لاس رسیدونکی لینک

تازه خبر

پاکستان

په دریم مارچ کېدونکي د سېنیټ په انتخابي مهال وېش کې فاټا نشته ده

د پاکستان انتخابي کمیشن (اي سي پي) اعلان کړی دی چې د سینټ انتخابونه به د روان کال په دریم مارچ کیږي، خو په انتخابي مهال وېش کې قبایلي سیمه فاټا نه ده شامل کړې شوې.

د پاکستان انتخابي کمیشن (اي سي پي) اعلان کړی دی چې د سینټ انتخابونه به د روان کال په دریم مارچ کیږي، خو په انتخابي مهال وېش کې قبایلي سیمه فاټا نه ده شامل کړې شوې.

وي او ای ډیوه ته په یوه مرکه کې د اي سي پي یو چارواکي خورشید عالم اوویل فاټا په مهال وېش کې ځکه نشته دی چې حکومت په نوي قانون (الیکشن ایکټ) کې پایه تخت اسلام اباد او فاټا نه ده شامل کړې، هغه اوویل:

"مونږ په دویمه جنورۍ حکومت ته خواست کړی وو چې په نوي قانون کې پاتې علاقې شامل کړي خو تر اوسه حکومت ددغه قانون منظوري نه ده ورکړې"

ښاغلی عالم وايي که په څو ورځو کې حکومت په نوي قانون کې بدلون او نه کړو نو په دریم مارچ کیدونکي انتخاباتو کې به فاټا او اسلام اباد شامل نه وي.

د فاټا د سینیټ په اته څوکو کې د څلورو موده پوره شوی ده او که چري په دریم مارچ کیدونکي انتخابونو کې فاټا شامل نه شوه نو په سینیټ کې به د فاټا یواځې څلور غړي پاتې شي. د پاکستان د سینېټ دغړي توب موده شپږ کاله وي.

د پاکستان حکومت تېر کال نوی انتخابي قانون د الیشکن ایکټ په نوم جوړ کړی دی. په دغه قانون کې د کال ٢٠١٧ د سر شمېرو په اساس د خېبر پښتونخوا او بلوچستان صوبې د قامي او صوبايي اسمبلۍ څوکۍ سوا کړې شوي دي او د پنجاب صوبې څوکۍ کمې کړې شوي دي.

د پاکستان د قانون شق نمبر ٢۴٧ د هیواد صدر ته د فاټا په حقله ځانگړی واک ورکړی دی. او هم صدر کولی شي چې د ٢٠١٧ انتخابي قانون فاټا ته ور وغځوي.

وتلې قانون دان لطیف افریدی وايي فاټا داسې علاقه ده چې د پاکستان حکمرانان ترې هډو ځان نه خبروي:

" صدر کولې شي چې د ارټیکل ٢۴٧ لاندې په دغه قانون د ستخط وکړي خو کیدې شي هغه هډو خبر نه وي"

د پاکستان د اوسني صدر ممنون حسېن په حقله اکثره پاکستاني مطبوعات ليکي هغه د هېواد په چارو کې څه واک اختیار نه لري.

د پاکستان د اردو ژبې ورځپاڼه جنگ کې کالم لیکونکي سلیم صافي د صدر ممنون حسین سره د خپل یو ملاقات په حقله په خپل یو ورستي کالم کې ليکلي وو چې صدر ممنون حسېن ښه سړی دی خو چرته فاټا ته نه دی ورغلی او نه ورته د دغه سيمې په حقله څه معلومات شته دی.

See all News Updates of the Day

عدالت ته د دفاع او استخباراتي چارواکو له بلل کېدو وروسته د شاعر احمد فرهاد ګرفتاري ښکاره کړل شوې

د اسلام اباد څخه بې درکه شوي شاعر احمد فرهاد پرضد مقدمه درج شوې او ګرفتاري يې د پاکستان د انتظام لاندې کشمیر کې ښکاره کړل شوې ده، دا ‏وروسته له هغې چې اسلام اباد هايکورټ په ‏‎24‎مه مې د شاعر په جبري توګه بې درکۍ قضيې اورېدنه کې د دفاع او استخباراتي ادارو چارواکي نن عدالت ‏ته بللي وو.‏

نن د يادې قضيې بيا اورېدنه شوې او اټارني جنرل منصور عثمان اعوان عدالت ته ويلي، احمد فرهاد نيول شوی او د پوليس په حراست کې دی.‏

د اسلام اباد هايکورټ جج جسټس محسن اختر کیاني د قضيې اورېدنه کړې، او عدالت ته د پاکستان د انتظام لاندې کشمیر د دهيرکوټ پوليس تاڼې ‏رپورټ وړاندې کړل شوی دی.‏

شاعر احمد فرهاد د مي په 17مه اسلام اباد کې د شپې د خپل کور د درشل څخه ناڅرګنده کسانو تښتولی وو او د هغه د لا درکۍ مقدمه بيا د اسلام اباد په ‏لوي بهير تاڼه کې درج کړل شوې وه.‏

د لا درکه شاعر احمد فرهاد ښځې په تېره اورېدنه کې ډیوه سره خبرو کې ويلي وو، مېړه به یې تل د لا درکه تنانو په حق کې اواز پورته کولو او هم د دې له ‏کبله هغه په خپله هم د جبري بې درکۍ ښکار شو.‏

د رپورټونو ترمخه، جسټس محسن اختر کیاني په نننۍ اورېدنه کې ويلي، د ايجنسيانو (استخباراتي ادارو) سره یې هیڅ دوښمني نشته، "مونږ يواځې دا ‏وايو چې د قانون ترمخه دې کار وکړل شي".‏

نوموړي جج زياته کړې، "مونږ ځينې پوښتنې کړې وې د هغې ځواب تراوسه نه دی ورکړل شوی، مونږ د بنيادي حقونو د ساتنې سوګند کړی دی".‏

د احمد فرهاد پرضد درج کړل شوې مقدمه باندې نننۍ نېټه ‏‎29‎م مې ليک ده، او مقدمه د دهيرکوټ په تاڼه کې درج کړل شوې ده.‏

په مقدمه کې ویل شوی، نن یې په کوهاله پُل يو ګاډی ودرولی، "د ګاډي د ډرايور نه یې شناختي کارډ غوښتی او بيا په ګاډي کې شاته ناست تن د پوليس ‏اهلکارو سره بدتميزې کړې او خبرې اړولي دي چې تاسو تلاشي نه شئ کولی".‏

ويل شوي، دغه بيا خپل نوم سيد فرهاد علي شاه ويلی، چې "د پېنډۍ اسلام اباد نه خپل پلارني کور باغ ته روان دی، هغه په کار سرکار کې مزاحمت کړی ‏او جرم یې کړی دی".‏

د رپورټونو ترمخه د احمد فرهاد وکیلې (قانون پوهه) ايمان مزاري ویلي، د فرهاد کورنۍ د پاکستان د انتظام لاندې کشمير مظفر اباد ته ځي او چې د هغه ‏سره وويني نور احوال به ورسره شريکوي.‏

د شاعر احمد فرهاد د بې درکۍ پرضد په اسلام اباد کې احتجاج شوی دی.‏

د احتجاج ګډون وال تابس فاروق سدوزي وي او اې ډيوه ته ویلي، "زمونږ مطالبات د هغو خلکو نه دي چې خلک په جبري توګه بې درکه کوي چې په (نا ‏معلومو) پيژندل کيږي. د احمد فرهاد څه ګناه ده؟ هغه خو يا شاعر دی، تاسو په دې خلک بې درکه کوئ چې د هغوی غږونه غلي کړئ ؟، تاسو څه پيغام ‏ورکول غواړئ د کشمیر خلکو ته؟ دا چې کشميريان په پاکستان کې غېر محفوظ دي؟".‏

په پاکستان کې د خلکو په جبري توګه د بې درکيو لړۍ د کلونو راهسې روانه ده او د بې درکه بلوچانو او پښتو د کورنیو غړي او د بشري حقونو ډلې د ‏خلکو په جبري توګه د بې درکيو تور د پاکستان په استخباراتي ادارو پورې کوي خو پوځ دا تورونه بيا بيا ردوي.‏

‏(په دې خبر کې ځینې معلومات د ډيوه خبریال وقار احمد شريک کړي دي).‏

پاکستان کې د ځمکو کاروباري ملک رياض وایي، "وعده معاف ګواه نه جوړېږم، څومره ظلم کوئ ویې کړئ"‏

پاکستان کې د ځمکو ياد کاروباري تن ملک رياض حسېن ويلي، "وعده معاف ګواه به نه جوړيږم که څومره ظلم کوئ ویې کړئ". ملک ریاض د القادر ټرسټ ‏او ‏‎190‎‏ ميلينه پاونډونو په مقدمو کې اشتهاري ګرځول شوی او عدالت د هغه د جايدادونو ضبط کولو حکم هم کړی دی.‏

وعده معاف ګواه هغه چاته وایي چې د چا خلاف په کومه مقدمه کې د ګواهۍ ورکولو، سهولت کار جوړېدلو یا د بشپړ حقیقت بیانولو لپاره د ده د بخښنې ژمنه ورسره وشي او وروسته د ده جرم وبخښل شي.

د روان کال فرورۍ په مياشت کې د پاکستان د راولپنډۍ د احتساب عدالت د القادر ټرسټ د ‏‎190‎‏ ملينه پاونډونو په مقدمه کې په پخواني وزيراعظم او د ‏تحریک انصاف ګوند په مشر عمران ‏خان او د هغه په مېرمن بشرا بي بي فرد جرم یا رسمي تور لګولی وو.‏

د احتساب عدالت جج ناصر جاوېد رانا دغه فرد جرم لګولی، خو تورنو/ ملزمانو (عمران خان او بشرا بي بي) د صحت ‏جرم نه انکار کړی وو.‏

ملک رياض په اېکس (پخواني ټویټر) تفصيلي پوسټ کې ويلي، "تېره شپه په راولپنډۍ کې یې د بحریه ټاون په دفترو سرکاري مشينرۍ بغېر د کوم قانوني ‏اختيار چاپې وهلي دي، د کوم سیاسي واک مبارزه کې د فریق نه جوړېدو د اعلان نه وروسته، زه د ظلم وستم ښکار يم، زه د بحريه ټاون ضد اقداماتو ‏غندنه کوم".‏

ملک ریاض په اېکس يوه ويډيو هم پوسټ کړې او دعوه یې کړې، "د څو ساعتونو پورې یې په دفترونو چاپې روانې وې، دفترونه یې مات کړل شوي، عمله ‏یې ځورول شوې او تښتول شوې ده، دفتري ريکارډ، کمپيوټرې او نقدي ترې وړل شوې ده".‏

هغه تور لګولی، "تېره میاشت د بحریه ټاون د ګڼو جايدادونو او اکاونټونو ضبط کولو وروسته، دا چاپې د خپلې سياسي ايجنډې او په بحریه ټاون د فشار ‏اچولو دپاره د رياستي ادارو لخوا د بې مهاره بدمعاشۍ عکاسي کوي". ‏

نوموړي ویلي، "د کوم طاقت په لوبه کې به ونه کاريږي، د وزيراعظم، وزيراعلا پنجاب، وزارت داخله، نېب او اېف آی اې د مشرانو نه د بحریه ټاون د عملې ‏په سمدستي توګه د خوشي کولو غوښتنه کوي".‏

د پاکستان تحريک انصاف ګوند يو مشر زلفي بخاري په اېکس پوسټ کې دعوه کړې، "دا وخت د ملک ریاض سره ځکه داسې کیږي چې هغه د عمران خان ‏خلاف بيان ورکولو نه انکار کوي".‏

د پاکستان ادارو په رسمي توګه د ملک رياض تورونو ته کوم ځواب نه دی ويلي، خو د اطلاعاتو مرکزي وزير عطا تارړ بي بي سي ته ويلي، زه نه ګڼم چې په ‏ملک رياض کوم فشار دی هغه په يوه قضيه کې ملزم/ تورن دی، فشار په هغه چا اچول کيږي چې د مقدمې د کارروايۍ برخه وي، که هغه د وعده معاف ‏ګواه جوړېدو دپاره د فشار خبره کوي نو په عدالتونو کې ولې نه پېش کيږي".‏

پاکستان کې د ملک ریاض په اړه داسې دعوې کيږي، چې هغه يو داسې بااثره کاروباري تن دی چې په يو وخت د سياستوالو او اسټبلشمنټ سره اړيکې او ‏سياسي چارو کې لاس لري.‏

درې ورځې وړاندې نوموړي په اېکس يو بل پوسټ کې دعوه کړې وه، "د يو کال نه د زياتې مودې راهسې په ما د جوړ جاړي دپاره فشار اچول کيږي، خو زه ‏به کله هم چاته اجازت ور نه کړم چې د سياسي مقاصدو دپاره مې وکاروي".‏

د القادر ټرسټ قضيه څه ده؟

پاکستان کې د پي ډي اېم تېر اتحادي حکومت په عمران خان تور لګولی وو چې کله هغه په اقتدار کې وو نو د القادر ټرسټ په نوم د یو خېریه بنسټ لپاره ‏یې د پاکستان ‏دنننه د ملک ریاض نه د پنجاب صوبې د جهلم په سوهاوه سیمه کې یې د القادر پوهنتون لپاره 458 کناله ځمکه ترلاسه کړې وه.‏

القادر پوهنتون د القادر ټرسټ یا بنسټ د سیوري لاندې فعالیت لري او عمران خان او د هغه مېرمن د دغه بنسټ مسولین یا مشران دي.‏

عمران خان ويلي وو دغه ځمکه ورته د القادر پوهنتون لپاره ملک ریاض عطیه کړې وه خو تېر حکومت تور لګولی وو چې دا معامله د عطیې یا ‏چندې نه ده ‏بلکې د بحریه ټاون د مالک ملک ریاض او عمران خان د تېر حکومت ترمنځ د شوي یو پټ تړون برخه وه.‏

د پي ډي اېم حکومت ويلي وو، د برتانيې د نيشنل کرايم ايجنسۍ د پلټنو په نتيجه کې ملک رياض د قضيې کولو په ځای جوړ جاړی کړی او ايجنسۍ ‏دغه ‏پېسې‎ ‎‏(‏‎190‎‏ ملينه پاونډونه) د پاکستان د رياست اثاثه ګرځولې وه

ويل شوي وو، دغه پېسې بيا برتانیې د پاکستان حکومت ته سپارلې وې خو د عمران خان حکومت بیا دا پېسې د ملک ریاض په ذمه ورپورې هغو 460 ‏اربو ‏روپو کې شمارلې وې چې سپریم کورټ یې د کراچۍ د بحریه ټاون په قضیه کې ملک ریاض ته د ادا کولو امر کړی وو.‏

د عمران خان ضد د عدت مقدمه کې فېصله نه ده اورول شوې، هايکورټ ته لېږل شوې

د پاکستان تحريک انصاف ګوند مشر او پخواني وزيراعظم عمران خان ضد د عدت په مقدمه کې د اورول شوو سزاګانو خلاف اپيلونو باندې فېصله نن نه ده ‏اورول شوې، او قضيه هايکورټ ته لېږل شوې ده.‏

د رپورټونو ترمخه، د اسلام اباد سېشن جج شاه رخ ارجمند به نن د عدت په قضيه کې د عمران خان او بشرا بي بي د سزاګانو ضد اپيلونو باندې فېصله ‏اوروله.‏

د پي ټي آی ګوند مشر بېرسټر ګوهر تور لګولی، چې د فېصلې نه اورول کېدو دپاره په جج فشار اچول شوی دی.‏

له دې وړاندې ويل شوي، د اورېدنې په وخت د بشرا بي بي پخواني مېړه خاور مانيکا په جج شارخ ارجمند باندې د باور د نشتوالي څرګندونه کړې او په ‏عدالت کې د عمران خان د پلوي وکيلانو او خاور مانيکا ترمنځ خبرې اړول شوي او عدالت کې دننه ګډوډی او شور شوی دی، له دغې وروسته بيا جج د ‏فېصلې اورولو بغېر د عدالت څخه پاڅېدلی وو.‏

ورووسته نوموړي جج هايکورټ ته خط ليکلی او ویلي يې دي، اعتراضونه پرې کيږي ځکه هغه فېصله اورول مناسب نه ګڼي.‏

د روان کال فرورۍ په درېمه عمران خان او د هغه مېرمنې بشرا بي بي ته عدالت د عدت دوران کې د نکاح کولو په جرم کې د 7، 7 کالو د بند سزا اورولې ‏وه، ‏بيا د دغو سزاګانو پرضد خواستونه شوي وو.‏

سيشن جج شارخ ارجمند هايکورټ ته په ليکلي خط کې ويلي، خاور مانيکا پرې په خلاص عدالت کې د بې باورۍ اظهار کړی دی، او زياته کړې یې ده، ‏شکايت کوونکي او وکیل یې تل څه نا څه بهانه جوړه کړې او د اورېدنې وروسته کولو هڅه یې کړې ده.‏

بېرسټر ګوهر د عدالت نه بهر مطبوعاتو سره خبرو کې ويلي، نن سهار د قضيې فېصله اورول وو، خو په عدالت کې سرکاري وکيل نه وو او خاور مانيکا د ‏عدالت ضد ناوړه توري کارولي دي.‏

د خاور مانیکا لخوا په دغه اړه کوم بيان مخې ته نه دی راغلی.‏

د بشرا بي بي پخواني مېړه خاور مانيکا د تېر کال نومبر په میاشت کې د اسلام اباد د سېول جج قدرت الله عدالت ته خواست کړی وو چې د عمران خان او ‏بشرا بي ‏بي نکاح د عدت وخت پوره کېدو نه مخکې شوی وو او په دواړو یې د ناجايزه تعلقاتو تور لګولی وو.‏

د عدت په وخت نکاح قضيه کې د سزاګانو د فېصلې اورول کېدو وروسته د فرورۍ په میاشت کې عمران خان ویلي وو، په ده باندې په عدت کې د نکاح ‏کولو قضیه د ده د سپکاوي یا ذلیله کولو لپاره جوړه کړل شوې ده او په دې مقدمه کې په بشپړ ډول هڅه شوې ده چې دی ذلیله کړل شي.‏

عدت څه ته وايي؟

قانون پوهان وايي، عدت دوه ډوله وي، "يو عدت د ښځې او خاوند د طلاق او خلعې نه وروسته وي، بل عدت د ښځې د خاوند د مړينې وروسته وي، د دې ‏خپله خپله موده ټاکل شوې ده".‏

د قانون پوهانو په خبره، د پاکستان د عايلي يا کورنيو معاملاتو د قانون ترمخه، "د خاوند د مړینې نه وروسته د عدت موده څلور میاشتې او لس ورځې ده ‏او د طلاق او خلعې په صورت کې د عدت وخت درې میاشتې يا 90 ورځې دی"، او "د دواړو ډوله عدت په وخت کې ښځه د هیچا سره د نکاح په صورت کې ‏راشه درشه نه شي کولی دا قانوني او شرعي دواړه حکمونه دي".‏

قانون پوهان وايي، "د عايلي قوانينو د 90 ورځو پوره کېدو وروسته چې طلاق ډګري يا پوخ وشي هغه بيا متعلقه يونين کونسل ته د تاييد دپاره ولېږل شي ‏او د هلته نه یې تاييد کيږي، او د عدت 90 ورځو کې نکاح ځکه نه شي کېدی وجه یې د ښځې او د هغې د نسل سره جوړيږي".‏

پوهان وايي په دې کې د وراثت مسله راځي، "د درېو میاشتو نه پس که ښځه واده وکړي يا څلورو میاشتو او لسو ورځو نه وروسته کوم ماشوم زيږوي، نو ‏هغه به معلوم وي چې هغه د کوم خاوند نه وو ځکه دغه کار ته د قانوني بڼې ورکولو دپاره د عدت وخت ټاکل شوی دی د وراثت مسله پکې راځي".‏

د بلوچستان په واشک کې مسافر بس کندې ته لوېدلی، 28 تنه پکې مړ‎ہ 20 ټپیان شوي

د بلوچستان ایالت په واشک سیمه کې یو مسافر بس د تېزرفتارۍ له کبله یوې ژورې کندې ته لوېدلی دی او په پېښه کې د ښځو او ماشومانو په ګډون 28 تنه مړ‎ہ شوي او 24 تنه ټپيان شوي دي.

د بسیمې د لیویز چاراکو په وینا د چهارشنبې- شورو په سهار وختي شاوخوا پینځه بجې د ضلع واشک په بسیمه تحصیل کلغلي غرنۍ سیمه کې دا پېښه شوې ده.

د بسیمه لیویز چارواکي محمد نور وي او اې ډیوہ ته د ټیليفون له لارې وویل، مسافر بس د شپې له تربته را وتلی او د بلوچستان ایالت سر ښار کوټې ته روان وو چې د زیات رفتار له کبله پېښه بې قابو شوی دی:

“د بس ټایر وتلی، له دې سرہ سم بس اول له غرہ سرہ ټکر شوی او وروسته لاندې کندې ته لوېدلی، په بس کې تر پینځوست زیات نارینه او ښځینه مسافر سوارہ وو”۔

د چارواکو په وینا د سخت ټکر له کبله په بس کې بند/نښتي مسافر د کرېن په واسطه را ایستل شوي ځکه ھم د مرستو په کار کې زیات وخت لګیدلی۔

د پېښې مړ‎ي او ټپیان د سیمې سرکاري روغتون ته وړ‎ل شوي دي. پولیس وایي شپږ کسان د پېښې په ځای کې مړه شوي وو او د ډېرو ټپیانو حالت مرګونی وو او په روغتون کې یې ساه ورکړه.

د بسيمې روغتون مشر ډاکټر نورالله رسنیو ته ویلي، ”27 مړي او 24 ټپيان د بسيمې دولتي روغتون ته راوړ‎‎ل شوي دي، د شپږ‎ ټپیانو حالت مرګونی دی، په مړ‎و کې درې ښځې او يو ماشوم ھم دی، په ټپيانو کې ھم ښځې او ماشومان شامله دي”۔

د بلوچستان وزیر اعلا میر سرفراز بګټي پر پېښه خفګان ښکارہ کړ‎ی او د ټپیانو د ښه علاج کولو امر یې کړ‎ی دی.

په بلوچستان کې له تېرو څو کلونو راهیسې پر لویو لارو مسافربسونه او نور د مسافرو ګاډي کله د تېزرفتارۍ او کله د ټکر کېدو له پېښو سره مخ کیږي چې په نتیجه کې یې په سلګونو کسان مړه شوي او ټپیان شوي دي.

شهباز شریف: پاکستان کې به د چین وګړو ته بشپړ امینت ورکوؤ

وزیراعظم شهباز شریف ویلي په پاکستان کې میشت د چین وګړو ته به بشپړه امنیت ورکول کیږي اؤ په دې لړ کې یو هر اړخیزه امنیتي پلان هم جوړ کړل شوی دی.

د نهې په ورځ د چین لخوا پاکستان کې د سرمایه ګزارۍ اؤ د چیني وګړو د امنیت په اړه د اوچتې پایې د یوې غونډې د مشرۍ کولو په مهال وزیراعظم شهباز شریف ویلي، حکومت یې د سي پیک د راتلونکي پړاؤ په اړه کوټلې تیارۍ نیسي اؤ د چین په مرسته به د ګوادر بندرګاه د نقل و حمل یا لاجسټکس مرکز جوړولی شي.

پاکستاني رسنۍ وایي چې په دې غونډه کې د بیلابیلو وزارتونو له لوري د پاکستان اؤ چین د اقتصادي اړیکو په اړه وړاندیزونه هم ورکړل شوي دي.

ښاغلي شهباز شریف غونډې ته ویلي پاکستان له چین سره د زراعت، آي ټي اؤ توانایۍ په څانګو کې خپلو مرستو پراخولو ته لیواله دی.

هغه وویل چین د پاکستان په معاشي پرمختیا کې یو مهم انډیوال دی اؤ مونږ د چین صنعتونو په ځانګړي ډول د کپړو صنعت ته پاکستان کې د کارخانو جوړولو بلنه ورکوؤ.

د وزیراعظم وینا وه چې که چینایي صنعت کاران اؤ سرمایه کاران په پاکستان کې سرمایه ګزارۍ ته راوړاندې شي نو پاکستان به ورته کوټلی امنیت اؤ هر ډول اساني ورکوي .

دا په داسې حال کې ده چې په دې وروستیو کې د پاکستان دننه په چینایي وګړو یو شمیر ترهګریز اؤ ځانمرګي بریدونه شوي چې پکې د چین وګړو ته درنه مرګ ژوبله اوښتې ده.

تر دغو خونړیو بریدونو وروسته روانه میاشت د کورنیو چارو د وزیر محسن نفوي په مشرۍ شوې یوه غونډه کې د چینایي وګړو د امنیت لپاره چیلاس کې د سیف سټي یا خوندي ښار د پروژې پېلولو پرېکړه شوې وه.

د روانې میاشتې په پیل کې د کورنیو چارو وزیر محسن نقوي په کراچۍ کې د چين کونسلګرۍ ته ورغلی ؤ او ويلي یې وؤ چې "د چينايي وګړو امنيت ورته ډېر ګران دی، د ‏چينايانو د تګ راتګ دپاره جوړ پلان باندې عمل کولی شي او د چينايي وګړو خونديتوب زمونږ فرض دی"

په پاکستان کې د چین په وګړو وروستی برید په 26م مارچ د خېبر پښتونخوا د شانګلې ضلعې په بشام سیمه کې شوی ؤ .

دغلته داسو ته روانه د چیني انجنیرانو په قافله یو ځانمرګي برید شوی و چې پکې پینځه د چین ‏انجنیران او د هغوي یو پاکستانی ډرایور وژل شوي وو.‏

تر دغه برید وروسته چین پاکستان کې د خپلو وګړو په تحفظ ژورې اندېښنې ښکاره کړې وې اؤ د پاکستان له حکومت یې غوښتنه کړې وه چې د چین د وګړو تحفظ باید باوري کړي.

نور کتل

بي بي شیرینه

بي بي شیرینه: په ټیلې ویژن
please wait

No media source currently available

0:00 1:59:58 0:00
XS
SM
MD
LG