د امریکې د خارجه محکمې مرستیال ویاند ویدانت پټيل ویلي، د رپورټ له مخې پاکستان د ځوابي کارروایۍ په توګه افغانستان کې هوایي بریدونه کړي دي.
هغه افغانستان کې په واکمنو طالبانو ټینګار کړی چې هغوي باید باوري کړي چې د افغانستان له خاورې په نورو هیوادونو بریدونه ونه شي.
په عین حال کې په افغانستان واکمنو طالبانو د پاکستان بریدونو ته خپل غبرګون کې دړکه کړې ده چې داسې پيښې خورا بدې پایلې درلودلی شي چې بیا به یې قابو کول د پاکستان په اختیار کې نه وي.
د پاکستان د خارجه وزارت ویاندې ویلي پاکستان د افغانستان په خاوره کې د ټي ټي پي اؤ حافظ ګل بهادر ډلې ځالې په نخښه کړي اؤ وایي دا عملیات یې په سرحدي سیمو کې د استخباراتي معلوماتو په اساس ترسره کړي دي خو افغان طالبانو اؤ ټي ټي پي بیا د پاکستان دا دعوه رد کړې ده اؤ وایي پاکستاني الوتکو عام خلک په نخښه کړي دي.
افغان میډیا وایي د پاکستاني الوتکو بریدونو کې د ماشومانو په ګډون اته کسان وژل شوي اؤ دافغانستان په خاوره د پاکستان لخوا د ترسره شوؤ دې بریدونو په ضد په کندهار ولایت کې احتجاجي لاریون هم شوی دی.
د دوشنبې په ورځ واشنګټن کې رسنیو ته د احوال تېرولو په مهال د امریکې د خارجه محمکې مرستیال ویاند ویدانټ پټیل وویل واشنګټن په کابل اؤ اسلام اباد ټینګارکوي چې د خپلو اختلافونو حل ولټوي اؤ افغانستان دې بیا د ترهګرو لپاره یوه خوندي ځاله جوړه نه شي.
ویاند ویلي افغانستان کې د ترهګرو پرضد عملیاتو کې باید ملکي خلک زیانمن نه شي اؤ د دوه اړخیزه خبرو اترو اؤ د ترهګرۍ د مخنیوي په اړه امریکا د پاکستان سره پرله پسې په رابطه کې ده.
هغه وویل پاکستان د امریکې یو مهم شرکت دار دی اؤ دامریکې سفیر د پاکستاني مشرتابه سره لېدنو کې په یو شمیر مهمو معاملو،سیمه ییزه سلامتۍ ،شراکت دارۍ اؤ اقتصادي اصلاحاتو خبرې کړي.
تر دې وړاندې د وایټ هاوس ترجمانې کېرین ژان-پیئر د ګل/دوشنبې په ورځ د وي او اې د خبریالې، انېټا پاول پوښتنې ته په ځواب کې وویل چې امریکا په افغانستان باندې د پاکستاني جهازونو د حملو نه آګاهه ده، کوم چې پاکستان پخپل پوځي مرکز باندې د خالي ورځې د حملې په جواب کې کړې دي.
کېرین ژان-پيئر وویل: "مونږ ډېر خفه یو چې په پاکستان کې د حملې پر مهال خلک مړه شوي او زخمیان شوي، او همدا راز دا چې په افغانستان کې د (پاکستان) د بمباریو له کبله اولسي خلک وژل شوي دي. مونږ له طالبانو غواړو چې د افغانستان له خاورې د ترهګرو حملو نه ترسره کېدل دې یقیني کړي. مونږ له پاکستانه غواړو چې زغم یا تحمل دې وکړي او دا دې یقیني کړي چې د هغو په ترهګرۍ ضد کاروایو کې اولسي خلکو ته نقصان ونه رسیږي."
د سپينې ماڼۍ ویاندې د پاکستان او افغان طالبانو وغوښتل چې د تشدد پرځای دې، د خبرو لاره خپله کړي. هغې زیاته کړه: "مونږ په دواړو اړخونو غږ کوو چې خپل هر قسمه اخلافات د خبرو اترو د لارې حل کړي. مونږ دا یقیني کولو ته چې افغانستان به بیا هېڅکله د ترهګرو دپاره، چې وغواړي امریکا یا زمونږ نور اتحادیانو یا شریکانو ته زیان ورسوي، په پټنځای بدل نشي."
په افغانستان کې واکمنو طالبانو وویل چې د اتوار او ګل ورځو ترمنځ شپه کې، پاکستاني جهازونو د پکتیکا او خوست ولایتونو په دوو ولسوالیو بمبارۍ وکړې چې په کې ټولټال پنځه ښځې او درې ماشومان ووژل شول.
طالبانو د پاکستان دا حملې په کلکه وغندلې، او د طالبانو دفاع وزارت خبر ورکړ چې په انتقامي کاروايي کې یې د "ډیورنډ فرضي کرښې" په غاړه، د پاکستان پوځي مرکزونه په "درنو وسلو" په نښه کړي دي.
د افغانستان په خاوره له بریدونو څو ساعته وروسته پاکستاني چارواکي وویل چې ، ډیورنډ کرښې ته څېرمه د پاړه چینار ضلعې کورمه کې د افغان طالبانو او پاکستاني ځواکونو ترمنځ نښتې شوي چې په کې د پاکستاني پوځ یو کپتان وژل شوی او دوه نور پوځیان ژوبل شوي دی.
د طالبانو د بهرنیو چارو وزارت ویلي، چې په کابل کې یې د پاکستان د سفارت سرپرست هم احضار کړی او هغه ته یې احتجاج لیک سپارلی.
Forum