د دولت اسلامیه (داعش) ډلې په کابل کې تر ټولو لوی پوځي هسپتال – د سردار داوود خان پوځي روغتون – باندې د پروني برید ذمه واري منلې ده. دا خبره د اعماق خبري ادارې چې داعش پورې اړه لري، په خپل ټلېګرام چېنل کې کړې ده.
د رائټرز خبري ادارې د خبر تر مخه، چاوراکو ویلي چې د نهې/سې شنبې په برید کې لږ تر لږه ۲۵ کسان وژل شوي او د پنځوسو (۵۰) زیات نور ټپیان دي، خو د طالبانو ویاند ذبیح الله مجاهد د وژل شویو کسانو شمېر کم ښودلی دی.
افغانستان کې ځایي رسنیو رپوټ ورکړی چې په کابل کې په پوځي روغتون باندې پروني برید کې، د طالبانو یو جګپوړي کمانډر مولوي حمدالله مخلص هم وژل شوی دی.
ځایي خبرې ادارې -آماج نیوز - خبر ورکړی چې د طالبانو ذرائعو دوی ته د مولوي حمدالله مخلص د وژل کېدو خبر تایید کړی دی، مګر تر اوسه په دې اړه د کوم طالب ویاند بیان په رسنیو مخې ته ندی راغلی.
یوې بلې ځایي خبرې ادارې، خامه پرس هم ویلي چې طالب چارواکو په پروني برید کې د مولوي حمدالله د وژل کېدو تصدیق کړی دی.
پاکستاني خبریال طاهر خان وایي، د ده د معلوماتو له مخې، مولوي مخلص پخپله د داعشیانو مقابله کوله چې ووژل شو. طاهر خان په خپل ټویټر لیکلي: "د طالبانو یو مشر راته وویل، طالب محافظینو چې د داعش بریدګرو سره جنګ کاوه، هغه [مولوي حمدالله مخلص] ته یې مشوره ورکړه چې له سیمې لېرې شي، خو هغه ونه منله او غوره یې وګڼله چې پخپله جنګ وکړي. هغه په هغو درېیو طالبانو کې شامل و چې د داعش په برید کې ووژل شو."
حمدالله مخلص یو له هغو طالب جنګیالیو ځیني و چې د اګسټ په ۱۵مه اول ځل د افغانستان صدارتي اېوان (ارګ) ته ننوتی او تصویرونه یې په الجزیره ټي وي هم خپاره شول. ویل کیږي چې هغه وروسته د طالبانو په حکومت کې د مرکزي قول اردو/مرکزي پوځي کورپ مشر ټاکل شوی و. که چېرته د هغه د وژل کېدو خبره رښتیا وي، نو دا به واک اختیار ته د طالبانو د رسېدو نه پس، د دوی تر ټولو جګپوړی چارواکی وي چې په یوه حمله کې وژل کیږي.
د پرونۍ پېښې شاهدان وایي، اول د سردار داوود خان پوځي هسپتال مخې ته دوه چاودنې وشوې او ورپسې بریدکوونکي په روغتون ورننوتل او د طالبانو سره په جنګ شول. د طالبانو دفاع وزارت ویلي چې دا داعشي ځانمرګي و، او طالبانو یې برید شنډ کړی او بریدګر یې وژلي دي.
بل اړخ ته پخواني جهادي مشر عبدرب الرسول سیاف د دې حملې په حواله پر خپلې فېسبوک پاڼې لیکلي: "په هغه ځای کې چې اوس هم د ځانمرګو بریدونو او چاودنو د کرغېړنو جنایتونو نه د استشهادي حملو په نوم رسمي دستورو کې ستاینه کیږي، هلته به د داسې جنایاتو مخه څنګه ونیول شي؟"
سیاف په دې لیکنه کې هغې دستورې ته اشاره کړې چې څو هفتې مخکې په کابل کې د طالبانو د داخله وزیر ملا سراج الدین حقاني له اړخه جوړه شوې وه او هغه کې د طالبانو ځانمرګي بریدګر د استشهادیانو په نوم ونازول شول او وارثینو سره یې مرسته وشوه. سراج الدین حقاني د حقاني شبکې مشر دی چې ډله یې پخوا په زیاتو ځانمرګو بریدونو کې شامله پاته شوې ده.
د طالبانو ویاند ذبیح الله مجاهد، دا برید د "داعشي فتنه ګرو" بللی او ویلي یې دي چې بریدکوونکي وړاندې تر دې چې هدف ته ورسیږي، د طالب جنګیالیو لخوا په نښه او ووژل شول.
ذبیح الله مجاهد زیاته کړې ده چې د روغتون/هسپتال دننه څوک ندي ژوبل شوي، خو د روغتونه بهر، ۳ ښځې او یو ماشوم وژل شوی دی. همدا راز د طالبانو ویاند ویلي چې په برید د دوی درې طالبان هم وژل شوي دي.
د طالبانو د دفاع وزارت ویاند هم په واټساپ پیغام کې د یو شمېر جسدونو تصویرونه خپاره کړي چې په وینو لړلي دي او د طالبانو په وینا، دا هغه داعشي وګړي و چې په روغتون یې برید کړی و.
په عین حال کې عیني شاهدینو وي او ای ته ویلي په جلال اباد ښار کې دوه کسان د نهې، سه شنبې، په ورځ تېزندي کړی شوي او دوه وروڼه په جدا پېښه کې وژل شوي دي.
د رپورټ ترمخه طالب چارواکي د مرګونو، خلکو د اعدام کېدلو او د هدفي وژنو د هغه لړۍ په اړه خبرې نه کوي چې په جلال اباد او په کونړ کې دا مهال دوام لري.
