ کال په 2023 کې په ټول ملک کې د پوليو 11مه مثبته ماحولياتي نمونه معلومه شوې ده".
له دغې وړاندې د جون په میاشت کې په پاکستان کې د صحت قامي مرکز ليبارټرۍ په پېښور، هنګو او جنوبي وزیرستان کې په ماحولياتي نمونو کې د پوليو وايرس د موجودګۍ ویلي وو.
د پولیو مخنیوي پروګرام ویلي، د اګست د لومړۍ نېټې څخه د ملک په 61 ضلعو کې د پولیو ضد کمپاين کولی شي او د پينځه کالو نه کم عمر 77 لکه ماشومانو ته به پکې د پوليو ضد څاڅکي ورکولی شی.
ويل شوي پاکستان کې سږ کال د پوليو يوه پېښه او 12 مثبتې ماحولياتي نمونې ترلاسه شوي او افغانستان کې پينځه پېښې او 32 ماحولياتي نمونې رپورټ شوي دي.
