رويټرز خبري اداره وايي په غربي هند کې د ګرمۍ سره تړلو علتونو له وجې په مشکوکه توګه 11 کسان مړه شوي دي خو د هند د قدرتي افتونو انتظام ادارې چارواکي وايي د مړینو د علتونو په اړه ورته په فوري توګه نه ده معلومه شوې او طبي ازموینې لا نه دي مکمل شوې. پاکستان هم د جمعې په ورځ د سختې ګرمۍ سره مخ شوی.
رویټرز خبري اداره د هند د ځايي مطبوعاتو له قوله وايي د هېواد په غربي ریاست راجستان کې د ګرمۍ سره تړلې د نهو کسانو د مړینې خبرونه رپورټ کړی شوي دي، چرته چې د جمعې په ورځ د شګو میداني سیمه پېلوډي کې درجه حرارت 49 ته رسېدلی وو، کوم چې په ریکارډ توګه روان کال په هېواد کې تر ټولو زیاته کچه ده.
د هند د موسمونو د ادارې چارواکو د هېواد د پنجاب او هریانه ترڅنګ په ځینو ریاستونو کې د زیاتو ګرمو څپو خبرداری ورکړی دی.
د هېواد په یو غربي ښار احمد اباد کې ایډیشنل سپرنټنډنټ راجنېش پټېل مطبوعاتي ادارې «دیویا بهاشکر» ته ویلي، دغلته لږ تر لږه دوه کسان د ګرمۍ له وجې مړه شوي دي.
د ریاستي ایمبولینس ادارې ویاند ویکاس بېهاني رویټرز خبري ادارې ته ویلي دي چې په تېرو دریو ورځو کې یې د ګرمۍ سره تړلي یو شمیر ناروغان روغتون ته وړي دي.
په هند کې چارواکو د ګرمۍ کچه د 40 درجه حرارت نه اوښتلو وروسته په هېواد کې د ګرمۍ څپه اعلان کړې ده. په هند کې په عمومي توګه د مۍ په میاشت کې زیاته ګرمي وي خو ساینسدانانو دا کال د زیاتې ګرمې د څپو او د تبې او نورو ناروغیو اټکل کړی دی.
هند کې بارانونه او تاوان
رویټرز خپل رپورټ کې وايي روانه اوونۍ د هند په کیراله ریاست کې د وخت نه وړاندې پشکالي بارانونه اتلس سلنه زیات شوي دي چې د سیلابو علت ګرځیدلي او اووه کسان یې وژلي دي.
د دې ترڅنګ یې په ځینو برخو کې یې د جهازونو الوت هم متاثره کړی وو. د جمعې په ورځ په کیراله کې د نورو درنو بارانونو اټکل شوی دی.
پاکستان کې ګرمي
د پاکستان د هوا پېژندنې ادارې د تودوخې د درېوؤ څپو وړاندوينه کړې اؤ وايي يوه څپه د مئ تر 27مې پورې روانه ده او دوه نورې به د جون په پیل او وروستيو کې شروع کیږي.
رویټرز خبري اداره د پاکستان د موسمي بدلون وزارت د چارواکو له قوله په خپل رپورټ کې لیکلي دي، د زیارت په ورځ تر 26 پورې ضلعې د سختې ګرمې څپې له وجې خټکېدلې او زیاتوي د تازه ګرمو څپو دا لړۍ به د روانې میاشتې تر دېرشمې پورې روانې وي او په ممکنه توګه د ګرمې کچه تر 50 سینټي ګریډ پورې لوړېدی شي.
د پاکستان بېلابېل ښارونه له سختې ګرمۍ او تودو څپو سره مخ دي او په دې لړ کې د پاکستان حکومت د هيواد په ځينو برخو کې سکولونه په عارضي توګه تړلي دي.
Forum