نېتنیاهو وایي په رفح باندې د حملې نېټه یې ټاکلې – امریکا غبرګون ښودلی

د اسرایل وزیراعظم بنیامین نېتنیاهو د ګل/دوشنبې په ورځ وویل چې د غزې په جنوب کې رفح ښار باندې د یو ځمکني برید دپاره نېټه ټاکل شوې، خو ښکاره یې نه کړه. هغه په داسې حال کې د حملې د نېټې ټاکل کېدو خبره کړې چې امریکا ویلي مرکچیانو یې په قاهره کې د یوې ډزبندۍ او د یرغمل شوو کسانو د خلاصون دپاره حماس تندلارې ډلې ته یو تجویز وړاندې کړی دی.

د اسرایل وزیراعظم د ګل په ورځ په بیت المقدس کې وویل: "نن، په قاهره کې د خبرو اترو په باب ما ته یو مفصل رپوټ راورسېدو. مونږ په ثابته توګه په دې کار کوو چې خپلو مقاصدو ته ورسېږو، اول او تر هرڅه اهم زمونږ د ټولو یرغمل شوو تنانو خلاصون او په حماس باندې یوه مکمله کامیابي حاصلول دي."

بنیامین نيتنیاهو زیاته کړه: "د دې کامیابۍ د حاصل کولو دپاره ضروري ده چې رفح ته ننوځو او هلته کې د ترهګرو ډلې نابوده کړو. دا کار به وشي. دې ته نېټه ټاکل شوې ده."

امریکا سمدستي د نېتنیاهو خبرو ته قهرجن غبرګون وښود. د پنټاګان یا د امریکا د دفاع وزارت یوې ترجمانې وویل: "مونږ ډېر واضحه څرګنده کړې چې مونږ په رفح کې دننه د عملیاتو حمایت نه کوو."

د پنټاګان ویاندې صبرینا سېنګ وویل: "مونږ غواړو یو معتبره منصوبه وګورو چې دوی به څنګه هلته کوم عملیات ترسره کوي. مونږ د هغوی رسمي منصوبه بندي چې وړاندې کړې دې وي، نده لیدلې."

هغې زیاته کړه چې امریکا د هغو څه باندې یو میلین فلسطیني عوامو په اړه "اهمې" بشري فکرمندۍ لري چې په رفح ښار کې یې پناه اخېستې ده.

په تېرو دوو ورځو کې د مصر په پایتخت قاهره کې د غزې جنګ د ډزبندۍ په سر خبرې روانې وې چې په کې د امریکا د استخباراتو د ادارې – سي آی اې – مشر ویلیم برنز، او د اسرایل، حماس ډلې، او قطر چارواکي شامل و. وایټ هاوس دا خبرې اترې "سنجیده" بللي دي.

د امریکا د قامي سلامتیا د کونسل ترجمان جان کربي خبریالانو ته وویل: "مونږ اوس په دې ځای ولاړ یو چې حماس ته یو تجویز وسپارل شو، او مونږ د حماس جواب ته انتظار یو. اوس به نو منل یې په حماس پورې اړه ولري."

کربي حماس ته د وړاندې شوي تجویز جزئیات بیان نه کړل.

د ډزبندۍ او یرغمل شوو تنانو د خلاصون په سر د خبرو اترو وروستي پرمختګونه او ورسره دا خطره چې په غزه کې به جنګ لا پسې وغځیږي، په داسې وخت کې مخې ته راغلي چې څو ورځې وړاندې د امریکا صدر جو بایډن، د اسرایل وزیراعظم بنیامین نېتنیاهو ته خبرداری ورکړ چې امریکا ممکن د غزې په جنګ کې د اسرایل د حمایت پالیسي خپله بدله کړي.

بایډن په اسرایل غږ وکړ چې غزې ته دې د ډېرو انساني مرستو لاره پرانیزي، او مرکچیانو ته دې اختیار ورکړي چې ژر تر ژره د حماس سره خبرو کې په ډزبندۍ اتفاق وکړي.

بایډن پس د هغه دا غوښتنې وکړې چې د اسرایل په یوه بمباري کې، اووه تنه بهرني مرستندویان چې غزې ته یې د خوراکي موادو په رسولو کې کار کولو، ووژل شول.