د پاکستان سپریم کورټ د اسلام اباد هایکورټ د پخواني جج شوکت عزیز صدیقي د ګوښه کولو یا برطرفۍ په اړوند د سپریم جوډیشل کونسل فیصله ناچله ګرځولې ده اؤ د پخواني جج په توګه یې د هغه د پینشن اؤ ټولو مراعاتو د بحالولو حکم کړی دی.
شوکت عزیز په کال ۲۰۱۸م کې د پوځ اؤ استخباراتي شبکې آي ایس آي پرضد له یوې سختې وینا وروسته له خپل منصبه ګوښه کړل شوی ؤ چې وروسته هغه خپله برطرفي په سپریم کورټ کې چیلنیج کړې وه.
د سپریم کورټ د چیف جسټس قاضي فایز عیسا په مشرۍ پینځه کیسز بینچ سږکال د جنورۍ په ۲۳مه نېټه د شوکت عزیز صدیقي د اییني خواستونو اورېدنه سرته رسولې ده اؤ خپله پرېکړه یې خوندي کړې وه.
د جمعې په ورځ عدالت خپله د ۲۲ پاڼو اوږده فیصله مخې ته راوړې اؤ د هغه د ګوښه کولو اقدام یې ناقانونه ګرځولی دی.
سپریم کورټ پخپله پرېکړه کې په ۱۱م اکتوبر کال ۲۰۱۸م کې د وزیراعظم په سپارښتنه د صدر له لوري د شوکت عزیز صدیقي د ګوښه کولو اعلامیه هم ناچله ګرځولې ده.
پخپله فیصله کې عدالت ویلي چې جج شوکت عزیز صدیقي پخپله عهده بحالولی نه شي ځکه چې د هغه د ملازمت موده سرته رسېدلې ده خو ویلي یې دي چې هغه دې ریټایرډ جج وګڼلی شي اؤ د اسلام اباد هایکورټ د پخواني جج په توګه به د پینشن اؤ ټولو مراعاتو اخستو حقدار وي.
په ۲۱م جولایي کال ۲۰۱۸م کې ښاغلي صدیقي د راولپنډۍ بار یوې دستورې ته د وینا په مهال د هیواد په پوځ اؤ استخباراتي شبکه اي ایس آي سختې نیوکې کړې وې اؤ هغوي یې عدالتي چارو کې په مداخله تورن کړي وؤ.
د شوکت عزیز صدیقي لخوا لګول شوؤ تورونو ته د پاکستان د پوځ ویاندې ادارې آي ایس پي ار هم غبرګون ښودلی ؤ اؤ ویلي یې وؤ چې په ریاستي ادارو د لګول شوؤ تورونو باید پلټنې وکړل شي.
وروسته په ۱۱م اکتوبر کال ۲۰۱۸م کې هغه د خفیه ادارو په ضد د تقریر کولو په تور له خپلې عهدې لرې کړل شوی ؤ.
شوکت عزیز صدیقي د سپریم جوډيشل کونسل لخوا د هغه د برطرفۍ پرېکړه په سپریم کورټ کې چیلنج کړې وه خو په دغه دوران کې د هغه د ملازمت موده سرته ورسیده اؤ عدالت د هغه به اپیلونو څه فیصله نه وه کړې وه.
Forum