لاس رسیدونکی لینک

Breaking News

د خیبرپښتونخوا صوبائي حکومت سېلاب ځپلو کورنیو ته مالي پکېج اعلانوي


تصویر: پخوانی - پېښور ته نږدې د سربند سیمه (د ۲۰۱۶ کال سېلاب)

د خیبرپښتونخوا وزيراعلی محمود خان سوات ته د دورې په مهال د هغو ځایونو کتنه کړې چېرته چې خلک د وروستیو بارانونو او سيلابونو د لاسه اغيزمن شوي دي. وزیراعلی محمود خان ويلي چې د ځپل شوؤ سيمو دپاره به ډېر زر يو مالي پيکج اعلان کړي.

د خېبرپښتونخوا حکومت د چترال انتظاميه چارواکو ته ویلي چې د ريشون پُل دې د نهم ستمبر پورې ولګولی شي چې خلک وکړی شي ورباندې تګ راتګ وکړي.

د پښتونخوا په سوات، چترال، لانديني او برني کوهستان، بونير، دير او نورو سيمو کې خلکو ته ډير ځاني او مالي زيان رسيدلی او د سېلابونو له وجې د خپلو کورونو پرېښودو ته اړ شوي دي.

د خیبرپښتونخوا د قدرتي آفتونو د مخنیوي او نظم ادارې یا پي ډي اېم اې لخوا جاري کړی شوي راپور کې ویل شوي دي چې د بارانونو او سېلابونو له وجې شپږڅلوېښت (۴۶) تنان مړه شوي دي او شپږ څلوېښت نور ژوبل شوي هم دي.

په دغه راپور کې دا هم ویل شوي دي چې د اګست له دیارلسمې بیا د ستمبر تر ړومبۍ هفتې پورې درې سوه دري دېرش (۳۳۳) کورونه په جزوي، او دوه څلوېښت (۴۲) په مکمله توګه ړنګ شوي دي.

د خیبرپښتونخوا د قدرتي آفتونو د مخنیوي او نظم ادارې یا پي ډي اېم اې مشر یا ډایرکټر جنرل پروېز خان وي او اې ډیوه ته وویل، په لېرو پرتو سیمو کې د لارو او خلکو په ځای کولو دپاره هڅې روانې دي.

اغېزمن شویو سیمو ته د خیبر پښتونخوا د وزیراعلی محمود خان د دورې په مهال، ځایي خلکو احتجاج هم کړی و چې دوی سره تر اوسه پورې مرستې ندي شوي. خو بل پلو د پي ډي اېم اې چارواکي وایي د لاندېني او برني کوهستان په شمول، د بونیر، سوات، او چترال سیمو کې خلکو ته په زرګونو شمېر کې خوراکي او غیرخوراکي توکي، خیمې او نور شیان ورکړل شوي دي.

د اطلاعاتو په برخه کې د خیبرپښتونخوا د وزیراعلی مشیر کامران بنګښ وي او اې ډيوه ته وویل چې ځپل شوؤ سیمو ته وزیر اعلی پخپله تللی و او هلته له خلکو سره هم مېلاو شوی و.

کامران بنګښ ډیوه سره خبرو کې زیاته کړه، "صوبائي حکومت په دوولسو ګېنټو کې دننه دننه د رابطې او د مواصلاتي نظام د بحالۍ کار شروع کړلو او په هغې کې د کافي حد پورې کامیابي ترلاسه شوه. او په څلورویشتو ګېنټو کې دننه دننه، کوم چې مړي شوي و او یا کوم چې زخمیان و، هغوی ته معاوضه مېلاو شوله. کوم خلک چې په حق رسېدلي دي، د هغوی لواحقینو ته پنځه لکه روپۍ معاوضه میلاو شوې ده، کوم چې زخمیان دي هغوی ته یو لک روپۍ معاوضه میلاو شوې ده."

د وروستیو بارانونو او سېلابونو د لاسه په خیبرپښتونخوا کې اغېزمن شوي تنان وایي چې حکومت دې د دوی سره د کورونو د بیا جوړولو په لړ کې مالي مرستې وکړي.

  • 16x9 Image

    فرید شینواری

    فرید شینواری د پښتونخوا د خیبر ضلعې اوسېدونکی او په پېښور کې د وي او اې ډیوه د خبریال په توګه کار کوي، چې د سیمې پر ټولنیزو، سیاسي او نورو موضوعاتو رپوټونه جوړوي. هغه له 2012م کال راهیسې له فرنټېر پوسټ انګرېزي ورځپاڼې سره کار کوي او له دې سره سره یې له بېلابېلو سیمه ییزو رېډيوګانو سره هم کار کړی دی.

XS
SM
MD
LG