د افغانستان سره په پوله پرته د خېبر پښتونخوا قبایلي ضلع شمالي وزیرستان کې "ترهګرو" سره په نښته کې د پاکستاني پوځ یو افسر وژل شوی دی.
د پاکستان د پوځ ویاندې ادارې آی ایس پي آر د خالي ـ شنبې په ورځ خپل بیان کې ویلي، دا پېښه د شمالي وزیرستان په میرعلي سیمه کې هغه مهال شوې چې پوځ د ترهګرو یوه ځاله په نخښه کړه.
پوځ ویلي د عملیاتو په مهال ترهګرو سره نښته کې د پښتونخوا د بره دیر سیمې سره تړاؤ لرونکی یو عسکر ۲۸ کلن لانس نایک جمشید خان وژل شوی دی.
د پوځ د بیان له مخې د ترهګرو څخه د سیمې پاکولو لپاره عملیات روان اؤ پوځ هوډمن دی چې سیمې نه به د ترهګرۍ نوغی وباسي.
په دې وروستیو کې په پاکستان اؤ په ځانګړي ډول دخېبر پښتونخوا قبایلي ضلعو کې په امنیتي ځواکونو د ترهګریزو بریدونو لړۍ چټک شوې ده اؤ د روانې میاشتې په دویمه نیټه هم په میرانشاه کې ترهګرو سره په نښته کې دپوځ مېجر عامر عزیز او یو پوځي محمد عارف وژل شوي وؤ.
د غېر دولتي څېړنیزې ادارې پاکستان انستيټیوټ فار کنفلکټ اینډ سیکورټي سټديز د رپوټ له مخې سږ کال د اګست په میاشت کې په ګرد هیواد کې د ترهګرۍ 99 پېښې رپورټ شوي او دا د 2014م نه راپدېخوا په یوه میاشت کې تر تولو زیاتې پېښې دي.
دغه رپورټ وایي،د اګست په میاشت کې د ترهګرۍ په پېښو کې په ګرد هیواد کې 112 تنه وژل شوي او د جولايۍ د میاشتې په مقابله کې په اګست کې ترهګري 93 فیصدي زیاته شوې ده.
رپورټ وايي بلوچستان او د خېبر پښتونخوا قبایلي ضلعې د اګست په میاشت کې د ترهګرۍ نه تر ټولو زیاتې اغیز منې شوي دي او بلوچستان صوبه کې د تیرې میاشتې په مقابله کې ترهګري 65 فیصدي او د پښتونخوا قبایلي ضلعو کې 106 فیصدي سیوا شوې ده.
Forum