پاکستان کې د نوي حکومت 19 کسيزه کابينې د سوګند اخېستو وروستو، د منتخب وزیراعظم شهباز شریف په مشرۍ خپله اولنۍ غونډه پرون د ګل/دوشنبې په ورځ جوړه کړه. د نوې کابینې د وزیرانو نه سوګند صدر اصف علي زرداري اخستی دی. وزيراعظم شهباز شریف پرون صدر ته د کابينې وړانديز کړی وو.
د نوې کابينې په غړو کې په سوګند اخستونکو کې اسحاق ډار (د خزانې پخوانی وزير)، خواجه اصف، عبدالعلیم خان، امیر مقام، ميا رياض حسېن پيرزاده، رانا تنوير حسېن، سردار اوېس لغاري، عطاالله تارړ، خالد مقبول صديقي، قېصر احمد شامل دي.
محسن رضا نقوي (د پنجاب صوبې مخکيني نګران وزيراعلا)، احد چيمه او محمد اورنګزېب هم سوګند پورته کړی دی.
محمد اورنګزېب د خزانې د وزیر څوکۍ سمبال کړې ده.
د پاکستان د ځايي مطبوعاتو ترمخه، اسحاق ډار ته دې ځل له د بهرنيو چارو وزارت ورکړل شوی، خواجه اصف د تېر په څېر د دفاع وزير جوړ کړل شوی دی.
ويل شوي، عبدالعلیم خان ته د نجکارۍ، احسن اقبال ته د تېر په څېر د پلاننګ يا منصوبه بندۍ، رانا تنوير ته د صنعت و تجارت، امير مقام ته د سېفران، عطا تارړ ته د اطلاعاتو او مصدق ملک ته د پټروليم او توانايۍ وزارتونه ورکړل شوي دي.
د پنجاب صوبې مخکيني نګران وزيراعلا محسن نقوي چې دا وخت د پاکستان کرکټ بورډ مشر هم دی، د کورنيو چارو او نارکوټکس اضافي چارج ورته ورته ورکړل شوی دی.
د پاکستان وزيراعظم شهباز شريف د کابينې لومړۍ غونډې ته په وينا کې د قيمتونو د کنټرول ساتلو دپاره د کمېټۍ جوړولو ويلي او لارښوونه یې کړې که څوک د ضروري توکیو په قيمتونو کې غېر ضروري او ناجايزه ګټه کوي، پرضد دې یې سخته کارروايي وشي.
د رپورټونو ترمخه، شهباز شريف ويلي، د حکومت په وړاندې یې تر ټولو غټ چېلنج ګراني ده چې غريب خلک ځوري.
د سېنېټ انتخابات
بل لور ته د پاکستان الېکشن کمېشن د سېنېټ په خالي کېدونکو څوکو د انتخاباتو کولو نېټه اعلان کړې او ويلي یې په دويم اپرېل به په دغو څوکو انتخابات کيږي.
الېکشن کمېشن ويلي، په کال 2018م کې د سېنېټ په 52 څوکيو منتخب شوي سېنېټران په 12 مارچ ريټايرډ کیږي او شپږ کلنۍ موده يې سر ته رسي.
خو په کال 2018م کې د پخوانۍ فاټا په خېبرپښتونخوا صوبه کې د ورګډېدو وروسته هغه د سېنېټ څلور مخصوصې څوکۍ ختم کړل شوي ځکه اوس به د سېنېټ په 48 څوکيو انتخابات کيږي.
Forum