د پاکستان د بهرنيو چارو پخوانی وزير شاه محمود قرېشي د مې میاشتې د نهمې د پېښو په مقدمو کې د 14 ورځو په جوډيشل ريمانډ جېل ته لېږل شوی دی.
د رپورټونو ترمخه اسلام اباد هايکورټ د سايفر قضيه کې د پخواني وزيراعظم عمران خان او شاه محمود قرېشي د قضيې اورېدنه د 11مې جنورۍ پورې ځنډولې ده.
د پاکستان د بهرنيو چارو پخوانی وزير او د تحریک انصاف ګوند مشر شاه محمود قرېشي د شورو- چارشنبې په ورځ د سايفر قضیه کې په ضمانت د خوشي کېدو سمدستي وروسته د اډياله زندان په دروازه کې بيا نيول شوی او نن د راولپنډۍ يو عدالت ته وړاندې کړل شو.
د پاکستان د ځايي رسنیو ترمخه، شاه محمود قرېشي په نهمه مې پوځي ودانیو او نورو حملو په تور په جوډيشل ريمانډ جېل ته لېږل شوی، ويل شوي پوليسو عدالت ته د نوموړي ضد د بدني ریمانډ خواست کړی وو، خو عدالت د پولیسو خواست رد کړی دی.
په نهمه مې د غبن په قضیه کې د عمران خان د نيولو وروسته په دغه ورځ او لسمه مې د تحریک انصاف غړو د ملک په لويو ښارونو کې قهرجنې مظاهرې کړې وې، په راولپنډۍ کې په پوځي مرکز جي اېچ کيو، او لاهور کې د کور کمانډر په کور حملې شوې وې ، اورونه لګول شوي وو، ګاډي یې مات کړي او د ملک په نورو برخو کې هم سرکاري ودانيو ته د تاوانونو اړولو تورونه پرې لګول شوي وو.
د پاکستان په بېلابيلو ښارونو کې د نهمې مې د پېښو مقدمې د تحریک انصاف ګوند د مشرانو او غړو پرضد درج شوې وې.
عمران خان د نهمې مې د پېښو په حواله يو بیان کې ويلي وو، په دغه ورځ د دوی ضد سازش شوی وو.
په 22م دسمبر د پاکستان سپريم کورټ د سایفر قضيه کې د پخواني وزيراعظم عمران خان او پخواني بهرنيو چارو وزير شاه محمود قرېشي ضمانت منظور کړی وو.
د شاه محمود قرېشي د ضمانت منظورېدو وروسته د راولپنډۍ کمشنر د (تهري اېم پي او) هغه د 15 ورځو دپاره نظر بند کړی وو.
د رپورټونو ترمخه د راولپنډۍ مرستیال کمشنر (ډي سي) پرون سهار د قرېشي د نظربند کولو حکم بيرته اخستی وو.
د شاه محمود قرېشي د اډياله زندان په دروازه د نیولو ویډيو په ټولنيزو رسنیو خپره شوې،
قرېشي پکې وايي، "د اډياله زندان څخه یې د خوشي کېدو حکم راغلی، د سپريم کورټ درېو ججانو د هغه د ضمانت خواست منظور کړی خو د هغې وروسته بیا دی د تهري اېم پي او لاندې ګرفتار کړی شوی"، په دغه مهال پوليسو شاه محمود نيولی او د پوليس ګاډي ته یې خېژولی وو.
ګاډي د ختو په وخت شاه محمود قرېشي وويل، " د سپريم کورټ په حکم پورې ملنډه شوې، زه سپريم کورټ خوشی کړم خو دوی بیا په دروغجنه مقدمه کې ونیولم، زه د سياسي انتقام نخښه جوړ کړی شوم".
پاکستان کې د شاه محمود قرېشي په نیولو په ټولنيزو رسنیو او مطبوعاتو بحثونه پېل شوي.
شاه محمود قرېشي نن په هتکړو کې عدالت ته وړاندې کړی شوی، تحریک انصاف ګوند ویلي، د قرېشي په هتکړو کې عدالت ته وړاندې کول شرمناکه عمل دی.
Forum