پاکستان کې د شخړو او امنيت د مطالعاتو څيړنيزې غېر حکومتي ادارې پاکستان انسټيتیوټ فار کانفلیکټ اینډ سیکيورټي سټډیز (پيکس) ويلي، د فرورۍ په مياشت کې په خېبرپښتونخوا کې د ترهګرۍ پېښې کمې شوي خو بلوچستان صوبه کې زياتې شوي او په ملک کې د امنيت مجموعي صورتحال د جنورۍ څخه بدل نه وو.
پيکس د فرورۍ په میاشت کې شوو حملو او ترهګرۍ د پېښو په اړه جاري کړي رپورټ کې ويلي، په ټول ملک کې په 97 حملو کې 87 کسان وژل شوي او 118 ژوبل شوي دي، په جنورۍ کې په 93 حملو کې 90 کسان وژل شوي او 135 ژوبل شوي وو.
پيکس ويلي، فرورۍ کې په بلوچستان کې د ترهګرۍ پېښې سېوا شوي، خېبرپښتونخوا او قبايلي ضلعو کې کمې شوي دي. بلوچستان کې د جنورۍ په مقابله کې په فرورۍ کې وسله وال بريدونه 72 فيصده سېوا شوي وو.
ویل شوي، بلوچستان کې د فرورۍ په میاشت کې 57 حملې شوي 42 کسان پکې وژل شوي او 72 ژوبل شوي، په جنورۍ کې په 33 حملو کې 31 کسان وژل شوي وو.
ویل شوي بلوچستان کې په ترسره شوو 57 حملو کې 30 په انتخابي هلوځلو شوې او سياسي ګوندونه په نخښه شوي وو.
پاکستان کې تېره میاشت په اتمه فرورۍ عام انتخابات ترسره شوي، او د انتخاباتو دپاره د کمپاين په مهال او په ځانګړي ډول د انتخاباتو په نزدې کېدو بلوچستان او خېبرپښتونخوا کې د ناامنۍ پېښې سېوا شوې وې.
پيکس ویلي، فرورۍ کې په بلوچستان کې ترسره شوو 57 حملو کې 50 حملې د لومړي نه تر اتمې نېټې پورې شوې وې او د انتخاباتو نه وروسته يواځې اووه حملې رپورټ شوي دي.
د پيکس د رپورټ ترمخه، فرورۍ کې په پخوانۍ فاټا کې د تشدد پېښې 54 فيصده او د خېبرپښتونخوا صوبې په نورو برخو کې 23 فيصده کمې شوي دي.
ویل شوي قبايلي ضلعو کې په 11 حملو کې اووه تنه وژل شوي او 17 ژوبل شوي وو او د جنورۍ په میاشت کې په 24 حملو کې 36 کسان وژل شوي او 57 ژوبل شوي وو.
د پيکس د رپورټ ترمخه د قبايلي ضلعو نه علاوه د خېبرپښتونخوا په نورو برخو کې په 23 حملو کې 35 کسان وژل شوي او 28 ژوبل شوي وو، ويل شوي د جنورۍ په مقابله کې حملې کمې شوي خو ځاني تاوان زیات شوی دی.
په رپورټ کې ویل شوي د فرورۍ په میاشت کې په سيند صوبه کې په پينځو حملو کې درې کسان وژل شوي او په پنجاب کې يواځې يوه حمله شوې او کوم تاوان یې نه وو اړولی.
Forum