د پاکستان الېکشن کمېشن د سپکاوي په قضيه کې د تحریک انصاف ګوند په مشر او پخواني وزيراعظم عمران خان د فرد جرم لګولو نېټه د دويم اګست پورې ځنډولې ده.
د رپورټونو ترمخه عمران خان نن د الېکشن کمېشن په وړاندې حاضر شوی او د هغه وکیل شعېب شاهين ويلي، د قضيې ريکارډ ورسره نشته د بلې نېټې خواست یې کړی وو.
الېکشن کمېشن د هغه خواست منلی د دويم اګست پورې یې د بلې اورېدنې نېټه ځندولې او په بله اورېدنه یې عمران خان ته بيا په خپله د حاضرېدو ویلي دي.
په عمران خان د الېکشن کمېشن مشر او غړو ته د مطبوعاتو د لارې د ګواښونه تورونه دي او قضیه پرې روانه ده.
عمران خان وړاندې هم په الېکشن کمېشن د طرفدارۍ تورونه لګولي او الېکشن کمېشن یې رد کړی دی.
د وي او اې اردو د خبر ترمخه د اورېدنې وروسته عمران خان جرنلسټانو سره په خبرو کې ویلي، غلطي یې نه ده کړې بخښنه ولې وغواړي.
ويل شوي نن په اسلام اباد هايکورټ کې د تحریک انصاف د مشر ضد د توشه خانې د قضیې سره اړونده خواستونه باندې هم اورېدنه شوې، او فېصله محفوظ کړی شوې ده.
ياد عدالت د سايفر په معامله هم د عمران خان په خواستونو فېصله محفوظ کړې چې د اورېدو وړ دي که نه دي.
نزدې يوه اوونۍ وړاندې د پخواني وزيراعظم د پرنسپل سيکرټري اعظم خان یو مبينه بيان په مطبوعاتو خپور شوی، هغه ويلي وو، "عمران خان د سیاسي ګټو دپاره د سايفر يا بهرنۍ مراسلې ډرامه جوړه کړې او د سايفر د لارې یې د قامي امنيتي ادارو او ولس ترمنځه د کرکې خورولوهڅه کړې ده".
د اعظم خان د مبينه بيان مخې ته راتلو وروسته په ټولنيزو رسنيو د عمران خان يوه ويډيو خپره شوې، هغه ويلي، "اعظم خان يو ايمانداره تن دی څو پورې چې مې د هغه د خلې نه په خپله نه وي اورېدلي زه یې نه منم".
د پاکستان د ځايي ميډيا ترمخه اعظم خان ياد "بيان د مجسټرېټ په وړاندې ريکارډ کړی" وو. او ويلي يې وو "سایفر ته د ملکي ادارو او امريکا غلط نوم ورکړی شوی او عمران خان د منع کولو باجود اسناد د ولس په وړاندې ښکاره کړي وو".
د بيان ترمخه، "عمران خان د خپل حکومت بچ کولو دپاره د سايفر ډرامه جوړه کړې وه".
عمران خان تېر کال د اپرېل په مياشت کې د بې باورۍ د تحریک د لارې د وزيراعظمۍ څخه لرې کړی شوی، هغه وخت یې تور لګولی وو "د هغه حکومت د امريکې په سازش" لرې کړی شوی وو.
امريکې، د پاکستان پوځ او د پاکستان موجوده حکومت د عمران خان دغه تور څو ځله رد کړی چې ګنې هغه د امریکې په سازش لرې کړی شوی وو.
عمران خان وروسته په يو بيان کې ويلي وو سازش په اصل کې د دلته [پاکستان] نه شوی وو.
او د کورنيو چارو وزیر رانا ثناالله بيا په يو خبري کانفرنس کې ويلي وو ، "عمران خان د ملک او ادارو پرضد سازش کړی او د نهمې مې پېښې هم د دغه سازش کړۍ وه".
هغه زیاته کړې وه، "کلاسيفايډ سيکرټ يا پټ اسناد د ځان سره ساتل او بيا عام کول جرم دی او عمران خان نه يواځې په ښکاره دغه جرم کړی دی بلکې څو پورې چې هغه د ځان سره دغه سايفر اېښودی وي جرم کوي. تر هغې چې نيول شوی نه وي".
