وزیراعظم کاکړ: د بجلۍ د بیلونو په اړه داسې کومه بیړنۍ پرېکړه نه کوو چې سبا یې بېرته اخستو ته اړ یو

د پاکستان نګران وزیراعظم ښاغلي انوار الحق کاکړ ویلي نګران حکومت یې نه غواړي د بجلۍ د زیاتو بېلونو په اړه په بېړه کې یوه داسې پرېکړه وکړي چې سبا یې بېرته اخستو ته اړ وي.

د پاکستان جیو ټي وي سره یوه مرکه کې ښاغلي کاکړ ویلي د بجلۍ د بحران اؤ د بیلونو په اړه د هغه ډله به د اوږدې اؤ لنډې مودې حل تجویز کوي اؤ حکومت به بیا د هغې په رڼا کې ګامونه اخلي.

په دې مرکه کې نګران وزیراعظم د خپلې هغه خبرې سپیناوی هم کړی دی چې په اړه یې رسنیو کې ویل شوي وؤ ، انوار الحق کاکړ وایي بجلي کومه داسې مسله نه ده چې په سر یې د ګاډو هړتال وکړل شي.

هغه پخپل سپیناوي کې ویلي د هغې طبقې سره خواخوږي لري چې د بجلۍ د زیاتو بیلونو د بار لاندې راغلي دي اؤ کله یې هم داسې نه دي ویلي چې ګنې د بجلۍ ستونزه هډو څه ستونزه نه ده یا داسې څه مسله نه ده چې دګاډو هړتال پرې وشي.

په پاکستان کې د بجلۍ د لوړو بیلونو پرضد د تېرې اوونۍ راهسې د ولسي احتجاجونو لړۍ پیل شوې ده اؤ پرون د خالي- شنبې په ورځ هم په ګرد هیواد کې د جماعت اسلامي اؤ د تاجرانو تنظیمونو په غږ کار بندیز شوی ؤ .

ددغه کار بندیز په مهال د هیواد په ټولو سترو اؤ وړو ښارونو کې دوکانونه، مارکیټونه اؤ کاروباري مرکزونه تړل شوي وؤ ، په بیلابیلو سیمو کې په زرګونو خلک احتجاجاً سړکونو ته راوتلي وؤ اؤ دحکومت پرضد یې شعارونه ورکول.

د پاکستان د خزانې وزیرې شمشاد اختر درې ورځې وړاندې ویلي وؤ پاکستان دا مهال د آی ایم اېف پروګرام کې دی او د آی ایم اېف د شرطونو له مخې حکومت چاته هم په بجلۍ رعایت نه شي ورکولی خو هغې ویلي وؤ حکومت د آی ایم اېف سره ولس ته د رعایت په ورکولو خبرې کوي.

د پاکستان د سینیټ غړی مشتاق احمد خان حکومت ته د بحلۍ لوړو بیلونو کې ولس ته د رعایت ورکولو پلان وړاندې کړی دی اؤ ویلي یې دي که حکومت دهغه په پلان عمل وکړي نو آی ایم ایف نه به اجازې اخستو ته نه مجبوریږي.

د خالي- شنبې په ورځ مردان کې راجوړې شوې یوې غونډې ته د وینا په مهال سینیټر مشتاق احمد خان ویلي که چې په کورونو کې دبجلۍ استعمالوونکو لپاره د رعایت حد د200 یونټو پځای 300 یونټه وټاکل شي نو صارفینو ته به د بجلۍ یو یونټ په 16 روپۍ تمام شي.

هغه وایي د 300 یونټو رعایتي حد له امله به د2 کروړه اؤ 43 لکو صارفینو دبجلۍ بیل زیات راکم شي اؤ په دې رعایت به د کال 326 اربه روپۍ لګښت راځي.

نوموړی وایي دا 326 اربه روپۍ حکومت په دې طریقه ویستي شي چې د پوځ د2000 اربو روپو په کلیز بجټ کې دغیرجنګي لګښتونو نه باید 100 روپۍ راجلا کړل شي، د ایس ډي پي یا پرمختیایي بجټ د1500 اربو نه 100 اربه روپۍ بیلې کړل شي اؤ هم دې 100 اربه روپۍ د هغو ادارو نه راغوڅې کړل شي چې په تاوان کې راوانې دي.

د سینیټر مشتاق احمد په خبره که چرې حکومت دا لاره خپله کړي نو بیا به ورته هیڅ ضرورت نه وي چې آی ایم ایف ته سوال زاري وکړي.