پاکستان کې په انتخاباتو نظر لرونکې ادارې فافن د اتمې فرورۍ 2024م د انتخاباتو په اړه جايزه رپورټ خپور کړی، چې د اتمې فرورۍ په انتخاباتو کې ټرن اوټ يا د اچول شوو مجموعي رايو شرحه 47.6 فيصده وه، کومه چې په 2018م کې 52.1 فيصده وه.
فافن ويلي، په ملک کې د دولسمو عامو انتخاباتو، چې په اتمه فرورۍ 2024م ترسره شوي،60.6 ملينه ووټرانو پکې د رای ورکولو حق کارولی دی.
د رپورټ ترمخه، د 2018م په مقابله کې د 2024م په انتخاباتو کې خواوشا 5.8 ملينه زياتو خلکو رای ورکړي، په 2018م کې 54.8 فيصده رای ورکړل شوې وې.
په رپورټ کې زیاته کړل شوې، باوجود د دې چې د ووټرانو شمېره زياته شوې خو د کال 2018م په انتخاباتو کې ورکړل شوو رايو چې 52.1 فيصده وې، په مقابله کې د 2024م په انتخاباتو کې 47.6 فيصده رای ورکړل شوي دي.
فافن ويلي، د 2018م په انتخاباتو کې د رجسټرډ ووټرانو شمېره 106 ملينه او په 2024م کې دا شمېره 128.6 ملينو ته رسېدلې، د دواړو انتخاباتو په مينځنۍ موده کې 22.6 ملینه ووټران سېوا شوي دي.
د فافن په رپورټ کې ویل شوي، د قومي اسمبلۍ په حلقو کې تر ټولو زیاتې رای د سيند صوبې په تهرپارکر کې د اېن اې 214 په حلقه ورکړل شوي 70.9 فيصده ريکارډ شوي دي.
او د قومي اسمبلۍ په حلقو کې تر ټولو کمې رای د خېبرپښتونخوا د جنوبي وزيرستان په حلقه اېن اې 42 ورکړل شوي چې 16.2 فيصده وې.
ويل شوي خېبرپښتونخوا کې د 2024م په انتخاباتو کې د ورکړل شوو رايو شرحه 39.5 فيصده وه او په 2018م کې دا شرحه 44 فيصده وه، د رپورټ ترمخه د سړو د رايو شرحه په 2018م کې 51.8 فيصده او په 2024م کې 46.6 فيصده ریکارډ شوې، دغه ډول د ښځو د رايو شرحه د 2018م په انتخاباتو کې 32.9 او په اوسنيو انتخاباتو کې 30.9 فيصده مخې ته راغلې ده.
د رپورټ ترمخه يواځې په اسلام اباد کې د ورکړل شوو رایو شرحه سېوا شوې ده، په 2018م کې د سړو د رايو شرحه 62.2 فيصده او په اوسنيو انتخاباتو کې 63.7 فيصده وه، دغه ډول په 2018م د ښځو د رايو شرحه 53.7 فيصده او په 2024م کې 58.2 فيصده وه.
د فافن په رپورټ کې په بلوچستان، پنجاب او سيند صوبه کې هم د کمو رایو شرحه ښکاره کړل شوې ده.
په رپورټ کې په ملک کې د مجموعي ورکړل شوو رايو په حواله ویل شوي، په ټول ملک کې په کال 2018م کې د سړو د رايو شرحه 55.6 فيصده او اوس 51.6 فيصده وه، او په 2018م کې د ښځو د رايو شرحه 46.5 فيصده او په 2024م کې 42.6 فيصده وه.
Forum