شهباز شريف: قامي اسمبلۍ به په نهم اګست ماته کړی شي

د پاکستان وزيراعظم شهباز شريف ويلي په نهم اګست به د قامي اسمبلۍ ماتولو سمري يا سپارښتنه صدر ته وليږي او د نګران حکومت د پاره به زر د خپلو اتحاديانو سره مشوره وکړي.

پاکستانيو رسنيو دغه خبره د سرچينو له قوله کړې ده. د پاکستان د موجوده اسمبلۍ وخت په 12م اګست سر ته رسي.

وزيراعظم چې صدر ته د اسمبلۍ ماتولو سمري وليږي او که صدر یې لاسليک نه کړي د ايين ترمخه 48 ساعته پس په خپله عملي کيږي.

وزیراعظم شهباز شریف تېره شپه د پارلیمان غړو ته په وینا کې ویلي، په تېر يو کال کې د سختو مشکلو حالاتو سره مخ پاتې شوي دي.

نوموړي ویلي د دومره سختو سره مخ شوي چې بيانولی یې نه شي، نوموړي د عمران خان په تېر حکومت او د حکومت وروسته په ملک کې د اړي ګړي جوړولو تورونه هم لګولي دي.

شهباز شريف ویلي، د نړيوالې مالياتي ادارې [آی اېم اېف] څخه د پور ترلاسه کول ورته يو غټ چېلنج جوړ شوی او د هغه خوبونه یې ورک کړي وو.

نوموړي ملک ته د ورپېښو ډېرو چېلنجونو يادګېرنه کړې چې د اتحاديانو سره په ګډه یې ترسره کړي دي.

پاکستان چې دا وخت هم د اقتصادي مشکلاتو سره مخ دی تېره میاشت یې د نړیوالې مالياتي ادارې سره د درېو اربو ډالرو د پور پروګرام ترلاسه کړی دی.

د خزانې وزير اسحاق ډار تېره میاشت ویلي وو، د نړیوالې مالياتي ادارې د انتظامي بورډ د منظورۍ وروسته د آی اېم اېف لخوا د پاکستان مرکزي سټېټ بېنک ته د 1.2 ډالرو لومړی قسط ترلاسه شوی او پاکستان د پرمختګ په لار روان شوی دی.

اقتصاد پوهان وايي د آی اېم اېف څخه د پور پېسې ترلاسه کېدو سره د ملک د ديواليه کېدو څخه بچ کېدو دعوې سمې دي خو د پاکستان د اقتصاد مسله ورسره نه ده هواره شوې.

اقتصاد پوهان وايي د آی اېم اېف سره د نهه میاشتو دپاره د پور پروګرام ترلاسه کېدل پاکستان ته موقع په لاس ورغلې چې اقتصادي اصلاحات وکړي او اقتصاد په سم لوري روان کړي.

د اقتصاد پوهانو په نظر نهه مياشتې موده د درېو حکومتونو په وخت کې راځي. موجوده حکومت معاهده وکړه دا حکومت به ختم شي، نګران حکومت به راشي او درې مياشتې وروسته به انتخابات کيږي د هغې وروسته به نوی حکومت جوړيږي، آی اېم اېف به دا ټول هر څه څاري، چې پاکستان سره یې په کومو شرطونو د پور تړون شوی دی.

رسنیو د سرچينو له قوله ویلي وزيراعظم شهباز څرګندونه کړې د نګران وزیراعظم ټاکلو دپاره به ډېر زر مشورې پېل کړي او په دوه درې ورځو کې به د مشورې عمل پوره شي.

په 12م اګست چې د موجوده اسمبلۍ اييني موده سرته رسي يو بل مرکزي وزير خورشيد شاه هم ویلي په نهم اګست به د اسبملۍ ماتولو سمري صدر ته لېږل کيږي.

پاکستان کې د اوس نه د راتلونکو انتخاباتو په کېدو بحثونه روان دي پاکستاني مطبوعات وايي د انتخاباتو کره نېټه نه معلوميږي چې کله به وي.

خو حکومتي وزيران تل وايي انتخابات به په خپل ټاکلي وخت کيږي او اعلان به یې د ټاکنو کمېشن کوي.

خو مخکيني وزيراعظم عمران خان په حکومت نيوکې کوي چې د انتخاباتو وروسته کولو ته بهانې جوړوي او انتخابات په وخت کول نه غواړي.