د طالبانو حکومت وايي چې د قطر په سر ښار دوحه کې په فرورۍ کې د ملګرو ملتونو په کوربتوب د افغانستان په اړه جوړېدونکې غونډه کې د دوی استازو ته هم د ګډون بلنه ورکړل شوې ده. تېر کال هم دې ته په ورته غونډه کې طالبانو ته د ګډون بلنه نه وه ورکړل شوې.
د طالبانو د حکومت د رسنیو د مرکز او ویاند دفتر په یوه خبرپاڼه کې ویلي، د طالبانو د وزیراعظم د سیاسي چارو مرستیال مولوي عبدالکبیر د افغانستان لپاره د ناروې سفارتکار پال کلومن بېکین سره د لیدو په وخت ویلي د طالبانو حکومت ته په دې غونډه کې د ګډون بلنه ورکړل شوې ده.
په خبرپاڼه کې د مولوي عبدالکبیر له قوله ویل شوي چې د طالبانو حکومت د ښځو او نجونو د تعلیم مخالف نه دی او په دې اړه د طالبانو د مشر ملا هبت الله اخوندزاده په لارښوونه ځانګړې کمېټه کار کوي چې د نجونو تعلیم ته لاره برابره کړي:
"د ناروې شارژدافېر وویل، په نړۍ کې پر روان کړکېچ سربېره افغانستان له نړۍ څخه نه دی هېر شوی او د فروري پر 18مه به په دوحه کې د افغانستان په تړاو نړیواله غونډه وشي."
د ملګرو ملتونو د عمومي مشر ویاند سټیفن ډوجاریک د جنورۍ پر 24مه په نیویارک کې خبري غونډې ته ویلي وو، په دوحه کې جوړېدونکې غونډه کې به د ملګرو ملتونو د غړو هېوادونو او د افغانستان لپاره د یو شمېر هیوادونو ځانګړي استازي برخه واخلي:
"ددې غونډې هدف دا دی چې څنګه د افغانستان په اړه د ازادې ارزونې سپارښتنو ته پاملرنه وشي او د زیاتې نړیوالې ښکېلتیا د لا همږغه کېدو او منظم کېدو په اړه بحث وشي".
د ملګرو ملتونو له خوا د تېر 2023م کال د مې میاشتې په سر کې هم د افغانستان په. اړه لومړۍ مشاورتي غونډه کړې وه، خو د طالبانو د حکومت استازو ته پکې د ګډون بلنه نه وه ورکړل شوې.
د دوحې په هغه غونډه کې د بشري حقونو په ځانګړي ډول د ښځو او نجونو حقونو، ټولشموله حکومت جوړېدل، ترهګرۍ او نشه يي توکو په خلاف د مبارزې په اړوند مسلو خبرې شوې وې.
د ناروې سفارتکار کلومېن بېکین د طالبانو له حکومته د نجونو لپاره د زدکړو او کار د موقعې برابرولو غوښتنه هم کړې ده.
مولوي عبدالکبیر په دوحه کې د افغانستان په اړه جوړیدونکې مشاورتي غونډه کې د خپل حکومت د استازو د ګډون اعلان کړی، خو ملګرو ملتونو لا تر اوسه په دې دوه ورځنۍ غونډه کې د طالبانو د استازو د ګډون په اړه څه نه دي ویلي.
د ملګرو ملتونو په کوربتوب د تېر کال په مې میاشت کې په لومړۍ مشاورتي غونډه کې د چین، فرانس، جرمني، هند، انډونېشیا، ایران، جاپان، قزاقستان، قرغزستان، ناروې، پاکستان، قطر، روس، سعودي عرب، تاجیکستان، ترکیې، ترکمنستان، متحده عرب امارات، برتانیې، امریکې، اوزبکستان، یورپي اتحاد او د اسلامي همکاریو تنظیم استازو ګډون کړی وو.
تر اوسه دا نه ده څرګنده چې د دوحې په راتلونکې غونډه کې به د افغان مېرمنو استازیتوب وي که نه، خو د بشري حقونو د څار تنظیم د ښځو د چارو مرستیالې هیدربار په دې غونډه کې د افغان مېرمنو د استازو پر ګډون باندې ټینګار کړی دی.
هیدربار له ملګروملتونو غوښتي چې په دې غونډه کې د افغانو ښځو د ګډون لپاره بشپړ امکانات برابر کړي.
هیدر بار په یو بیان کې ویلي په افغانستان کې د ښځو او نجونو په ضد بحران له دوو لارو ژوریږي، وایي طالبانو له سپکاوي ډکو سیاستونو ته مخه کړې چې په پرله پسې ډول پکې سختوالی راځي.
Forum